Lukasi 16 - Nyamwezi New Testament 1951

¹ Alisi wavawilaga vahemba vakwe, Wavagiho munhu musavi, nawe wavagi na kasika lufungulo, na mwenuyu wavulagwa hambele nawe ati, alizitagagula nsavo zyakwe.

² Na uyu wamwitanaga, umuwila, Muhayo ki gwenugu ndigwa kunguno yako? Ufilete fitabu fya vukasika wako, kwisi ukakovolile hangi kuvi kasika lufungulo.

³ Alisi kasika lufungulo wayombaga mu moyo gwakwe, Niteki, kwisi guku wane alimpuzya vukasika? Nkakovolile kulima, na ndi na nsoni mu kwilombelezya.

⁴ Ndimanicha yeniyi nkwita, kigele vananukule mu manumba gavo, ulu napuzivilwe vukasika.

⁵ Na wavitanaga vatondwa vose vamwa gukuye

⁶ hekeheke, na wamuwilaga wa mbele, Veve ulitondwa zinga kumwa guku wane? Nawe wahaya, Matanaki igana ga maguta. Na uyu wamuwilaga, Solaga cheti

⁷ chako, wikale na utone wangu makumi atano. Haho wamuwilaga ungi, Naʼho veve ulitondwa zinga? nawe wahaya, Ngelo igana zya ngano. Wamuwilaga, Solaga cheti chako utone makumi mnane.

⁸ Na uyo guku wamukumaja kasika lufungulo muyengani ati, witaga kivalaganu, Kwisi vana va liwelelo lyenili vali vavalaganu muno hambele na mugana gwavo kukila vana va lumole.

⁹ Na ndimuwila inwe, Mwivezezaje inwe venekili vanwani mugati na mapesa ga vuyengani, kigele ulu galimala, vamwanukule inwe mu manumba gakavile kusila.

¹⁰ Homwene ali mujamu mugati na kinhu kido, ali mujamu mugati na kinhu kihanya chene; na homwene ali muyengani mugati na kinhu kido, ali muyengani mugati na kinhu kihanya chene.

¹¹ Ulu mukavile vajamu mugati na mapesa ga vuyengani, nani akumupa inwe ga loleyene?

¹² Na ulu mukavile vajamu mugati na kinhu cha vangi, nani akumupa inwe kinhu

¹³ kinwe venekili? Kuduhu mutumami alikovola kuvatumamila vaguku vavili, kwisi ninga akumugaya umo na akumutogwa ungi, ninga akudimana na umo na akumuvengelezya ungi. Mukakovolile kumutumamila Mulungu na Nsavo.

¹⁴ Alisi Vafarisayo, hovene vazitogagwa nsavo, vagigagwa gose genaya na vamufusaga.

¹⁵ Na wavawilaga, Inwe muli venavo valiwigongola venekili hambele na vanhu, alisi Mulungu aliyimanicha myoyo yinwe; kwisi icho kili kikumuku hambele na vanhu kili ivipyo ivi hambele na Mulungu.

¹⁶ Ngʼhama na vafumbuzi zyavagiho kusika hamwa Yohana; na vukumbu nʼitungo lyenilo mhola ya vutemi wa Mulungu yilitaniziwa, na vose valingilamo na nguzu.

¹⁷ Kili changu ilunde na liwelelo gazimanguke kukila kabado ka ngʼhama kazimile.

¹⁸ Homwene alimutavula mukima na alimutola ungi alisihya; na homwene alimutola mukima atavulilwe na mugosi alisihya.

¹⁹ Wavagiho munhu musavi azwalile mwenda musoga gwa za na bafuta, na wikalaga nsiku zyose na lukumo na kudeha munogwene.

²⁰ Na mupina mbati, lina lyakwe Lazaro, atulilwe ha muvita gwakwe, okalile na malonda;

²¹ na watamanilagwa kwiguta na genayo gagwaga ha kulila kwa musavi; na mawa gene gizaga na galambilaga malonda gakwe.

²² Na yakwilaga ati mupina wafwaga na wajanagwa na vamalaika mu matango gamwa Abrahamu; alisi musavi mwene wafwaga na wazikagwa.

²³ Na aho wavagi aliduka ha vafwile walangamilaga na alimuvona Abrahamu kufuma kule na Lazaro ha matango gakwe.

²⁴ Na wahamukaga, uhaya, Vava Abrahamu, umbonele kisa na umutumizye Lazaro akadibye mhelo ya lyala lyakwe mu minzi na alunedeche lulimi lwane, kwisi ndiduka vusatu mu moto gwenugu.

²⁵ Alisi Abrahamu wayombaga, Mwana, wizukile ati veve wapivagwa tusoga twako ha ngelo yako, na Lazaro wapivagwa tuvi, alisi lelo uyo alihulikiwa,

²⁶ naʼho uliduka vusatu. Na kukila genaya, mugati niswe ninwe hasihu hahanya hakindikilwe, sisyo venava valikova kwambuka kufuma henaha kufika kuwinwe vakakovolile, ninga venavo va kwenuko

²⁷ kwambuka ngʼo kufika kuwiswe. Alisi uyu wayombaga, Haho ndikulomba vava, umutumizye ku

²⁸ numba yamwa vava, kwisi ndi navo vadugu vatano, kigele ave musangilwaho kuwavo, kwigela ngʼo venava vene vafike henaha ha mavusatu.

²⁹ Alisi Abrahamu wayombaga, Vali na Mose na vafumbuzi, vavigwe venava.

³⁰ Alisi uyu wayombaga, Byololo, vava Abrahamu, sumbwa ulu umo wa vafwile alija kuwavo, haho vakupiluka moyo.

³¹ Alisi wamuwilaga, Ulu venava vakavile kwigwa Mose na vafumbuzi, haho venava kusanizya ngʼo, ninga ulu umo ahembuke ku vafwile.