Marko 6 - Nyamwezi New Testament 1951

¹ Na wafumaga kwenuko na wasikilaga kwigunguli

² lyavo, na vahemba vakwe vamulondaga. Na ha sabato wavukizaja kuhembeka mu sinagogo; na avo vamwigagwa vakumaja na vayombaga, Uyu wapivilwa genaya kuhe?

³ Na ngelo ki uyu wapivilwe? Na milimo iyi migaka yiliveziwa na makono gakwe? Uyu akavile muselemala, mwana wamwa Maria, na muduguye wamwa Yakobo na Yose na Yuda na Simoni? Na valumbuye vakavileho henaha mugati niswe? Na vamugayilizaja.

⁴ Na Yesu wavawilaga, Mufumbuzi akagayivagwa isima, sumbwa mu kaya yakwe na mugati na vaduguye na mu numba yakwe.

⁵ Na kwenuko wavagi akakovolile kuvezya mugaka ninga gumo, sumbwa wavatulilaga makono gakwe vasatu vado duhu na wavapizaja.

⁶ Na wakumaja kunguno yʼivengwe lyavo. Na wayumbayumbaga mu makaya alihembeka.

⁷ Na wavitanaga ava ikumi na vavili na wavukizaja kuvatumizya vavili vavili, na wavapaga vukovozi kwigulya na migavo ya zoma;

⁸ na wavalagilaga valeke kujana kinhu ku nzila, sumbwa mulanga duhu, ngʼo

⁹ mukate, ninga ngʼo mufuko, ninga ngʼo mapesa mu musipi, alisi vazwale filatu, na vakitunge ngʼo myenda ivili.

¹⁰ Na wavawilaga, Uko mukukingila mu numba, mwenumo mudile kusika mulifuma kwenuko.

¹¹ Na ulu va mukaya yimo kuvanukula ngʼo ninga kuvadegeleka ngʼo, mufume kwenuko na mugungʼhumule luvuvu ku magulu ginwe luve vusangilwaho kuwavo.

¹² Na ava vafumaga na vatanizaja Mhola, vanhu vapiluke moyo,

¹³ na vayifumaja migavo mingi na vavavilaga vasatu vingi maguta na vavapizaja.

¹⁴ Na mutemi Herode wigagwa kunguno yamwa Yesu, kwisi lina lyakwe lyakumukile, na wayombaga, Yohana Moja wahembukile ku lufu, na kunguno yeniyi nguzu zyenizi zilitumama muwakwe.

¹⁵ Vangi vayombaga, Uyu ali Elia, na vangi, Uyu mufumbuzi; ali kitisi umo wa vafumbuzi.

¹⁶ Alisi Herode aho wayigagwa wayombaga, Yohana mwenuyo namutinaga mutwe wahembukile ku lufu.

¹⁷ Kwisi Herode waliwatumizya kumudima Yohana na kumutunga mu jela kunguno yamwa Herodia, mukima wa muduguye Filipo, kunguno wamutolile.

¹⁸ Kwisi Yohana wamuwilaga Herode,

¹⁹ Guli mwiko kuwako kuvi na mukima wa muduguyo.

²⁰ Alisi Herodia wamusyulukagwa na wakovaga kumuvulaga, alisi wavagi akakovolile, kunguno Herode wamogohaga Yohana, kwisi wamumanikaja ati ali munhu mugololoku na musondo, na wamulindilaga; na ulu wamudegelekaga wavagi na miganiko mingi, hangi wamwigagwa na kudeha.

²¹ Na aho lusiku lwamuvelelaga lwafikaga, aho Herode ha sikukulu ya kuvyalwa kwakwe wavavezezaja mayeye vanachalo vakwe na

²² vatwale na vahanya va Galilaya; na aho mwanike wamwa Herodia wingilaga na wanegulaga wamutogezaja Herode na venavo vikalaga hamohene nawe hakulila. Mutemi wamuwilaga mwanike, Unilomhe icho

²³ ulikova, nane nkukupa veve; na wamulahilizaja, Icho ulikova nkukupa ninga kusika nusu ya vutemi wane.

²⁴ Na uyu wafumaga na wamuvuzaja nina, Nalombeki?

²⁵ Alisi uyu wayombaga, Mutwe gwamwa Yohana Moja. Na itungo lili wingilaga wangu ku mutemi, walombaga, uhaya, Ndikova umpe itungo lili mu lubehe mutwe gwamwa Yohana Moja.

²⁶ Na mutemi wasayaga munogwene, alisi kunguno ya mulahi gwakwe na vageni wavagi akakovolile kumwima.

²⁷ Na itungo lili mutemi wamutumizaja mulugaluga na walagilizya kuleta mutwe gwakwe.

²⁸ Na uyu wajaga na wamutinaga mutwe mu jela, na waguletaga mutwe gwakwe mu lubehe na

²⁹ wamupaga mwanike, nawe wamupaga nina. Alisi aho vahemba vakwe vigagwa, vizaga na vagusolaga mulambo gwakwe na vagutulaga mu kivimbi.

³⁰ Na Vatume vivilingaga hamwa Yesu na vamupozezaja gose hogene vitaga na vahembekaga.

³¹ Na uyu wavawilaga, Nzugi inwe mwinene henaho haduhu vanhu, na mwisuhye hado; kwisi vavagi vingi hovene vavagi valiwiza na valija, na vavagi vakavile nʼitungo

³² lya kulya ngʼo. Na vajaga vinene mu wato uko kuduhuko vanhu.

³³ Na vanhu vavavonaga vajileko, na vingi vavamanikaja na ku makaya gose vapelelagako hamohene na vavatongelaga kufikako.

³⁴ Na aho wafumaga wayivonaga mbuto nhanya ya vanhu, na wasativagwa lusungu kuwavo, kunguno vavagi kitisi ngʼholo zikavile na mudimi, na wavukizaja kuvahembeka mingi.

³⁵ Na limi lya mhindi vahemba vakwe vamwegelaga,

³⁶ vuyomba, Henaha ibalangu na limi lililoka, uvadahye, kigele vaje mu makaya na tukaya twa kumhelo vakigulile venekili chakulya.

³⁷ Alisi uyu witavukaga na wavawilaga, Inwe muvape chakulya. Navo valimuwila, Kinahe, tuje tugule mikate ku denari magana

³⁸ avili, na tuvape chakulya? Nawe wayombaga, Mikate zinga muli nazyo, muje mukalole. Na aho vamalaga

³⁹ kulola, valiyomba, Itano na masomba avili. Na wavalagilaga vavikazye vose hasi mavanza mavanza ha maswa madoto.

⁴⁰ Na vikalaga misululu misululu igana na kusika makumi atano.

⁴¹ Na uyu wazisolaga mikate itano na masomba avili, walangamilaga kwilunde, wazidosaja luvango, wazimegulaga mikate na wavapaga vahemba vakwe, vavoneche; na aga masomba avili wavagavanaja vose.

⁴² Na vose valyaga na vigutaga,

⁴³ na vagasolelaga matonge gokalaga matala ikumi na avili na tumanda twa masomba.

⁴⁴ Na avo valyaga mikate vavagi vagosya fihumbi fitano.

⁴⁵ Na itungo lili wavakungilizaja vahemba vakwe kwingila mu wato, vatongele kumwambu ku Betsaida aho aliyidahya mbuto ya vanhu.

⁴⁶ Na aho wamalaga kuvadahya wajaga ku lugulu kukalomba.

⁴⁷ Na aho limi lyamalaga kuloka, wato wavagi hagati na nyanza, na uyu wavagi inene hanguka.

⁴⁸ Na aho wavonaga kitisi vadukaga mu kuvuka, kwisi muyaga gwavagi gufumile uko vajile, wizaga kuwavo ha zamu ya vunne ya vuziku alisimiza kitisi alikova kuvavitila.

⁴⁹ Aho vamuvonaga alisimiza kwigulya na nyanza viganikaga ali muzimu, na valilaga muno, kwisi vose vamuvonaga na vakangagwa.

⁵⁰ Alisi itungo lili wavayombaja, uvawila, Idibagi moyo,

⁵¹ honene mwene. mukogohe ngʼo! Na wingilaga kuwavo mu wato, na muyaga gwadekanaga,

⁵² na vagengemalaga vuliko; kwisi vavagi vakagumanikizye muhayo kunguno ya mikate, kwisi myoyo yavo yavagi milambu.

⁵³ Na aho vamalaga kwambuka hanguka vafikaga mu Genesareti na vatungaga wato.

⁵⁴ Na aho vafumaga mu wato, itungo lili vanhu vamumanikaja na vamupelelaga hose mwigunguli lyenilo,

⁵⁵ na vavukizaja kuvafila kuwakwe ku mavulili avo vasatu kwenuko vigagwa aliko.

⁵⁶ Na kose uko wingilaga mu tukaya ninga makaya ninga mwihala, vavatulaga valwile mu magulilo na vamulombaga valikumye ibomho lya mwenda gwakwe duhu, na vose hovene valikumaja vapizivagwa.