Marko 1 - Nyamwezi New Testament 1951

¹ Mbuki ya Mhola ya Chelu yamwa Yesu Kristo,

² kitisi yatonilwe na mufumbuzi Yesaya, Lolaga, nene ndimutumizya mutumwa wane hambele naʼho, Homwene akuyigelanizya nzila yako.

³ Muzwi gwa umo alihamuka mwibalangu, Muyivezelezye nzila yamwa Guku, Mutugelanizye tufufuyila twakwe.

⁴ Yohana wigelaga mwibalangu alitanizya kogiwa kwa kupiluka moyo kwa kutondolwa mavukenaguzi.

⁵ Na vizaga kuwakwe vose va nsi ya Uyahudi na vana Yerusalema vose, na vogivagwa nawe mu mongo Yordani, aho valigazumilizya mavukenaguzi gavo.

⁶ Na Yohana wavage azwalile mwenda gwa vuyenze wa twangavulende na musipi gwa ndili mu mukimbili gwakwe, na walyage nzige na vuki wa mwipolu.

⁷ Na watanizaja, uhaya, Aliza hanuma nane homwene ali muhanya kukila nene, nkasikile isima kukundama kumutungula mikova ya filatu fyakwe.

⁸ Nene namogaja inwe na minzi, alisi uyo akumoja inwe na Roho Nsondo.

⁹ Na yakwilaga mu nsiku zyenizyo Yesu wafumaga ku Nazareti ya Galilaya na wogivagwa na Yohana mu Yordani.

¹⁰ Na itungo lyenilo wafumaga mu minzi wavonaga ilunde lilitanduka, na Roho wikaga kwigulya

¹¹ nawe kitisi nhunda yilimudemela, na muzwi kufuma kwilunde gulihaya, Hoveve uli Mwana wane, Mutoneke, nene ndikudehela.

¹² Na itungo lyenilo Roho wamutongekega mwibalangu;

¹³ na wavagi mwibalangu nsiku makumi anne na wagemagwa na Shetani; na wavagi hamohene na manwele, na vamalaika vamuvonekaja.

¹⁴ Hanuma na kutungwa kwamwa Yohana, Yesu wizaga mu Galilaya na wayitanizaja Mhola ya Chelu ya

¹⁵ Mulungu, uhaya, Itungo lyafikile na vutemi wa Mulungu wegelile bihi; mupiluke moyo na muyisanizye Mhola ya Chelu.

¹⁶ Na aho wayumbayumbaga ha nguka ya nyanza ya Galilaya, wavavonaga Simoni na Andrea, muduguye, vavagi valigaponezya mavukila mu nyanza, kwisi vavage valovi.

¹⁷ Na Yesu wavawila, Mundonde, nane nkumuvezya inwe kuvi valova vanhu.

¹⁸ Na itungo lili vagalekaga mavukila na vamulondaga.

¹⁹ Na aho watongelaga kumbele hado, wamuvonaga Yakobo, mwana Zebedayo, na Yohana, muduguye, hovene vavagimo

²⁰ mu wato, vavagi valigasumilizya mavukila. Na itungo lili wavitanaga, navo vamulekaga nsavo Zebedayo mu wato hamohene na vatumami, na vamulondaga.

²¹ Na vingilaga mu Kapernaumu na ha lusiku lwa sabato wahembekaga mu sinagogo.

²² Na vakumaja kunguno ya vuhembeki wakwe, kwisi wavahembekaga kitisi umo wa vukovozi na ngʼo kitisi vamanicha fitabu.

²³ Na itungo lyenilo wavagi mu sinagogo yavo munhu wa

²⁴ mugavo gwa zoma wahamukaga, uhaya, Tuli na muhayo ki naʼho, Yesu wa Nazareti? Veve wizaga kutuzimizya; tulikumanicha, Veve Musondo wa Mulungu.

²⁵ Na Yesu wagudakilaga, uhaya, Hulikaga na umufume.

²⁶ Na mugavo gwa zoma gwamusulungutaja, gwalilaga na kilaka na gwamufumaga.

²⁷ Na vose vakumaja na vagengemalaga na vayombaga, Muhayo ki gwenugu? Vuhembeki vupya wa vukovozi? Kwisi aliyilagila

²⁸ migavo ya zoma nayo yilimudonhoka! Na mhola yakwe yakumukaga itungo lyenilo hosehose mu nsi yose ya Galilaya.

²⁹ Itungo lyenilo aho vafumaga mu sinagogo vafikaga mu numba yamwa Simoni na Andrea hamohene na Yakobo na Yohana.

³⁰ Alisi nina vukwi wamwa Simoni wavagi alalile, alwalile homa, na itungo lili vamupozezaja.

³¹ Na wegelaga, wamudimaga kukono kwakwe, wamwikazaja, na homa yamulekulaga, nawe wavavonekaja.

³² Alisi hamhindi aho limi lyalokaga vamuletelaga

³³ vasatu vose na vanhu va migavo, na va mukaya vose vavagi vivilingile ha muzigo.

³⁴ Na wavapizaja vingi hovene valwalaga mavulwile mitindo na mitindo, na wayifumaja migavo mingi na akazumizye migavo yiyombe, kunguno yamumanikaja.

³⁵ Na hʼikingilima muno wavukaga, wafumaga na wajaga uko kuduhu vanhu, na kwenuko walombaga.

³⁶ Na Simoni na avo vavagi nawe vamulondezaja, na aho

³⁷ vamuvonaga vamuwilaga, Vose valikukova. Nawe

³⁸ wavawilaga, Tuje kungi ku makaya ga bihi, kigele kwenuko kwene nayitanizye Mhola, kwisi kunguno yeniyi nizile.

³⁹ Na wajaga, wayitanizaja Mhola mu masinagogo gavo mu nsi yose ya Galilaya, na wayifumaja migavo.

⁴⁰ Na wizaga kuwakwe wa mbizi, alimwigongela, alimusukambila, alimuwila, Ulu ulikova, veve ulikovola kumpizya.

⁴¹ Na wasativagwa lusungu kuwakwe, wagololaga kukono kwakwe na wamukumaja, uhaya, Ndikova, upile.

⁴² Na itungo lili mbizi zyafumaga kuwakwe na wapilaga.

⁴³ Na wamuhilimilaga na nguzu, wamufumaja itungo lili hibala na wamuwilaga,

⁴⁴ Ulole, ukamuwile ngʼo ungi, sumbwa uje ukiyoleche ku muhozya na kunguno ya kupiziwa kwako ufile mhezi yeniyo yalagilagwa na Mose,

⁴⁵ yive vusangilwaho kuwavo. Alisi uyu wafumaga, wagukumukaja muhayo ugo hose, syenisyo Yesu wavagi akakovolile kwingila mu kaya hangi hawelekela, alisi wavagi hanze uko kuduhu vanhu, na vizaga kuwakwe kufuma kosekose.