Lukasi 1 - Nyamwezi New Testament 1951

¹ Kunguno vingi vagemaga kutunga mhola ya genaya

² hogene gakwilaga mugati niswe, kitisi venava vatuganikilaga hovene kufuma mbuki vavagi vasangilwaho

³ na vatumami va Muhayo; sisyo napimaga ati sisoga nene mwene, hanuma nagikomizye gose sisoga kufuma

⁴ mbuki, kukutonela veve Teofilo, muhanya, kigele umaniche hanayene ya mihayo iyo wahembekilwe.

⁵ Mu nsiku zyamwa Herode, mutemi wa Uyahudi, wavagiho muhozya, lina lyakwe Zakaria, wʼivanza lyamwa Abia, wavagi na mukima ku vanike vʼigongo

⁶ lyamwa Aroni, lina lyakwe Elizabeti. Na vose vavili vavagi vagololoku hambele na Mulungu, na hovene vasimizage mu mikumo yose na ngʼhama zyose zyamwa Guku vuduhu kimelo.

⁷ Na vavagi vakavile na mwana, kwisi Elizabeti wavagi mugumba, na vose vavili vanamhalukile muno.

⁸ Alisi yakwilaga, aho wavagi alivezya milimo ya vuhozya hambele na Mulungu ha ludima lwʼivanza lyakwe,

⁹ kavale kamugwilaga, ha kitilwe cha vahozya, kuzukizya mugazu na kwingila mwisengelo lyamwa Guku

¹⁰ kuzukizya mugazu; na mbuto yose ya vanhu vavagi valilomba hanze.

¹¹ Alisi malaika wamwa Guku wigelaga kuwakwe,

¹² imile ha mulila gwa hakuhozezya. Na aho Zakaria wamuvonaga, wakangagwa na wogohaga.

¹³ Alisi malaika wamuwilaga, Uleke kogoha, Zakaria, kwisi kulomba kwako kwadegelekagwa; na mukima wako, Elizabeti, akukuvyalila mwana mugosya, na ukumupa lina Yohana.

¹⁴ Na veve ukuvi na kudeha na kwihalala, na vingi vakukudehela kuvyalwa kwakwe.

¹⁵ Kwisi akuvi muhanya hambele na Guku, na uyu kunwa ngʼo mvinyo ninga kinwiwa cha kukolwa, na akokaziwa na Roho Nsondo vukumbu mu nda yamwa nina,

¹⁶ na akuvapilucha vingi va vana vʼIsraeli kumwa Guku

¹⁷ Mulungu wavo, na akutongela hambele nawe mu roho na mu nguzu yamwa Elia kuyipilucha myoyo ya vavava ku vana na vʼivengwe ku ngelo ya vagololoku kumuvezezya Guku vanhu vavezelezivilwe kuwakwe.

¹⁸ Na Zakaria wamuwilaga malaika, Na lumehoki nkugamanicha genaya? kwisi ndi munamhala na mukima wane wagikuluhile.

¹⁹ Na malaika witavukaga na wamuwilaga, Nene ndi Gabrieli, homwene ndimaho hambele na Mulungu, na natumizivilwe kuyomba naʼho na kukupozezya mhola nsoga yeniyi.

²⁰ Na lolaga, veve ukuvi kameme na kukovola nglo kuyomba kusika lusiku lwenulo genaya galikwila, kunguno ukayisanizizye

²¹ mihayo yane, hoyene yilafikile mwitungo lyayo. Na vanhu vamulindilaga Zakaria, na vakumaja kunguno ya kukendela kwakwe mwisengelo.

²² Na aho wafumaga, wavagi akakovolile kuyomba navo, na vamanikaja ati wavuvonaga wigele mwisengelo; na wavapalizaja muno na wadilaga kameme.

²³ Na yakwilaga aho nsiku zya kutumama kwakwe zyamalile, wajaga ku numba yakwe.

²⁴ Alisi hanuma na nsiku zyenizyo mukima wakwe Elizabeti wavagi na mwitungo, na wivisaga myezi

²⁵ itano na wayombaga, Syenisyo Guku wanitilaga mu nsiku zyenizi, wandolaga kuyinja nsoni yane mu vanhu.

²⁶ Alisi mu mwezi gwa mkaga malaika Gabrieli watumizivagwa na Mulungu ku kaya ya mu Galilaya, lina lyayo Nazareti, ku muhala homwene walahagwa na mugosya, lina lyakwe Yosefu, wʼigongo lyamwa Davidi, na lina lya muhala lyavagi Maria.

²⁷ Na malaika wingilaga kuwakwe na wahaya,

²⁸ Wagisiwa, veve wavonelwa kisa, Guku ali hamohene naʼho veve wadosiwa mugati na vakima.

²⁹ Alisi uyu wakangagwa kunguno ya muhayo ugu,

³⁰ na wiganikaga lugisi ki lwenulu. Na malaika wamuwilaga, Uleke kogoha Maria, kwisi wavonaga kisa hambele na Mulungu.

³¹ Na lolaga, veve ukuvi na mwitungo na ukuvyala Mwana, na ukumupa lina Yesu.

³² Akuvi muhanya na akwitanwa Mwana wa Mwenuyu ali kwigulya, na Guku Mulungu akumupa

³³ isumbi lya vutemi lyamwa Davidi, vava wakwe, na akuvi mutemi wʼigongo lyamwa Yakobo kusika hanahana, na vutemi wakwe kuvi na mhelo nglo.

³⁴ Alisi Maria wamuwilaga malaika, Lumehoki cheniki kikukwila kungi ndi musimbe?

³⁵ Na malaika witavukaga na wamuwilaga, Roho Nsondo akwiza kwigulya naʼho, na nguzu zya Mwenuyu ali kwigulya zikukukinganizya veve, kunguno yeniyi cheniki kisondo kikuvyalwa kikwitanwa Mwana wa Mulungu.

³⁶ Na lolaga, muduguyo Elizabeti mwene wavile na mwitungo gwa mwana mugosya mu vugikulu wakwe, na mwezi gwenugu guli gwa mkaga ku mwenuyu homwene witanagwa mugumba;

³⁷ kwisi haduhu muhayo mugaka hambele na Mulungu.

³⁸ Alisi Maria wayombaga, Lolaga nene ndi mukumba wamwa Guku, yinkwilile kitisi veve wayombaga.

³⁹ Alisi Maria wavukaga mu nsiku zyenizyo na wajaga wanguwangu kwigunguli lya malugulu ku kaya ya mu

⁴⁰ Yuda, na wingilaga mu numba yamwa Zakaria na wamugisaja Elizabeti.

⁴¹ Na yakwilaga, aho Elizabeti walwigagwa lugisi lwamwa Maria, kana kadumukaga mu nda yakwe.

⁴² Na Elizabeti wokazivagwa na Roho Nsondo, na wahamukaga na muzwi muhanya, wahaya, Veve wadosiwa luvango mugati na vakima, na chadosiwa luvango kisolo cha nda yako!

⁴³ Na lumehoki yilinkwilila ati nina wamwa Guku wane aliza kuwane?

⁴⁴ Kwisi lolaga, aho muzwi gwa lugisi lwako gwasikaga ha matwi gane, kana kadumukaga mu kwihalala mu nda yane.

⁴⁵ Na welukilwa mwenuyu wasanizaja ati, genaya wawilagwa na Guku gakukwila.

⁴⁶ Na Maria wayombaga, Myuye yane yilimukumucha Guku,

⁴⁷ Na roho yane yilimudehela Mulungu, Mupizya wane; Kwisi wavulolaga vupina wa mukumba wakwe.

⁴⁸ Kwisi lolaga, kufuma lelo va mavuvyalwa gose vakunitana welukilwa;

⁴⁹ Kunguno Mwenekili nguzu wanitilaga muhayo muhanya,

⁵⁰ Na lina lyakwe lili isondo, Na kigongo chakwe kiliho ku mavuvyalwa na mavuvyalwa ku venavo valimogoha.

⁵¹ Wavezaja nguzu ku kukono kwakwe, Wavasambazaja venava vikulilizaja venekili mu miganiko ga myoyo yavo.

⁵² Wavingaja vahanya ku masumbi gavo, Na wavakulilizaja venavo vagwa moyo.

⁵³ Wavigutaja va nzala na tusoga, Na vasavi wavingaja vuduhu kinhu.

⁵⁴ Wamugwasaja mukumba wakwe Israeli mu ukizukila kigongo chakwe,

⁵⁵ Kitisi wavawilage vansiswe Abrahamu na vuvyalwa wakwe kusika hanahana.

⁵⁶ Na Maria wikalaga hamohene nawe myezi idatu; haho wasyokaga hangi ku numba yakwe.

⁵⁷ Alisi itungo lyegelaga kumwa Elizabeti avyale, na wavyalaga mwana mugosya.

⁵⁸ Na aho vazenganwa vakwe na vaduguye vigagwa ati Guku wakivezaja kigongo kihanya kuwakwe, vadehaga hamohene nawe.

⁵⁹ Na yakwilaga ha lusiku lwa mnane vizaga kumutahiri mwana, vamwitanaga, na lina lyamwa ise, Zakaria.

⁶⁰ Na nina witavukaga, uhaya, Byololo, sumbwa akwitanwa Yohana.

⁶¹ Na vamuwilaga, Kuduhu umo mugati na vaduguyo homwene alitanwa na lina lyenili.

⁶² Na vamupalizaja ise, na lina ki alikova itanwe.

⁶³ Nawe walombaga lubavo na watonaga, Yohana lili lina lyakwe.

⁶⁴ Na vose vakumaja. Na itungo lili mulomo gwakwe gwatungukaga, hamohene na lulimi lwakwe, na wayombaga na wamugongolaga Mulungu.

⁶⁵ Na vose hovene vikalaga bihi navo vingilagwa na vova, na mihayo yeniyi yakumukaga mwigunguli lyose lya malugulu ga Uyahudi.

⁶⁶ Na vose hovene vayigagwa, vayikomekezaja mu myoyo na vayombaga, Imba yilave kinahe ku mwana mwenuyu? kwisi kukono kumwa Guku kwavagi hamohene nawe.

⁶⁷ Na ise Zakaria wokazivagwa na Roho Nsondo na wafumbulaga, uhaya,

⁶⁸ Ikuzyo kumwa Guku, Mulungu wʼIsraeli,

⁶⁹ Kunguno wavilolelaga na kisa, na wavakomolaga vanhu vakwe, Na watukindikilaga ipembe lya vupizya mu numba yamwa Davidi,

⁷⁰ Mukumba wakwe, kitisi wayombage vukumbu kale ku milomo ya vafumbuzi vasondo vakwe,

⁷¹ Kutupizya ku vanisi viswe na ku makono ga vose hovene valitugaya,

⁷² Na kuvavezezya kigongo vansiswe na kukwizukila kuswana kwakwe kusondo kwa mulahi,

⁷³ Hogwene wamulahililaga Abrahamu, Vava wiswe,

⁷⁴ Kutupa iswe vukomolwa ku makono ga vanisi,

⁷⁵ Kigele tumutumamile vuduhu kogoha mu vusondo na vugololoku hambele nawe nsiku ziswe zyose.

⁷⁶ Na veve mwana ukwitanwa mufumbuzi wa Mwenuyu ali kwigulya muno; Kwisi veve ukutongela hambele na vusyu wamwa Guku kuzivezelezya nzila zyakwe,

⁷⁷ Kuvapa vanhu vakwe vamaniche vupizya mugati na kutondolwa kwa mavukenaguzi gavo.

⁷⁸ Kunguno ya kigongo cha Mulungu wiswe, Mugati nacho mwanga gwa kwigulya gwatufikilaga kuvezya venava valikala mu giti na mu mudaka gwa lufu,

⁷⁹ Na kugatonga magulu giswe mu nzila ya kuhola.

⁸⁰ Alisi mwana wakulaga na wajamaga nguzu mu Roho, na wavagi mwibalangu kusika lusiku lwa kwigela kwakwe hambele nʼIsraeli.