Lukasi 23 - Nyamwezi New Testament 1951

¹ Na mbuto zyose zya vanhu vavukaga na vamutongekaga kumwa Pilato.

² Na vavukizaja kumuvula, vuhaya, Uyu twamuvonaga alivagomesya va chalo kiswe na alivagizya kumulipa Kaisari kodi, na aliyomba ati ali Kristo mutemi.

³ Pilato wamuvuzaja, uhaya, Veve uli mutemi wa Vayahudi? Nawe wamwitavukaga,

⁴ uhaya, Veve uliyomba. Pilato wavawilaga vahozya vahanya na mbuto zya vanhu, Nene nkaguwine musango ha munhu mwenuyu.

⁵ Alisi avo valambaga muno, vuhaya, Alivagomesya va chalo, alihembeka mu nsi yose ya Uyahudi, wavukizaja mu Galilaya kusika henaha.

⁶ Aho Pilato wayigagwa, wavuzaja ulu munhu uyu ali Mugalilaya;

⁷ na aho wigagwa ati ali hansilili na vukovozi wamwa Herode, wamutumizaja kumwa Herode, homwene wavagimo mu Yerusalema mu nsiku zyenizyo.

⁸ Aho Herode wamuvonaga Yesu wadehaga muno, kwisi nsiku ningi wakovaga kumuvona, kunguno wigagwa kunguno yakwe na wisigizaja kuvona mugaka gumo guliveziwa nawe.

⁹ Na wamuvuzaja mihayo mingi, alisi nawe akamwitavukile ninga muhayo gumo

¹⁰ ngʼo. Na vahozya vahanya na vamanicha fitabu vimagaho na vajamaga kumuvula na nguzu.

¹¹ Alisi Herode, hamohene na valugaluga, wamusimangaga na wamufusaga, wamuzwikaga mwenda musoga munogwene na wamusyokaja kumwa Pilato.

¹² Alisi Herode na Pilato vanwanaga lusiku lwenulo, kwisi hambele wanisi wavagimo mugati navo.

¹³ Na Pilato wavitanaga vahozya vahanya na vakovozi

¹⁴ na vanhu, uvawila, Inwe mwandetelaga munhu mwenuyu kitisi umo alivapuvya va chalo, na lolagi, nene namuvuzaja hambele ninwe na nkawine musango ha mwenuyu kunguno yago inwe mwamuvulaga.

¹⁵ Ninga Herode mwene ngʼo, kwisi wamusyokaja kuwiswe, na lolagi, akavezizye kinhu hochene kiligelanila mu kumuvulaga.

^16-18 Sisyo nkumutulagula na nkumulekula. Alisi yamudimaga ha sikukulu kuvatungulila umo. Haho vose swe vahamukaga hamohene, Umwinje uyu, na

¹⁹ ututungulile Baraba, homwene watulagwa mu jela kunguno ya vugome wavukile mu kaya na kunguno ya vuvulagi.

²⁰ Alisi Pilato wakovaga kumutungula Yesu na wayombaga navo hangi.

²¹ Alisi avo valambaga

²² kuhamuka, vuhaya, Umukomele, umukomele! Nawe wavawilaga ka vudatu, Mwenuyu witaga kavi ki? Nkakiwine kinhu hawakwe hochene kiligelanila kumuvulaga; nkumutulagula na nkumutungula.

²³ Alisi avo vamuhomangizaja na kilaka kihanya, vakovaga akomelwe, na ibubu lyavo lyakindaga.

²⁴ Na Pilato wayangulaga ati yikwile kitisi vakovaga.

²⁵ Na wamutungula mwenuyo watulagwa mu jela kunguno ya vugome na vuvulagi, homwene vamukovaga; alisi wamufumaja Yesu ku kikowa chavo.

²⁶ Na aho vamutongekaga, vamudimaga Simoni mbati muna Kirene, homwene wafumaga mwihala, na vamuvagazaja musigiti agusombe hanuma na Yesu.

²⁷ Na mbuto nhanya ya vanhu na vakima vamulondaga, hovene valilaga na vamulililaga.

²⁸ Alisi Yesu wavikevelaga, uhaya, Vanike va Yerusalema, muleke kundilila nene, sumbwa mwililile inwe venekili na vana vinwe.

²⁹ Kwisi lolagi, nsiku zikwiza aho vakuyomba, Velukilwa vagumba na nda hozyene zikavyalile, na mavele hogene

³⁰ gakongʼhizye. Haho vakuvukizya kugawila malugulu,

³¹ Mutugwile iswe, na ku tulugulu, Mutukumbe! Kwisi ulu valita genaya ha muti mudoto, yikukwilaki ha muti mumu?

³² Na vangi vavili vene, vakenaguzi, vatongekagwa hamohene nawe, kigele vavulagwe.

³³ Na aho vafikaga henaho halitanwa hakapanga, vamukomelaga uyu na vakenaguzi, umo ha mulila na mwiye ha lumoso.

³⁴ Na Yesu wayombaga, Vava, uvatondole venava, kwisi vakamanikizye cheniki valita.

³⁵ Na vazigavanaga myenda zyakwe na vesaga kavale kunguno yazyo; na vanhu vimagaho na vilolelaga.

³⁶ Na vahanya vamusyolaga, vuhaya, Vangi wavapizaja, ipizye mwenekili, ulu ali Kristo, Musogolwa wa Mulungu.

³⁷ Na valugaluga vene vamufusaga hovene vizaga na vamuletelaga siki, vuhaya, Ulu veve uli mutemi

³⁸ wa Vayahudi, wipizye mwenekili! Na vutone wene wavagiho kwigulya nawe, MWENUYU ALI MUTEMI WA VAYAHUDI.

³⁹ Na umo wa venava vakenaguzi vasungilwe nawe wamufusaga, Veve ukavile Kristo? Wipizye mwenekili na utupizye niswe!

⁴⁰ Alisi ungi witavukaga, wamudakilaga, uhaya, Veve naʼho ukavile kumogoha Mulungu, kunguno wafikile mu kitanga cheniki savasava?

⁴¹ Na iswe na loleyene, kwisi twapivagwa vusyokeziwa vuligelanila na milimo yiswe, alisi uyo akitile kinhu hochene kikagelanilile.

⁴² Na wayombaga, Yesu, unizukile ulu ukwiza mu vutemi wako.

⁴³ Nawe wamuwilaga, Loleyene, ndikuwila veve, lelo ukuviho hamohene nane mu Paradisi.

⁴⁴ Na itungo lya saa sita hilavulaga nsi yose kusika

⁴⁵ saa kenda, na limi lilavulaga, na mukingo gwʼisengelo gwatandukaga mapande avili.

⁴⁶ Na Yesu wahamukaga na muzwi muhanya, uhaya, Vava, mu makono gako ndilagila myuye yane. Na aho wamalaga kuyomba

⁴⁷ genaya, wadahaja moyo. Alisi aho muteko wavonaga genayo gakwilaga. wamukuzaja Mulungu, uhaya, Loleyene, munhu mwenuyu wavagi mugololoku.

⁴⁸ Na vose venavo hovene vivilingaga hʼilolelo lyenili, aho vagilolelaga genaya gakwilaga, vitulaga ha kikuva na vasyokaga.

⁴⁹ Na avo vamumanikaja vimaga kufuma kule valigilolela hamohene na vakima, hovene vamulondaga kufuma Galilaya.

⁵⁰ Na mugosya mbati, lina lyakwe Yosefu, munamhala wa baraza, munhu musoga na mugololoku, homwene

⁵¹ akayizumizye ndaka na milimo yavo, muna Arimatia, kaya ya Vayahudi, homwene wavulindilaga vutemi wa

⁵² Mulungu, mwenuyu wajaga kumwa Pilato kumulomba muvili gwamwa Yesu.

⁵³ Na wagusungulaga, wagutungaga mu mwenda gwa pe na wagutulaga mu kivimbi chadulilwe mwitale, umo kuduhu munhu atali kulalamo.

⁵⁴ Na lwavagi lusiku lwa kwivezelezya, na sabato yegelaga.

⁵⁵ Alisi vakima avo vafumaga ku Galilaya nawe, valondagako na vavonaga kivimbi na kitisi mulambo gwalalikizivagwa.

⁵⁶ Na vasyokaga kuwavo na vavezaja manukato na mugazu; na ha sabato vikalaga sele kitisi yalagilagwa.