Lukasi 6 - Nyamwezi New Testament 1951

¹ Na yakwilaga ha lusiku lwa sabato wavitaga mi migunda na vahemba vakwe vagakololaga mangala na vagayugaga na makono gavo na valyaga.

² Alisi vamo va Vafarisayo vayombaga, Kuki mulita genaya galamwiko kuvezya ha lusiku lwa sabato?

³ Na Yesu wavi tavukaga, wavawila, Mukasomile genaya Davidi witaga

⁴ aho wavagi na nzala, na viye? Kitisi wingilaga mi numba ya Mulungu, na wayisolaga mikate yatulilwe kumwa Mulungu,

⁵ na wayilyaga na wavapaga viye hoyene yikalagililwe kuyilya sumbwa vahozya duhu Na wavawilaga ati Mwana wa Munhu ali Guku kwigulya na sabato yene.

⁶ Na yakwilaga ha sabato yingi wingilaga mu sinagogo na wahembekaga.

⁷ Na wavagiho munhu wagwa ku kono kwa mulila. Na vamanicha fitabu na Vafarisayo vamwilolelaga kuvona ulu akupizya ha sabato, kigele vaguvone muhayo gwa kumuvula.

⁸ Alisi uyu wagama nikaja miganiko gavo, wamuwilaga wagwa kukono Uvuke na wime hagati. Nawe wavukaga na wimaga

⁹ Na Yesu wavawilaga, Ndimuvuzya, Guli mwiko ha sabato kuvezya kasoga, ninga kavi, kupizya myuye

¹⁰ ninga kuzizimizya? Na aho wavilolelaga vose ma lwande gose, wamuwilaga, Ugolole kukono kwako Nawe witaga sisyo, na kukono kwakwe kwapilaga

¹¹ Na vingilagwa na kiniga, vitozaja hamohene, vamu vezyeki Yesu.

¹² Na yakwilaga mu nsiku zyenizyo wafumaga na wajaga ku lugulu kulomba, na wakeyulaga vuziku pe mugati na kumulomba Mulungu.

¹³ Aho wangalukaga wavitanaga vahemba vakwe, na mugati navo wavasogolaga ikumi na vavili, hovene wavitanaga Vatume

¹⁴ Simoni, na lina lingi Petro, na Andrea muduguye

¹⁵ Yakobo na Yohana, Filipo na Bartolomayo, Mateo na Toma, Yakobo mwana Alfayo na Simoni uyo alitanwa

¹⁶ Zelote, Yudasi mwana Yakobo, na Yudasi Iskarite homwene wamugambaga.

¹⁷ Na watelemukaga hamohene navo, na wimaga ha vutyatya hamohene na vingi va vahemba vakwe na mbuto ya vanhu vingi, hovene vafumile ku Uyahudi na Yerusalema na nguka ya Tiro

¹⁸ na Sidoni, hovene vizaga kumudegeleka na kupiziwa mavulwile gavo, na venavo vadukivagwa na migavo zya zoma vapizivagwa.

¹⁹ Na va mbuto yose vakovaga kumukumya, kunguno nguzu yafumaga kuwakwe na yavapizaja vose.

²⁰ Na wavasanulilaga minso vahemba vakwe, wahaya, Mwelukilwa inwe vapina, kwisi vutemi wa Mulungu vuliho kuwinwe.

²¹ Mwelukilwa inwe mulikolwa nzala, kwisi mukwiguta. Mwelukilwa inwe muli na kililo lelo, kwisi mukuseka.

²² Mwelukilwa inwe ulu vanhu vakumugaya na kumufumya na kumufusa na kulikana lina

²³ linwe kitisi ivi, kunguno ya Mwana wa Munhu. Mudehe lusiku lwenulo na mugiye, kwisi lolagi, vusyokeziwa winwe vuli vuhanya mwilunde, kwisi sisyo sisyene vansavo vavitilaga vafumbuzi.

²⁴ Alisi musyolo kuwinwe vasavi, kwisi mwamalile kupiwa ihulicho linwe.

²⁵ Musyolo kuwinwe hovene muliguta lelo, kwisi mukukolwa nzala. Musyolo kuwinwe muliseka lelo, kwisi mukusaya na kulila.

²⁶ Musyolo kuwinwe ulu vanhu vose valimukumilizya inwe, kwisi sisyo sisyene vansavo vavitilaga vafumbuzi va vulamba.

²⁷ Alisi ndimuwila inwe hovene muligwa, Muvatogwe vanisi vinwe, muvitile tusoga hovene valimugaya inwe;

²⁸ muvadosye hovene valimusemelela inwe; muvalombele hovene valimuleva inwe.

²⁹ Homwene alikutula kwitama limo umugalulile na liye; na homwene alikupuzya

³⁰ mwenda gwako, uleke kumuhangilizya na nhanzo. Na homwene alikulomba umupage; na homwene alikupuzya chako,

³¹ uleke kukova akisyoche. Na kitisi mulikova vanhu vamwitile inwe, sisyo sisyene muvitile venavo.

³² Ulu mulivatogwa venavo valimutogwa inwe, kisa kinwe kili kuhe? Kwisi vakenaguzi vene valivatogwa venavo valivatogwa.

³³ Ulu mulivitila tusoga venavo valimwitila inwe tusoga, kisa kinwe kili kuhe? Kwisi vakenaguzi vene valita sisyo.

³⁴ Na ulu mulivagopisya venavo mulisigizya kupiwa hangi kuwavo, kisa kinwe kili kuhe? Kwisi vakenaguzi valivagopisya

³⁵ vakenaguzi, kigele vapiwe genaya gene hangi. Alisi muvatogwe vanisi vinwe, na mwite tusoga na kugopisya vuduhu kwisigizya kusyokeziwa hangi, na vusyokeziwa winwe vukuvi vuhanya, na mukuvi vana va Mwenuyo ali kwigulya, kwisi uyo alivitila tusoga venavo vakavile na kalumbilo na vavi.

³⁶ Muve na kigongo kitisi Vava winwe ali na kigongo.

³⁷ Mukayangule ngʼo, na inwe kuyangulwa ngʼo; na mukataganizye ngʼo mu kitanga, na inwe kutaganiziwa ngʼo mu kitanga.

³⁸ Mutondole, na inwe mukutondolwa. Mupane, na inwe mukupiwa, ngelo yokalile na yakindagililwe na kusugusiwa na kuseseka vakumupa inwe mwitango linwe; kwisi na ngelo yeniyi muligeleka, inwe vene mukugelekelwa hangi.

³⁹ Alisi wavawilaga mukolani, Muhofu alikovola kumutonga muhofu mwiye? Kinahe, venava vavili kugwila ngʼo mwikandilo?

⁴⁰ Muhemba akavile muhanya kukila ise vuhemba, alisi homwene alimala kuhembekwa akuvi kitisi muhembeki wakwe.

⁴¹ Kuki ulikavona kapalala mu linso lya muduguyo, alisi ukaguwine

⁴² mugamba mu linso lyako? Lumehoki ulikovola kumuwila muduguyo, Mudugu, leka nakinje kapalala mu linso lyako, alisi ukaguwine mugamba mu linso lyako. Mugulumi! Ugwinje hambele mugamba mu linso lyako, na haho ukuvona sisoga kukinja kapalala mu linso lya muduguyo.

⁴³ Kuduhu muti musoga gulifyambya fisumo fivi, ninga muti muvi kufyambya ngʼo

⁴⁴ fisumo fisoga, kwisi kila muti gulimanikiziwa ha fisumo fyago; kwisi vakavile kuyava nkuyu ku vulula, ninga

⁴⁵ ngʼo matunda ku mavutundulu. Munhu musoga alifumya tusoga ku mbiko yakwe nsoga ya moyo, na muvi alifumya tuvi ku mbiko yakwe mbi, kwisi mulomo gwakwe guliyomba ku genaya galigokazya moyo.

⁴⁶ Kuki mulinitana nene Guku, Guku, na inwe mukavile kwita genaya ndiyomba?

⁴⁷ Homwene aliza kuwane na aliyigwa na kuyilindila mihayo yane, nkumolecha inwe mwenuyo alimwikola.

⁴⁸ Alimwikola munhu homwene wayizengaga numba na wayisimbilaga hasi na wagutulaga musingi gwayo kwigulya nʼitale; na aho likamilamasenga lizaga mongo gwayipamaga numba yeniyo na gukakovolile kuyitinginya, kunguno yavagi yizengilwe sisoga.

⁴⁹ Alisi homwene aliyigwa vuduhu kwita, alimwikola munhu homwene wayizengaga numba hʼisenga vuduhu kuyisimbila hasi, na mongo gwayipamaga na itungo lili yagwaga, na vugwe wayo wavagi vuhanya.