2 Vakorinto 8 - Nyamwezi New Testament 1951

¹ Hangi, vadugu, tulimupa mhola ya kisa cha Mulungu,

² hochene chapanilwe mu makanisa ga Makedonia; kitisi mugati na magemelo mingi ga mamikosi, wingi wa kudeha kwavo na vupina wavo vuhanya wakwilaga muno ku vusavi wa vupani wavo.

³ Kwisi ndisangilwa ati vapanaga na kutogwa ku nguzu zyavo, ahene kukila nguzu zyavo.

⁴ Vatulombaga na kutwikumbilizya kisa cheniki vapiwe lusangi mugati na kuvatumamila vasondo,

⁵ na yikavile duhu kitisi twisigizaja, alisi vipanaga venekili kumwa Guku na kuwiswe ku kikowa cha Mulungu.

⁶ Kunguno yeniyi twamuhimagizaja Tito akisikilizye kisa cheniki kuwinwe kitisi wakivukizaja hambele.

⁷ Alisi kitisi mwatongelaga mu gose, mwisanizyo, na vuyombi, na masala, na kadadi kose, na kutogwa kwinwe kuwiswe, mutongele mu kisa cheniki chene.

⁸ Nkavile kuyomba ilagilizyo, sumbwa ku kadadi ka vangi kugema hanayene ya kutogwa kwinwe kwene.

⁹ Kwisi mulikimanicha kisa cha Guku wiswe Yesu Kristo, kitisi wapinahaga kunguno yinwe, aho wavagi musavi, kigele muve vasavi ku vupina wakwe.

¹⁰ Na mwenumo ndiyangula; kwisi genaya galimuvelela inwe, inwe hovene mwatongelile kuvukizya mwakizo, ngʼo mu kutumama duhu, sumbwa savasava mu kukova kwene.

¹¹ Alisi lelo muyisikilizye milimo yeniyi, kigele kitisi mwavagi tayari kukova, sisyo sisyene muyisikilizye ku vuvezya winwe.

¹² Kwisi ulu kutogwa kuliho, haho kulitogezya kitisi kuli nago, ngʼo kitisi kukavile nago.

¹³ Kwisi yikavile sisyo ati vangi vabuhilwe, ninwe mutimbilwe,

¹⁴ sumbwa yive savasava ku vose; hagisi wingi winwe vuvavelele avo mu vufundi wavo, kigele wingi wavo wene vumuvelele inwe mu vufundi winwe, kigele

¹⁵ yive savasava ku vose; kitisi yitonilwe, Homwene wakumingaga mingi akakwilililwe, na homwene wakumingaga tudo akadohelilwe.

¹⁶ Alisi kalumbilo kumwa Mulungu homwene wavezizye kadadi kenaka kunguno yinwe mu moyo gwamwa Tito.

¹⁷ Kwisi wakuzumaja kubembelezya kwane; alisi kunguno mwenekili ali nako kadadi muno, wajaga kuwinwe mu kutogwa kwakwe.

¹⁸ Na hamohene nawe twamutumizaja mudugu uyo homwene ikumuku lyakwe mu Mhola

¹⁹ ya Chelu lisambalile mu mavilingano gose; alisi yikavile syenisyo duhu, sumbwa uyu wasogolagwa na mavilingano ayumbe hamohene niswe na kipanwa cheniki, hochene kilisungwa niswe ku lukumo lwamwa Guku na

²⁰ kolecha kutogwa kwiswe, kigele twihege munhu atuvengelezye kunguno ya wingi wavugwasya wenuvu howene watumamagwa niswe.

²¹ Kwisi tuligikomya genaya gali masoga, ngʼo hambele na Mulungu duhu, sumbwa hambele na vanhu savasava.

²² Kwisi hamohene navo tulimutuma mudugu wiswe, homwene twamugemaga kadadi kakwe mu milimo mingi; alisi lelo ali nako kadadi kahanya kunguno alimusanizya inwe munogwene.

²³ Lelo kunguno yamwa Tito, uyu ali mwichane, nawe alitumama hamohene nane mugati ninwe; ninga kunguno ya vadugu viswe, ava vali vatume va mavilingano, vali lukumo lwamwa Kristo.

²⁴ Kunguno yeniyi muvoleche hambele na mavilingano welekele wa kutogwa kwinwe nʼikumilizyo liswe kunguno yinwe.