Mateo 1 - Nyamwezi New Testament 1951

¹ Kitabu kʼigongo lyamwa Yesu Kristo, Mwana wamwa Davidi, Mwana wamwa Abrahamu.

² Abrahamu wamuvyalaga Isaka; na Isaka wamuvyalaga Yakobo; na Yakobo wamuvyalaga Yuda na vaduguye.

³ Yuda na Tamari vavavyalaga Feresi na Zala; na Feresi wamuvyalaga Hezeroni; na Hezeroni wamuvyalaga Aramu.

⁴ Na Aramu wamuvyalaga Aminadabu; na Aminadabu wamuvyalaga Nasoni; na

⁵ Nasoni wamuvyalaga Salimoni; na Salimoni na Rahaba vamuvyalaga Boasi; Boasi na Ruti vamuvyalaga Obedi;

⁶ na Obedi wamuvyalaga Isai; na Isai wamuvyalaga mutemi Davidi;

⁷ Na Davidi na uyo wavage muke wamwa Uria vamuvyalaga Salomo; na Salomo wamuvyalaga Rehoboamu; na Rehoboamu wamuvyalaga Abia; na Abia wamuvyalaga Asafu;

⁸ na Asafu wamuvyalaga Yosafati; na Yosafati wamuvyalaga Yoramu; na Yoramu wamuvyalaga Uzia;

⁹ na Uzia wamuvyalaga Yotamu; na Yotamu wamuvyalaga Ahazi; na Ahazi wamuvyalaga Hezekia;

¹⁰ Hezekia wamuvyalaga Manase; Manase wamuvyalaga Amoni;

¹¹ na Amoni wamuvyalaga Yosia; na Yosia wamuvyalaga Yekonia na vaduguye hʼitungo lya kusamiziwa ku Babiloni.

¹² Na hanuma na kusamiwa ku Babiloni Yekonia wamuvyalaga Salatieli; na Salatieli wamuvyalaga Zerubabele;

¹³ na Zerubabele wamuvyalaga Abihudi; na Abihudi wamuvyalaga Aliakimu; Eliakimu wamuvyalaga Azoro;

¹⁴ na Azoro wamuvyalaga Sadoko; na Sadoko wamuvyalaga Ahimu; na Ahimu wamuvyalaga Eliyudi;

¹⁵ na Eliyudi wamuvyalaga Eliazari; na Eliazari wamuvyalaga Matani; na Matani wamuvyalaga Ya kobo;

¹⁶ na Yakobo wamuvyalaga Yosefu mugosi wamwa Maria, homwene wamuvyalaga Yesu, homwene alitanwa Kristo.

¹⁷ Sisyo mavuvyalwa gose kufuma Abrahamu kusika Davidi gali ikumi na anne; na kufuma Davidi kusika kusamiziwa ku Babiloni gali mavuvyalwa ikumi na anne; na kufuma kusamiwa ku Babiloni kusika Kristo gali mavuvyalwa ikumi na anne.

¹⁸ Alisi kuvyalwa kwamwa Yesu Kristo kwavagi syenisyo: Aho nina Maria walahagwa na Yosefu, alisi vavagi vatali kwingila mu vukwele, wigelaga ati ali na nda ku nguzu ya Roho Nsondo.

¹⁹ Alisi Yosefu mugosi wakwe, kunguno wavagi mugololoku wavagi akatogilwe kumuponda nsoni ha pe, na walomaga kumuleka mu lwiviso.

²⁰ Aho wavagi aliwiganika kunguno ya genaya, malaika wamwa Guku wigelaga hawakwe mu kiloti, uhaya, Yosefu mwana Davidi, uleke kogoha kumusola Maria muke wako, kwisi cheniki chatundilwe muwakwe kili cha Roho Nsondo.

²¹ Na akuvyala mwana mugosya, naʼho ukumupa lina YESU, kwisi akuvapizya vanhu vakwe ku mavukenaguzi gavo.

²² Alisi genaya gose gakwilaga, kigele muhayo gufikile gwayombilwe na Guku ku mufumbuzi, alihaya,

²³ Lolaga muhala akuvi na nda na akuvyala mwana mugosya, Na akwitanwa Imanueli,

²⁴ nguno yalyo: Mulungu ali hamohene niswe. Na Yosefu aho wamisaja mu tulo, wavezaja kitisi malaika wamwa Guku wamulagilaga, na wamusolaga mukima wakwe kuwakwe.

²⁵ Na wavagi akamumanikizye kusika wamuvyalaga mwana wa vuhala, na wamwitanaga YESU.