Lukasi 2 - Nyamwezi New Testament 1951

¹ Alisi yakwilaga mu nsiku zyenizyo mukumo gwafumaga kumwa Kaisari Augusto ati vanhu vose va liwelelo vatonwe.

² Kutonwa kwenuku kwavagi kwa mbele mwitungo lyenilo Kurenio wavagi munachalo mu Siria.

³ Na vose vajagako kutonwa, kila umo ku kaya yavo.

⁴ Na Yosefu mwene wafumaga ku Galilaya ku kaya Nazareti kuja ku Uyahudi ku kaya yamwa Davidi, hoyene yilitanwa Betlehemu, kunguno wavagi

⁵ ku numba na kwigongo lyamwa Davidi, kigele atonwe hamohene na Maria, homwene walahagwa nawe, nawe wavagi na mwitungo.

⁶ Na yakwilaga aho vavagi

⁷ kwenuko, itungo lya kuvyala lyafikaga. Na wamuvyalaga mwana wakwe wa mbele, mwana mugosya, wamukumbaga na wamulalikizaja mwipango, kunguno vagayivagwa hakupanga mu numba ya vageni.

⁸ Na mwigunguli lyenili vavagiko vadimi uko ku malale, hovene vavagi valigalindila madale gavo havuziku.

⁹ Na malaika wamwa Guku wavegelaga, na lukumo lwamwa Guku lwelaga kuwavo, na vogohaga munogwene.

¹⁰ Na malaika wavawilaga, Muleke kogoha, kwisi lolagi, ndimuletela inwe mhola nsoga ya kwihalala munogwene,

¹¹ hoyene yikufikako ku vanhu vose, kwisi lelo mu kaya yamwa Davidi mwavyalilagwa

¹² Mupizya, homwene ali Kristo Guku. Na lwenulu luveho lumeho: Mukukavona kana kado kakumbilwe na kalilala mwipango.

¹³ Na itungo lili yavagiho mbuto nhanya ya vʼilunde valimugongola Mulungu, vuhaya,

¹⁴ Lukumo kumwa Mulungu kwigulya, Na kuhola ku liwelelo mugati na vanhu hovene Mulungu alivadehela.

¹⁵ Na yakwilaga aho vamalaika vafumaga kuwavo kusyoka kwilunde, vadimi vayombaga hamohene, Tuje ku Betlehemu tukaguvone muhayo ugu gwakwilaga,

¹⁶ hogwene Guku watutanizaja! Na vizaga wanguwangu na vamuvonaga Maria na Yosefu na kana kalilala mwipango.

¹⁷ Na aho vakavonaga, vagupozaja muhayo hogwene gwayombilwe kuwavo kunguno ya mwana mwenuyu.

¹⁸ Na vose hovene vigagwa, vakumaja kunguno ya genaya gayombilwe kuwavo na vadimi.

¹⁹ Alisi Maria wayidimaga mihayo yeniyi na wayikomekezaja mu moyo gwakwe.

²⁰ Na vadimi vasyokaga na vamukumukaja na vamugongolaga Mulungu kunguno ya gose genaya vagigagwa na vagavonaga, kitisi gayombilwe kuwavo.

²¹ Na aho nsiku mnane zyavitaga vamutahiri, haho witanagwa Yesu, kitisi yakanivagwa na malaika aho atali kusombwa nda.

²² Na aho nsiku zya kwivezelezya kwavo zyamalaga, kitisi yalagilagwa mu ngʼhama yamwa Mose, vamufilaga ku Yerusalema kumolecha hamwa Mulungu,

²³ kitisi yitonilwe mu ngʼhama yamwa Guku ati, kila

²⁴ kagosya ka vuhala kitanwe kasondo hamwa Guku, na hangi kigele vafumye kitambo, kitisi yilagililwe mu ngʼhama yamwa Guku, Mapula avili ninga makune avili ga nhunda.

²⁵ Na lolaga, mu Yerusalema wavagiho munhu umo, lina lyakwe Simeoni, nawe wavagi mugololoku na mufula, wakulindilaga kuhulikiwa kwa Israeli, na Roho Nsondo wavagi hamohene nawe. Na

²⁶ uyu wafumbulilagwa na Roho Nsondo ati kuvona ngʼo lufu kusika wamuvonaga Kristo wamwa Guku.

²⁷ Na wasemezivagwa na Roho, wizaga mwisengelo; na aho vavyazi vamuletaga mwana Yesu, kigele vamuvezye

²⁸ ha kitilwe cha ngʼhama, haho uyo wamwanukulaga mu makono gakwe, wamugongolaga Mulungu, uhaya,

²⁹ Guku, lelo umutavule mu kuhola mukumba wako hanuma na muhayo gwako,

³⁰ Kwisi minso gane gavuvonaga vupizya wako,

³¹ Howene veve wavuvezaja hambele na vusyu wa va machalo gose, Lumole lwa kuvezya vapagani na lukumo lwa va chalo chako Israeli.

³² Na ise na nina vakumaja kunguno ya genaya gayombagwa kunguno yakwe.

³³ Na Simeoni wavadosaja na

³⁴ wamuwilaga Maria, nina wa mwana, Lolaga, uyu watulagwa hakugwila na hakuvukila kwa vingi mugati na

³⁵ Israeli na ha lumeho lwa kwiyanilizya;—na veve mwene lupanga lukuyichima myuye yako—kigele gafumbulwe miganiko ga myoyo mingi.

³⁶ Na wavagiho mufumbuzi mukima, lina lyakwe Anna, wa Fanueli, kwivanza lya Aseri, wakulaga myaka mingi muno, homwene kufuma vuhala wakwe wikalaga

³⁷ na mugosi myaka mpungati, na wavagi musimbe wa myaka makumi mnane na inne. Nawe akafumaga mwisengelo, sumbwa watumamaga halimi na havuziku mugati na kufunga na kulomba.

³⁸ Na mwitungo lyenili wegelaga, wamugongolaga Mulungu, na wayombaga kunguno yakwe ku vose hovene valindilaga vukomolwa wa Yerusalema.

³⁹ Na aho valivamalizaja malagilizyo gose ga ngʼhama yamwa Guku, vasyokaga ku Galilaya ku kaya yavo Nazareti.

⁴⁰ Alisi muyanda wakulaga na wajamaga nguzu, wokalaga na ngelo, na kisa cha Mulungu chavagi kwigulya nawe.

⁴¹ Vavyazi vakwe vajage myaka yose ku Yerusalema ku sikukulu ya Pasaka.

⁴² Na aho wakulaga myaka

⁴³ ikumi nʼivili vajaga ha kitilwe cha sikukulu; na aho vamalizaja nsiku mwitungo lya kusyoka mwana Yesu wadilaga mu Yerusalema, na vavyazi vakwe vavagi Vakamanikizye.

⁴⁴ Alisi viganikaga ati alimo mugati na vakwavi, vajaga lugendo lwa lusiku lumo, vamukovaga mugati na vadugu vavo na vichavo.

⁴⁵ Na aho vakamuwine, vasyokaga hangi ku Yerusalema, valimukova.

⁴⁶ Na yakwilaga hanuma na nsiku idatu vamuvonaga mwisengelo, ikalile hagati na vahembeki alivadegeleka na alivavuzya.

⁴⁷ Alisi vose hovene vamwigagwa vakumaja muno kunguno ya wenge wakwe na kwitavuka kwakwe.

⁴⁸ Na aho vamuvonaga, vakumaja na nina wamuwilaga, Mwana, kuki watwitilaga iswe syenisi? Lolaga, nso na nene twakukovaga veve

⁴⁹ na misayo! Na wavawilaga, Kuki mwankovaga? Mukamanikizye ati yandima nene kuvimo mu genaya

⁵⁰ gamwa Vava wane? Na vavagi vakagumanikizye muhayo ugo wavawilaga.

⁵¹ Na wikaga hamohene navo kusika Nazareti na witunaja mwenekili kuvadonhoka. Na nina wayitulaga mihayo yose mu moyo gwakwe.

⁵² Na Yesu watongelaga mu ngelo na ha musimo na ha kisa hambele na Mulungu na hambele na vanhu.