Marko 12 - Nyamwezi New Testament 1951

¹ Munhu walimaga mugunda gwa mizabibu, wagupilimaja na lugutu hose na wasimbaga ituli lya kukamulila, na wazengaga chamba, na wavatulaga valimi mu mugunda, na wajaga ku chalo kingi.

² Na mwitungo lyazyo wamutumizaja mukumba ku valimi, kigele anukule ku valimi ku fisumo fya mugunda.

³ Na vamudimaga, vamutulaga, vamusyokaja vuduhu kinhu.

⁴ Na hangi wamutumizaja mukumba ungi kuwavo, na vamutulaga uyo ku mutwe na vamuvengelezaja.

⁵ Na wamutumizaja na ungi, na uyo vamuvulagaga; na vangi vingi, vamo vavatulaga na vangi vavavulagaga.

⁶ Hangi wavagi na mwana umo, mutoneke, hamhelo wamutumizaja mwenuyu kuwavo na wayombaga, Vakumogoha mwana wane.

⁷ Alisi avo valimi vayombaga, Uyu ali musaliki;

⁸ kako tumuvulage, na isalo lilave liswe. Na vamudimaga na vamuvulagaga na vamutagilaga hanze na mugunda.

⁹ Mwenekili mugunda akwitaki? Akwiza na

¹⁰ akuvavulaga valimi, na akuvapa vangi mugunda. Ninga mukasomile vutone wenuvu, Iwe holyene vazenguzi valikanaga Lyavile iwe lya hakituli.

¹¹ Genaya gafumile kumwa Guku, Na gali ga kukumya mu minso giswe.

¹² Na vakovaga kumudima, alisi vavogohaga vanhu, kwisi vamanikaja ati wayombaga mukolani ugu kunguno yavo. Na vamulekaga na vafumaga henaho.

¹³ Na vavatumizaja Vafarisayo vamo na Vaherode kuwakwe, kigele vamwitegele mu mihayo.

¹⁴ Na valiza na valimuwila, Muhembeki, tulimanicha ati uli wa lole na ukavile kogoha kunguno ya munhu ninga umo ngʼo, kwisi ukavile kuvulola vusyu wa vanhu, sumbwa ulihembeka nzila ya Mulungu mugati na loleyene. Kinahe, luhusa luliho lwa kumulipa Kesari kodi ninga ngʼo?

¹⁵ Tulipe ninga tuleke kulina? Alisi uyo alivona vugulumi wavo, wavawila, Kuki mulingema? Mundetele denari

¹⁶ yimo, nayivone. Navo valetaga. Na alivawila, Isumbano lyenili lyamwa nani na vutone wenuvu wamwa

¹⁷ nani? Navo vamuwilaga, Lyamwa Kesari. Alisi Yesu wavawilaga, Mumulipe Kesari fyenifyo fyamwa Kesari, na Mulungu fyenifyo fyamwa Mulungu. Na vakumaja kunguno yakwe.

¹⁸ Na Vasadukayo valiza kuwakwe, hovene valiyomba ati kuduhu vuhembuke ku lufu, na vamuvuzaja, vuhaya,

¹⁹ Muhembeki, Mose watutonelaga ati, ulu muduguye wa munhu alifwa na alimuleka mukima vuduhu mwana, haho muduguye amusole mukima na amuvyalile muduguye vana.

²⁰ Vadugu mpungati vavagiho, na wa mbele wamutolaga mukima na wafwaga akavile na vana.

²¹ Na wa vuvili wamusolaga, nawe mwene wafwaga akavile na vana; na wa vudatu sisyo savasava, kusika vose mpungati vavagi vakavile na vana.

²² Hanuma na vose mukima nawe wafwaga.

²³ Mu vuhembuke ku lufu aho valahembuke alave mukima umwa

²⁴ nani? Kwisi vose mpungati vavage vamutolile. Yesu wavawilaga, Kinahe, nguno ya kwipuvya kwinwe yikavile iyi ati mukavumanikizye vutone ninga ngʼo nguzu

²⁵ ya Mulungu na? Kwisi aho vakuhembuka ku lufu vakavile kutola ninga kutolwa ngʼo, sumbwa vakuvi kitisi vamalaika mwilunde.

²⁶ Kunguno ya avo vafwa ati vakuhembuka, mukasomile mu kitabu chamwa Mose henaho kunguno yʼisaka, isyo Mulungu wamuwila, Nene ndi Mulungu wamwa Abrahamu na Mulungu

²⁷ wamwa Isaka na Mulungu wamwa Yakobo? Mulungu akavile Mulungu wa vafwile sumbwa wa vazuvuku. Muliwipuvya muno.

²⁸ Na umo wa vamanicha fitabu wegelaga, homwene wavigagwa, valiwiyanilizya, na wavonaga ati witavukaga sisoga, wamuvuzaja, Mukumo ki guli gwa mbele?

²⁹ Yesu witavukaga, Gwa mbele guli ugu, Igagwa Israeli,

³⁰ Guku Mulungu wiswe ali Guku umo inene, na umutogwe Guku Mulungu wako na moyo gose gwako na myuye zyose zyako na ngelo zyose zyako na nguzu zyose zyako.

³¹ Na gwa vuvili guli ugu, Umutogwe muzenganwa wako kitisi uliwitogwa mwenekili; haduhu gungi mukumo muhanya kitisi zyenizi.

³² Na mumanicha fitabu wamuwilaga, Muhembeki, veve wayombaga sisoga mugati na hanayene ati Mulungu umo aliho na kuduhu ungi sumbwa mwenuyu.

³³ Na kumutogwa uyu na moyo gose na ngelo zyose na nguzu zyose na kumutogwa muzenganwa kitisi kwitogwa mwenekili, kulivela kukila fitambo fya kutwima na fitambo fingi.

³⁴ Na aho Yesu wavonaga ati witavukaga na ngelo wamuwilaga, Veve ukavile kule ha vutemi wa Mulungu.

³⁵ Na aho Yesu wavagi alihembeka mwisengelo wavuzaja, Lumehoki vamanicha fitabu valiyomba ati,

³⁶ Kristo ali mwana wamwa Davidi? Davidi mwenekili wayombaga mu Roho Nsondo, Guku wamuwilaga Guku wane, Wikale ha mulila gwane kusika ndivatula Vanisi vako hansilili na magulu gako.

³⁷ Davidi mwenekili alimwitana uyu Guku, lumehoki hangi wavagi mwana wakwe? Na mbuto ya vanhu vamwigagwa na kudeha.

³⁸ Na mu vuhembeki wakwe wayombaga, Mwikomaje hambele na vamanicha fitabu hovene valitamanilwa kuyumbayumba na nhanzo ndihu na kugisiwa mu

³⁹ magulilo, na kwikala mu masumbi ga kumbele mu masinagogo na mu mavanza ga mbele ha mayeye ga

⁴⁰ vugeni, hovene vakuzilyaga numba zya vasimbe na mu vugulumi vakulombaga itungo ihanya; ava vakupiwa vuyanguzi vuvi munogwene. Na aho wikalaga ha welekela wa isanduku lya mapesa wilolelaga isyo vanhu valitulamo mapesa.

⁴¹ Vasavi vingi vatulaga mingi.

⁴² Na wizaga musimbe mupina umo na watulagamo tusenti tuvili, kitisi ipesa limo.

⁴³ Na wavitanaga vahemba vakwe, uvawila, Loleyene ndimuwila inwe, musimbe mpina uyu wagatulagamo mingi kukila vose hovene vagatulaga mwisanduku,

⁴⁴ kwisi vose vatulaga ku vusavi vuhanya wavo, alisi uyu watulaga ku vupina wakwe gose genayo wavagi nago, hogene gafundagwa nawe munogwene.