Lukasi 4 - Nyamwezi New Testament 1951

¹ Na Yesu okalile na Roho Nsondo, wasyokaga kufuma ku Yordani na watongagwa na Roho kwibalangu nsiku makumi anne agemwe na Shetani.

² Na akalile kinhu mu nsiku zyenizyo, na aho zyamalaga wavonaga nzala.

³ Na Shetani wamuwilaga, Ulu veve uli Mwana

⁴ wa Mulungu, uliwile iwe lyenili live mukate. Na Yesu wamwitavukaga, Yitonilwe, Munhu akavile kuzuvuka ku mukate duhu, sumbwa ku mihayo yose ya Mulungu.

⁵ Na Shetani wamulinaja ku lugulu na mu katungo kado wamolekaja mavutemi gose ga liwelelo, na wamuwilaga,

⁶ Nene nkukupa veve vukovozi wenuvu vose na lukumo lwavo, kwisi watavulilwe kuwane, na ndimupa umo wenuvu kitisi nditogwa.

⁷ Ulu ukunkuvila, gose genaya gakuvi gako.

⁸ Na Yesu witavukaga na wamuwila, Yitonilwe, Umukuvile Guku Mulungu wako, na umutumamile mwenuyu inene.

⁹ Na wamutongekaga ku Yerusalema na wamwimikaga

¹⁰ ku kansonge kʼisengelo na wamuwila, Ulu veve uli Mwana wa Mulungu, witikile hasi, kwisi yitonilwe Akuvalagila vamalaika vakwe kunguno yako,

¹¹ Vakulindile na vakuvuche mu makono gavo, Kwigela ngʼo wikumpe kugulu kwako hʼiwe.

¹² Na Yesu witavukaga, wamuwila, Yiyombilwe, Uleke kumugema Guku Mulungu wako.

¹³ Na aho Shetani wamalaga magemelo gose, wafumaga kuwakwe mbela.

¹⁴ Na Yesu wasyokaga ku Galilaya mu nguzu ya Roho, na vukumuku wakwe wasambalaga mwigunguli lyose.

¹⁵ Nawe wahembekaga mu masinagogo gavo na wakumukivagwa na vose.

¹⁶ Na wafikaga ku Nazareti uko walelelagwa, na wingilaga ha lusiku lwa sabato ha kitilwe chakwe mu sinagogo, wavukaga asome.

¹⁷ Na chapanagwa kuwakwe kitabu cha mufumbuzi Yesaya, na aho wakikundukulaga kitabu wahavonaga henaho hatonilwe,

¹⁸ Roho yamwa Guku yiliho kwigulya na nene, Kunguno wambwilaga nene kuvatanizya vapina Mhola ya Chelu; Wantumizaja kuvatanizya vatungwa ha kutungulwa kwavo, Na vahofu vavone hangi, Vakomolwe avo vadukivilwe,

¹⁹ Na kutanizya mwaka Guku wagudehelile na kisa.

²⁰ Na aho wakikundikilaga kitabu wamusyokezaja musimamizi, wikalaga, na vose mu sinagogo vamugomaga minso.

²¹ Na wavukizaja kuvawila, Lelo vutone wenuvu vufikilile mu matwi ginwe.

²² Na vose vasangilagwa kuwakwe na vakumaja kunguno ya mihayo ya vusoso hoyene yafumaga ku mulomo gwakwe, na vayombaga,

²³ Mwenuyu akavile mwana wamwa Yosefu? Na wavawilaga, Loleyene, mukumbwila mugelegenzo gwenugu, Mufumu, wipizye veve mwenekili. Gose genaya twigagwa kitisi gakwilaga mu Kapernaumu, ugite na henaha mu kaya yako mwenekili.

²⁴ Alisi wayombaga, Loleyene, ndimuwila inwe ati kuduhu mufumbuzi alidehelwa mu kaya yakwe mwenekili.

²⁵ Yalole ndimuwila inwe ati, vasimbe vakima vingi vavagiho mugati nʼIsraeli mu nsiku zyamwa Elia, aho ilunde lyalugalilwe myaka idatu na myezi mkaga na nzala nhanya

²⁶ yavagiko ku nsi yose, alisi akatumizivilwe ku ungi sumbwa ku musimbe mukima mu Sarepta mu nsi ya Sidoni.

²⁷ Va mbizi vingi vavagiko mugati nʼIsraeli mwitungo lya mufumbuzi Elisa, na kuduhu ungi wa venava wapizivilwe, sumbwa Naemani wa Siria duhu.

²⁸ Na aho vayigagwa yeniyi, vose mu sinagogo vokalaga

²⁹ na kisila, vavukaga na vamupezezaja hanze na kaya, na vamutongekaga kusika nyombe ya lugulu kwigulya nalo kaya yavo yazengilwe, kigele vamusindikilemo.

³⁰ Alisi uyu wavitaga hagati navo na wajaga.

³¹ Na watelemukaga kusika ku Kapernaumu, kaya yimo ya Galilaya, na wavagi alivahembeka ha lusiku

³² lwa sabato; na vakumaja muno kunguno ya vuhembeki wakwe, kunguno mihayo yakwe yavagi na vukovozi.

³³ Na mu sinagogo wavagimo mugosya homwene wavagi na mugavo gwa zoma, na ugu gwalilaga na muzwi,

³⁴ Lekaga, uli na muhayo ki niswe, Yesu wa Nazareti, wizaga kutuzimizya? Ndikumanicha, Veve Musondo wamwa Mulungu.

³⁵ Na Yesu wagudakilaga na wahaya, Hulikaga na umufume. Na mugavo gwamusindikilaga hagati na gwamufumaga vuduhu kumugulazya. Na

³⁶ kukumya kwavadimaga vose, vitozaja hamohene na vayombaga, Muhayo ki gwenugu ati alizilagila migavo zya zoma mu vukovozi na mu nguzu, nazyo zilifuma? Na vukumuku wakwe wasambalaga hosehose mwigunguli lyenilo.

³⁷ Na wafumaga mu sinagogo na wingilaga mu numba yamwa Simoni.

³⁸ Na nina vukwi wamwa Simoni wadimagwa na homa ndaki, na vamulombaga kunguno yakwe.

³⁹ Na wamukundamilaga na wayidakilaga homa, nayo yamulekaga. Na itungo lili wavukaga na wavatumamilaga.

⁴⁰ Na aho limi lyalokaga, vose hovene vavagi na valwile va mitindo na mitindo vavaletaga kuwakwe, nawe wamutulilaga kila umo makono gakwe na wavapizaja.

⁴¹ Na migavo yene yavafumaga vingi, yalilaga na yayombaga, Veve uli Mwana wa Mulungu. Na wayidakilaga yileke kuyomba, kunguno yamanikaja ati ali Kristo.

⁴² Alisi aho wangalukaga wafumaga na wajaga uko kuduhuko vanhu; mbuto ya vanhu vamukovaga, vafikaga kuwakwe na vagemaga kumuhangilizya aleke kufuma kuwavo.

⁴³ Alisi wavawilaga, Yandima kutanizya Mhola ya Chelu ya vutemi wa Mulungu.

⁴⁴ Na wayitanizaja mu masinagogo ga Galilaya.