Lukasi 10 - Nyamwezi New Testament 1951

¹ Hanuma na genaya Guku wavitanaga vangi makumi mpungati na wavatumizaja vavilivavili, vatongele ku kila kaya na kose uko wakovaga kuja mwenekili.

² Na wavawilaga, Fimbulwa fili fihanya, alisi vatumami vado; kunguno yeniyi mumulombe Guku wa fimbulwa kuvatumizya vatumami mu fimbulwa fyakwe.

³ Jagi, lolagi, ndimutumizya inwe kitisi ngʼholo mugati na mapuge.

⁴ Kuduhu mujane mufuko ninga ngʼo gwa mapesa, ninga ngʼo filatu; kuduhu mumugisye munhu mu nzila.

⁵ Na kila numba umo mulikova kwingila, muyombe hambele, Kuhola kuvemo mu numba yeniyi.

⁶ Na ulu mwana wa kuhola akuvimo, haho kuhola kwinwe kukudila kwigulya nawe; alisi ulu ngʼo, haho kukusyoka hangi kuwinwe.

⁷ Mwikale mu numba yeniyo, mulye na munwe cheniki kilifuma kuwavo, kwisi mutumami ali na chakwe kupiwa musyahala gwakwe. Na muleke kufuma mu numba yimo na kwingila mu yingi.

⁸ Na mu kila kaya umo mulingila na valimwanukula inwe, mulye icho valimuvonecha

⁹ inwe, na muvapizye valwile vali mwenumo na muvawile,

¹⁰ Vutemi wa Mulungu wegelaga kuwinwe. Alisi mu kila kaya umo mulingila na vakavile kumwanukula,

¹¹ mufume ku barabara zyayo na muyombe, Luvuvu lwene lwa mu kaya yinwe lwagagamilaga magulu giswe tulimukunkumulila inwe, alisi mumaniche ati vutemi wa Mulungu wegelagaho.

¹² Ndimuwila inwe ati genayo galayikwilile Sodoma ha lusiku ulo gakuvi mabuhu kukila ago ga kaya yeniyo.

¹³ Musyolo kuwako Korazini, musyolo kuwako Betsaida! kwisi ulu migaka hoyene yitagwa mugati ninwe, mbe yitagwa mu Tiro na Sidoni mbe vapilukaga myoyo kale na kuzwala magunila na kwikala mu mavu.

¹⁴ Alisi ago galagakwilile Tiro na Sidoni ha vuyanguzi galave mabuhu kukila ginwe.

¹⁵ Na veve Kapernaumu, ukavukivilwe kusika mwilunde? Ukukandamiziwa kusika hamizimu.

¹⁶ Homwene alimwigwa inwe alinigwa nene, na homwene alimukana inwe alinkana nene; alisi homwene alinkana nene alimukana uyo wantumizaja.

¹⁷ Na avo makumi mpungati vasyokaga na kudeha, vuhaya, Guku, migavo zyene zilitudonhoka mu lina lyako!

¹⁸ Nawe wavawilaga, Namuvonaga Shetani wagwaga kufuma kwilunde kitisi lukuva.

¹⁹ Lolagi, namupaga vukovozi kutova kwigulya na nzoka na tumina, na nguzu zyose kwigulya na mwanisi, na kuduhu kinhu kikumugulazya inwe.

²⁰ Alisi muleke kudeha kunguno migavo zilimudonhoka inwe, sumbwa mudehe kunguno mina ginwe gatonilwe mwilunde.

²¹ Na mwitungo lyenilo Yesu wihalalaga mu Roho Nsondo, uhaya, Ndikulumbila veve Vava, Guku wʼilunde na liwelelo, kunguno wavavisaga vavalaganu na va ngelo genaya, na wavafumbulilaga velele. Ahene

²² Vava, kwisi hosyene yakutogezaja veve. Na wavikevelaga vahemba vakwe, uhaya, Gose gapanilwe kuwane na Vava; na kuduhu umo alimanicha Mwana ali nani, sumbwa Vava duhu, ninga Vava ali nani, sumbwa Mwana duhu, na homwene Mwana alimufumbulila.

²³ Na kumhelo wavikevelaga vahemba vakwe na wayombaga, Gelukilwa minso genayo galigavona genayo inwe muligavona.

²⁴ Kwisi ndimuwila inwe, vafumbuzi vingi na vatemi vakovaga kugavona genayo muligavona, na vakawine, na kugigwa genayo muligigwa, na vakigilwe.

²⁵ Haho mbati, wamanicha ngʼhama, wavukaga kumugema, uhaya, Muhembeki, niteki nasalike vuzuvuku wa hanahana?

²⁶ Nuyu wamuwilaga, Yitonilweki mu ngʼhama?

²⁷ Ulisomaki? Alisi uyu witavukaga, uhaya Umutogwe Guku Mulungu wako na moyo gose gwako, na myuye zyose zyako, na nguzu zyose zyako, na ngelo zyose zyako, na muzenganwa wako kitisi uliwitogwa mwenekili.

²⁸ Nawe wamuwilaga, Veve witavukaga sisoga,

²⁹ uyite yeniyi na ukuzuvuka. Alisi uyu wakovaga kwigolola mwenekili na wamuwilaga Yesu,

³⁰ Honani ali muzenganwa wane? Yesu witavukaga, uhaya, Munhu mbati wafumaga ku Yerusalema kutelemuka ku Yeriko, na wagwaga mu makono ga vadumuzi, hovene vamuzulaga myenda yakwe na vamutulagulaga, vapelaga na vamulekaga uyu wafwaga kavimba ka mbele.

³¹ Na yakwilaga ati muhozya watelemukaga ku nzila yeniyo, na aho wamuvonaga, wamuvambalaga.

³² Na sisyo savasava Mulefiti wafikaga

³³ henaho, wamuvonaga na wamuvambalaga. Alisi Musamaria mbati homwene wavagi na lugendo wafikaga

³⁴ kuwakwe, wegelagaho, wamutungaga malonda gakwe na waditilagamo maguta na mvinyo, wamulinaja ku mpunda yakwe na wamutongekaga ku numba ya kuzimana na wamulwazaja.

³⁵ Na hawangaluke wafumaja madenari avili, wamupa muzimani, uhaya, Umusunge mwenuyu, na icho ulakifumye veve mwenekili, ndakusyokezye ulu nasyoka.

³⁶ Veve uliganika nani wa venava vadatu wavagi muzenganwa wa mwenuyo

³⁷ wagwaga mu makono ga vadumuzi? Na uyu wahaya, Uyo homwene wamuvonelaga kisa. Yesu wamuwilaga, Uje ukite sisyo savasava.

³⁸ Na yakwilaga aho vayumbayumbaga, uyu wingilaga mu kaya yimo, na mukima mbati, lina lyakwe Marta, wamwanukulaga mu numba yakwe.

³⁹ Na uyu wavagi na muzunaye, lina lyakwe Maria, homwene wikalaga ha magulu gamwa Yesu na wagudegelekaga muhayo gwakwe.

⁴⁰ Alisi Marta wadizivagwa na vuzimani vuhanya, wegelaga, uhaya, Guku, ulizumya muzuna wane andekanizye ninene kukuzimana? Umuwile, angwasye.

⁴¹ Alisi Guku witavukaga, umuwila, Marta, Marta ulisusuma na uli na myanya mingi, alisi kinhu kimo kilifundwa.

⁴² Maria walahaga ifungu isoga holyene kwingiwa ngʼo kuwakwe.