Marko 14 - Nyamwezi New Testament 1951

¹ Alisi zyasigalaga nsiku ivili kusika ha sikukulu ya Pasaka na ya mikate zikatumbile, na vahozya vahanya na vamanicha fitabu vakovaga nzila ya kumudima mu lwiviso na kumuvulaga.

² Kwisi vayombaga, Ngʼo ha sikukulu, kwigela ngʼo vugome vuvuke mugati na vanhu.

³ Na aho wavagi mu Betania mu numba yamwa Simoni wa mbizi, na wikalaga hakulila, wizaga mukima na nsupa ya alabastro yokalile maguta masoga malambu mupango; wayibutaga nhingo ya nsupa ya alabastro na wagapumpumulilaga ku mutwe gwakwe.

⁴ Alisi vavagiho vamo hovene vingʼungʼulaga muwavo

⁵ na vayombaga, Vutagaguzi wa kinahe wa maguta genaya? Kwisi maguta genaya gakovolaga kuguziwa ku madenari magana adatu na kukila, na kupanwa ku

⁶ vapina, na vamuhilimilaga muno. Alisi Yesu wayombaga, Mumuleke, kuki mulimusatya? wanitilaga mulimo musoga.

⁷ Kwisi nsiku zyose muli navo vapina hamohene ninwe, na ulu mulikova mulikovola kuvavezezya tusoga, alisi nene mukavile nane nsiku zyose.

⁸ Uyu wavezaja kitisi wakovolaga; watongelaga kuguvila muvili gwane kunguno ya kuzikwa kwane.

⁹ Loleyene ndimuwila inwe, Kosekose uko Mhola ya Chelu yikutaniziwa mu liwelelo lyose, gakuyombwa na genaya uyu witaga kumwizukila.

¹⁰ Na Yudasi Iskariote, umo wa ikumi na vavili, wajaga ku vahozya vahanya kigele amugambe kuwavo.

¹¹ Na aho vayigagwa vadehaga na vamulaganaja kumupa mapesa; na uyo wakovaga nzila ya kumugamba mwitungo isoga.

¹² Na ha lusiku lwa mbele lwa mikate yikatumbile ha lusiku lwa kuyisika Pasaka, vahemba vakwe vamuwilaga, Kuhe ulikova iswe tuje tukavezelezye, kigele

¹³ ulye Pasaka? Na wavatumizaja vavili va vahemba vakwe, uvawila, Muje mu kaya, na akusanja ninwe

¹⁴ munhu avukizye muzoga gwa minzi, mumulonde, na umo akwingila, mumuwile mwene numba, Muhembeki aliyomba, Kuhe chumba cha kupanga, umo nalye

¹⁵ Pasaka na vahemba vane? Na uyu mwenekili akumolecha chumba kihanya cha higulya chavezelezivilwe

¹⁶ vuliko, na mwenumo mutuvezezye. Na vahemba vajaga na vingilaga mu kaya na vavonaga kitisi wavawilaga, na vavezaja Pasaka.

¹⁷ Na aho limi lyaloka aliza na va ikumi na vavili.

¹⁸ Na aho vikalaga hakulila valilya, Yesu wayombaga, Loleyene ndimuwila inwe, umo mugati ninwe homwene alilya hamohene nane akungamba.

¹⁹ Na vavukizaja

²⁰ kusaya na kumuwila umo na umo, Imba nene? Alisi uyu wavawila, Umo wa va ikumi na vavili uyu alikozya hamohene na nene mu kiseme.

²¹ Mwana wa Mulungu alija nzila yakwe kitisi yatonwa kunguno yakwe, alisi musyolo kwigulya na munhu mwenuyo Mwana wa munhu aligambwa nawe, yilimuvelela uyu ulu mbe akavyalilwe.

²² Na aho valilya wagusolaga mukate, wagudosaja, wagumegulaga na wavapaga vahemba vakwe, uhaya, Solagi ugu guli muvili gwane.

²³ Na wakisolaga kineneko, walumbilaga kalumbilo na wavapaga, na vose vanwelaga cheniki.

²⁴ Na wavawilaga, Aga gali magazi gane ga kuswana kupya, hogene galizwikiwa ku vingi.

²⁵ Loleyene ndimuwila inwe, Nene kunwa ngʼo hangi ku fisumo fya muzabibu kusika lusiku lwenulo nkunwa fipya mu vutemi wa Mulungu.

²⁶ Na aho vamalaga kwimba, vafumaga kuja ku Lugulu lwa Maguta.

²⁷ Na Yesu alivawila, Inwe vose mukugayilizya, kwisi yatonwa, Nkumutulagula mudimi, na ngʼholo zikusambaziwa.

²⁸ Alisi hanuma na kuhembukiwa kwane nkumutongela inwe kuja ku Galilaya.

²⁹ Alisi Petro wamuwilaga, Nulu vose vakugayilizya, alisi nene ngʼo.

³⁰ Na Yesu wamuwila, Loleyene ndikuwila veve ati, lelo vuziku wenuvu hambele ikungulume likuhila kavili, veve ukunikana kadatu.

³¹ Alisi uyu wayombaga muno, Ninga ulu nene nafwe hamohene naʼho, nene kukwikana ngʼo na hado ngʼo. Na sisyo sisyene vose vayombaga.

³² Na valiza henaho halitanwa Getsemane, na alivawila vahemba vakwe, Mwikale henaha kusika namalaga kulomba.

³³ Na alivasola Petro na Yakobo na Yohana hamohene nawe, na wavukizaja kukangwa na kusaya

³⁴ na alivawila, Myuye yane yilikindwa muno na misayo kusika ha kufwa, mwikale henaha na mudile minso.

³⁵ Na wajaga kumbele hado, wagwaga hasi na walombaga, ulu yakovolwa itungo lyenili limwingikile.

³⁶ Na wayombaga, Abba, Vava, gose galikovolwa naʼho; ukinje kineneko iki kuwane, alisi ngʼo genaya nene ndikova, sumbwa genaya veve ulikova.

³⁷ Na wizaga, uvasanga valalile tulo, na alimuwila Petro, Simoni, ulilala tulo?

³⁸ Ukakovolile kudila minso saa yimo? Mudile minso na mulombe, kwigela ngʼo mwingile mu mahumbiko; Roho yilitogwa, alisi muvili gukavile na nguzu.

³⁹ Na wajaga hangi na walombaga, na wayombaga muhayo gwenugu gwene.

⁴⁰ Na wasyokaga hangi, wavasangaga valilala tulo, kwisi minso gavo gatimbaga, na

⁴¹ vakamanikizye cha kumwitavuka, Na wizaga ka vudatu, uvawila, Mulale tulo duhu na mwisuhye, yakwila, itungo lyafika; lolagi, Mwana wa Munhu alifumiwa mu makono ga vakenaguzi.

⁴² Muvuke, tuje, lolagi, mugambi wane wegelaga bihi.

⁴³ Na itungo lyenilo aho wavagi atali aliyomba, Yudasi, umo wa va ikumi na vavili, wizaga, na hamohene nawe mbuto ya vanhu vizanile malupanga na mavuhili, vafumile ku vahozya vahanya na vamanicha fitabu na vanamhala.

⁴⁴ Alisi uyu mugambi wavapaga lumeho, wayombaga, Uyu nkumunonela, sanga homwene, mumudime na mumutongeke na mumulindile sisoga.

⁴⁵ Na aho wizile, itungo lili wamwegela, uhaya, Muhembeki! na wamunonelaga.

⁴⁶ Na avo vagololaga makono gavo kuwakwe na vamudimaga.

⁴⁷ Alisi mugati navo vimile bihi umo walusopolaga lupanga na wamutulaga mukumba wa muhozya muhanya na wamutinaga itwi.

⁴⁸ Alisi Yesu witavukaga, wavawila, Mwafumaga kitisi ha musambo na malupanga na mavuhili kundima nene.

⁴⁹ Nsiku zyose navage hamohene ninwe mwisengelo ndihembeka, na mukandimile, alisi vutone kolaga vufikile.

⁵⁰ Na vose vamulekaga na vapelaga.

⁵¹ Na umo musumba mbati wamulondaga, azwalile mwenda gumo duhu gwa bafuta ku muvili,

⁵² na vamudimaga, alisi nawe wagulekaga mwenda mu makono gavo na wapelaga zule.

⁵³ Na vamutongekaga Yesu ku muhozya muhanya. Na vahozya vahanya na vanamhala na vamanicha fitabu vivilingaga hamohene.

⁵⁴ Na Petro wamulondaga kufuma kule kusika mugati na ngomwa ya muhozya muhanya, na wikalaga hamohene na vatumami aliwotela moto.

⁵⁵ Alisi vahozya vahanya na va ivanza lyose vakovaga vusangilwaho kwigulya na Yesu kigele vamuvulage, alisi vakavuwine.

⁵⁶ Kwisi nulu vingi vasangilagwa cha vulamba kwigulya nawe, alisi mavusangilwaho gavo gakagelanilile.

⁵⁷ Na vamo vavukaga na vasangilagwa cha vulamba kwigulya nawe na vayombaga,

⁵⁸ Twamwigilwe uyu aliyomba, Nkulibomola isengelo lyenili lyazengilwe na makono, na mu nsiku idatu nkulizenga lingi likazengilwe na makono.

⁵⁹ Alisi hangi vusangilwaho wavo wenuvu vukagelanilile.

⁶⁰ Na muhozya muhanya wavukaga, wimaga hagati na wamuvuzaja Yesu, uhaya, Veve ukavile kwitavuka ku

⁶¹ genaya valisangilwaho kwigulya naʼho? Alisi uyu wahulikaga sele na akitavukile muhayo ninga gumo ngʼo. Hangi muhozya muhanya wamuvuzaja, wamuwila, Hoveve uli Kristo, Mwana wa Mulungu, mwene

⁶² lukumo luhanya? Yesu wayombaga, Honene mwene, na mukumuvona Mwana wa Munhu ikalile ha mulila

⁶³ gwa nguzu na izile mu malunde gʼilunde. Alisi muhozya muhanya wayitandulaga myenda yakwe na wayombaga, Tulifunda hangi vasangilwaho vangi?

⁶⁴ Inwe mwigagwa ifusano lyakwe, muliganikaki? Alisi vose vamuyangulaga atemelwe kitanga cha lufu.

⁶⁵ Na vamo vavukizaja kumutugila na kumukumba ku vusyu na kumutula mapi, vumuwila, Ufumbule! Na vanikulu vamwanukulaga na mapi.

⁶⁶ Na aho Petro wavagi ikalile kunsilili mu ngomwa aliza umo wa vatumami vakima va muhozya muhanya,

⁶⁷ na aho wamuvonaga Petro aliwotela, wamulolaga na wayombaga, Veve mwene wavagi hamohene na Yesu Munazareti.

⁶⁸ Alisi uyu wakanaga na wayombaga, Nene nkamanikizye na nkigilwe yeniyi uliyomba. Na wafumaga hanze ha vukumbo, na ikungulume lyahilaga.

⁶⁹ Na aho mukima wamuvonaga wavukizaja hangi kuvawila avo vimile bihi, Uyu ali umo wa venavo. Alisi uyo wakanaga hangi.

⁷⁰ Na hanuma na katungo avo vavagi vimile bihi vamuwilaga Petro hangi, Loleyene, veve uli umo wa venavo, kwisi veve mwene uli Mugalilaya.

⁷¹ Alisi uyo wavukizaja kwilahilizya na mulahi, Nene nkamumanikizye munhu mwenuyu homwene muliyomba.

⁷² Na itungo lili ikungulume lyahilaga ka vuvili. Na Petro wagwizukilaga muhayo ugo Yesu wamuwilaga, Hambele ikungulume likuhila kavili, veve ukunikana kadatu. Na aho wagwizukilaga, walilaga minsozi.