Marko 5 - Nyamwezi New Testament 1951

¹ Na vafikaga kumwambu na nyanza mu chalo cha Vageraseni.

² Na aho wafumaga mu wato wasangaja nawe munhu umo afumile ku fivimbi, munhu wa mugavo gwa zoma;

³ mwenuyu wikalo wakwe wavagi ku fivimbi, na kuduhu munhu wakovolaga kumutunga ninga na minyololo, kwisi kingi watungagwe na mpingo

⁴ na minyololo, na minyololo yatinagulilwe na mpingo zyavinzagulilwe nawe, na kuduhu munhu ninga umo wakovolaga kumukinda.

⁵ Na hanahana, vuziku na

⁶ limi, wavage ku fivimbi na ku malugulu, alilila na aliwikwanagula na mawe.

⁷ Na aho wamuvonaga Yesu kufuma kule, wamupelelaga na wamusukambilaga na

⁸ walilaga na kilaka kihanya, Ulikovaki hawane? Ndikulahizya hamwa Mulungu, ukanduche ngʼo. Kwisi waguwilaga, Veve mugavo gwa zoma, umufume munhu mwenuyu.

⁹ Na waguvuzaja, Lina lyako nani? Na gwamuwilaga, Lina lyane Ligioni, kwisi iswe tuli vingi.

¹⁰ Na gwamwigongelaga kingi, akazitumizye ngʼo hanze na nsi yeniyi.

¹¹ Alisi lyavagiko ku lugulu idale ihanya

¹² lya nguluve, zilidima. Na zyamwigongelaga, zyuhaya, Ututumizye mu nguluve, twingile muzyo. Na wazipaga luhusa.

¹³ Na migavo zya zoma zyafumaga na zingilaga mu nguluve, na idale lyatelemukilaga mwiga mugati na nyanza, zyavagi ninga fihumbi fivili, na zyafwilaga mu nyanza.

¹⁴ Na vadimi vazyo vapelaga na vagusambazaja muhayo mu kaya na mwihala; navo vizaga kuvona yeniyi yakwilaga.

¹⁵ Na aho vafikaga kumwa Yesu valimuvona uyo munhu wa migavo ikalile na azwalile myenda na wavagi na masala, uyo homwene

¹⁶ wavage na Ligioni, na vogohaga. Na avo hovene vayivonaga vavapozezaja kitisi yamukwililile munhu wa migavo na kunguno ya nguluve.

¹⁷ Na vavukizaja kumulomba afume mwigunguli lyavo.

¹⁸ Na aho wingilaga mu wato, uyu wavage na migavo wamulombaga luhusa kuja nawe.

¹⁹ Alisi Yesu akazumizye, wamuwila, Uje ku kaya ku vaduguyo na uvapozezaje genaya mahanya Guku wakwitilaga na kitisi wakuvonelaga veve kisa.

²⁰ Na uyu wajaga na wavukizaja kutanizya mu nsi ya Dekapoli genaya mahanya Yesu wamwitilaga, na vose vakumaja.

²¹ Na aho Yesu wavukaga mu wato kumwambu, mbuto nhanya vivilingaga hawakwe, na uyu wavagi ha nyanza.

²² Na wizaga umo wa vanamhala va sinagogo, lina lyakwe Yairo, na aho wamuvonaga wagwaga hasi ha magulu

²³ gakwe, alimwigongela muno, uhaya, Mwana wane mukima ali bihi na kufwa, wize umutulile makono,

²⁴ kigele apile na azuvuke! Na wajaga nawe, na mbuto nhanya ya vanhu vamulondaga na vamufitaga.

²⁵ Na mukima umo homwene wapululukila myaka ikumi na ivili, na wadukaga kingi na vafumu vingi na

²⁶ wamalizaja nsavo zyose zyakwe vuduhu kugwasiwa, sumbwa watomelagwa munogwene, aho wigagwa kunguno yamwa Yesu,

²⁷ wingilaga kunuma mu mbuto ya vanhu na wagukumaja mwenda gwakwe, kwisi wayombaga,

²⁸ Ulu nayikumya myenda yakwe duhu nkupiziwa.

²⁹ Na itungo lili kasela ka magazi gakwe kakamaga na wimanikaja mu muvili gwakwe kitisi wapilile vulema wakwe.

³⁰ Na itungo lili Yesu, wimanikaja muwakwe kitisi nguzu zyamufumaga, wikevelaga mu

³¹ mbuto ya vanhu na wahaya, Nani wayikumaja myenda yane? Vahemba vakwe vamuwilaga, Ulivona vanhu

³² valikufita naʼho uliyomba, Nani wankumaja? Na wapilimaja minso, amuvone uyo homwene witaga yeniyi.

³³ Alisi mukima wogohaga na wadetemaga, kwisi wamanikaja yeniyi yamukwililaga, wizaga na wagwaga hambele nawe na wamuwilaga hanayene yose.

³⁴ Alisi uyu wamuwilaga, Mwana, luhigi lwako lwakupizaja, jaga na kuhola, na vulema wako vukakusyokele ngʼo hangi.

³⁵ Aho atali aliyomba, vamo va munumba ya munamhala wa sinagogo vizaga valiyomba, Mwana wako

³⁶ wafwaga, kuki umuduche hangi muhembeki? Alisi Yesu, homwene wagudegelekaga muhayo ugu gwayombagwa, wamuwilaga munamhala wa sinagogo, Ukogohe ngʼo, usanizye duhu!

³⁷ Na akazumizye ungi amulonde, sumbwa Petro na Yakobo na Yohana, muduguye wamwa Yakobo.

³⁸ Na vafikaga mu numba ya munamhala wa sinagogo, na wigagwa ibubu lya vanhu valilila makungwi munogwene.

³⁹ Na aho wingilaga, uvawila, Kuki mulibubuzya na kulila? Mwana akafwile, sumbwa alalile tulo.

⁴⁰ Na vamusekelaga. Alisi uyu, aho wavafumaja vose hanze, alimusola ise wa mwana na nina na avo vavagi hamohene nawe, na alingila mugati umo wavagimo mwana.

⁴¹ Na wakudimaga kukono kwa mwanike, umuwila, Talitha kumi,

⁴² kitisi: Mwanike, ndikuwila, uhembuke! Na itungo lili mwanike wavukaga na wasimizaga, kwisi wakulile myaka ikumi na ivili. Na vitilulaga na vakumaja munogwene.

⁴³ Na wavalagilaga muno valeke kumupozezya ninga munhu umo ngʼo, na walagilaga apiwe chakulya.