Lukasi 18 - Nyamwezi New Testament 1951

¹ Na wavawilaga mukolani ati yavadima kulomba

² hanahana vuduhu kuzova, wayombaga, Mu kaya mbati wavagiho muyanguzi homwene akamogohile Mulungu

³ na akamukuzizye ngʼo munhu. Na mukima musimbe wavagimo mu kaya yeniyo na wizaga kuwakwe, uhaya, Umbezezye chane hambele na mukandi wane.

⁴ Alisi wakanaga mbele na mbele; alisi haho wayombaga mu moyo gwakwe, Nulu nkavile kumogoha Mulungu ninga

⁵ kumukuzya ngʼo munhu, alisi kunguno musimbe uyu alinducha nkumuvezezya mwenuyu chakwe, naleke kukoya nawe hanahana.

⁶ Na Guku wayombaga, Degelekagi kitisi muyanguzi mwenuyu wa chaha aliyomba!

⁷ Kinahe, Mulungu akulema kuvavezezya venavo chavo hovene valahilwe nawe, na hovene valimulilila halimi na havuziku, ninga akuvi kitisi mudizu hambele navo? Ndimuwila.

⁸ inwe ati, akwanguha kuvavezezya chavo. Alisi kinahe, ulu Mwana wa Munhu aliza, akulivona isanizyo mu liwelelo?

⁹ Na mukolani gwenugu wavawilaga vamo, hovene visanizaja venekili ati vali vagololoku na vavavengelezaja vangi.

¹⁰ Vanhu vavili valinaga kuja kwisengelo

¹¹ kukalomba, umo Mufarisayo na ungi wʼihongo. Mufarisayo wimaga kumbele na walombaga giki, Mulungu, ndikulumbila kunguno nkavile kitisi vanhu venavo vangi: vasambo, vigomu, vasihya, ninga kitisi wʼihongo mwenuyu.

¹² Ndifunga mu yuma yimo kavili, na ndifumya ifungu lya ikumi ku nsavo zyane zyose.

¹³ Alisi wʼihongo wimaga kule, na akakovolile kulangamila kwilunde, sumbwa witulaga ha kikuva chakwe, uhaya,

¹⁴ Mulungu, umbonele nene mukenaguzi kisa! Ndimuwila inwe, mwenuyu wasyokaga ku numba yakwe wagololilwe kukila mwenuyo, kwisi kila umo aliwikulilizya. mwenekili akudoheleziwa; na homwene aliwidohelezya mwenekili akukuliliziwa.

¹⁵ Na vamuletelaga velele avakumye; alisi aho vahemba vayivonaga yeniyi vavadakilaga.

¹⁶ Na Yesu wavitanaga hawakwe, uhaya, Muvaleke vana vado vizeho hawane na muleke kuvahangilizya, kwisi ku venava vutemi wa Mulungu vuliho.

¹⁷ Loleyene ndimuwila inwe, homwene akavile kuwanukula vutemi wa Mulungu kitisi mwana, mwenuyu kwingilamo ngʼo na hado ngʼo.

¹⁸ Na muhanya umo wamuvuzaja, uhaya, Muhembeki musoga, niteki kigele nasalike vuzuvuku wa hanahana?

¹⁹ Yesu wamuwilaga, Kuki ulinitana nene musoga?

²⁰ Kuduhu musoga sumbwa umo duhu: Mulungu. Mikumo ulizimanicha, Uleke kusihya, uleke kuvulaga, uleke kwiva, uleke kusangilwaho vulamba, umukuzye nso na noko.

²¹ Alisi uyu wayombaga, Gose genaya nagalindilaga vukumbu na vuyanda wane.

²² Aho Yesu wigagwa yeniyi, umuwila, Wasigazaja kinhu kimo, ugaguzye gose ago uli nago na uvagavulile vapina, na ukuvi na nsavo nhanya mwilunde, na wize undonde.

²³ Alisi aho wayigagwa yeniyi, wasayaga munogwene, hwisi wavagi na nsavo ningi.

²⁴ Yesu wamulolaga na wayombaga, Ii, kitimbu ku venavo vali na nsavo

²⁵ kwingila mu vutemi wa Mulungu! Kwisi kili changu munogwene twangavulende yivite mu linso lya lusindano, kukila musavi ingile mu vutemi wa Mulungu.

²⁶ Alisi avo hovene vigagwa vayombaga, Nani haho alikovola kupiziwa?

²⁷ Nawe wayombaga, Icho kili kigaka ha vanhu kilikovolwa na Mulungu.

²⁸ Alisi Petro wamuwilaga, Lolaga, iswe twagalekaga gose giswe na

²⁹ twakulondaga veve! Na uyu wavawilaga, Loleyene ndimuwila inwe, kuduhu umo wayilekile numba, ninga mukima, ninga muduguye, ninga vavyazi vakwe, ninga

³⁰ vana kunguno ya vutemi wa Mulungu, homwene kupiwa ngʼo ka vuyaga mu matungo genaya na mu matungo galakiza vuzuvuku wa hanahana.

³¹ Na wavegezaja hawakwe avo ikumi na vavili na wavawilaga, Lolagi, tulilina kuja ku Yerusalema, na gose gakufikila hogene gatonilwe na vafumbuzi kunguno ya Mwana wa Munhu.

³² Kwisi akupanwa mu makono ga vapagani na akuyeywa na akutulagulwa na akutugilwa mate;

³³ na avo vakumutulagula milanga na vakumuvulaga, na ha lusiku lwa vudatu akuhembuka.

³⁴ Na venava vavagi vakayimanikizye yeniyi ninga hado ngʼo, na muhayo gwenugo gwavagi guvisilwe hambele navo, na vakayimanikizye yeniyo yayombagwa.

³⁵ Na yakwilaga aho wegelaga Yeriko muhofu wavagi alikala ha nzila kwilombelezya.

³⁶ Na aho wigagwa ati

³⁷ vanhu vingi valivita wavuzaja ati yeniyi ki? Navo vamuwilaga ati Yesu wa Nazareti alivitaho.

³⁸ Na uyu wahamukaga, uhaya, Mwana wamwa Davidi, umbonele

³⁹ kisa! Na avo vatongelaga vamudakilaga ahulike sele, alisi nawe walilaga munogwene, Mwana wamwa Davidi,

⁴⁰ umbonele kisa! Na Yesu wimaga na walagilaga atongekwe hawakwe.

⁴¹ Aho wegelaga, wamuvuzaja, Veve

⁴² ulikova nakwitileki? Nawe wayombaga, Guku, navone hangi. Na Yesu wamuwilaga, Uvone hangi! luhigi lwako lwakupizizye.

⁴³ Na itungo lili wavonaga hangi, na wamulondaga alimukumucha Mulungu. Na vanhu vose aho vavivonaga vamugongolaga Mulungu.