2 Vakorinto 6 - Nyamwezi New Testament 1951

¹ Iswe vatumami vikinu tulilomba muleke kuchanukula kisa cha Mulungu cha gele,

² kwisi alihaya, Hʼitungo lya kutogeziwa nakudegelekaga, Na ha lusiku lwa vupizya nakugwasaja. Lolagi, lelo itungo lya kutogeziwa; lolagi, lelo lusiku lwa vupizya.

³ Kuduhu umo tulimugulazya mu muhayo gumo, kwigela ngʼo vukumba wiswe vuvengeleziwe;

⁴ alisi mu gose tuliwifumbula kitisi vatumami va Mulungu, mu vulembezu wingi, mu mikosi, mu vufundi,

⁵ mu luduko, mu matulagulwe, mu jela, mu nsika, mu

⁶ milimo, mu kusinga, mu kufunga, mu vusondo, mu

⁷ masala, mu vujamu, mu kigongo, mu Roho Nsondo, mu kutogwa vuduhu vugulumi, mu muhayo gwa loleyene, mu nguzu ya Mulungu, mu masilanga ga vugololoku

⁸ ga kukono kwa mulila na ga kukono kwa lumoso, ku lukumo na nsoni, ku kuyombwa sisoga na kuyombwa sivi;

⁹ kitisi vayengani, kasinaga tuli va lole; kitisi avo hovene vakamanikivilwe, kasinaga tulimanikiwa; kitisi avo hovene valifwa, kasinaga tulizuvuka; kitisi avo

¹⁰ hovene validukiwa, vuduhu kuvulagwa; kitisi avo hovene valisaya, kasinaga tulideha nsiku zyose; kitisi vapina, kasinaga tulivasavya vingi; kitisi avo hovene vali gele kinhu, kasinaga tuli nafyo finhu fyose.

¹¹ Twayombile ha pe kuwinwe Vakorinto, myoyo yiswe yagalihaga.

¹² Mukavile kupineheziwa muwiswe, sumbwa mulipineheziwa mu myoyo yinwe.

¹³ Lelo kunguno ya kusyokezya kipimo cheniki, ndiyomba kitisi na vana, ninwe muyigalihye myoyo yinwe.

¹⁴ Muleke kuvi na lusangi na venavo hovene vakavile kusanizya, kwisi vugololoku vuli na lusangi ki na wigomu? ninga luliho lusangi ki mugati na lumole na

¹⁵ giti? Hangi vuliho vugelanile ki mugati na Kristo na Beliali? ninga mwenuyu alisanizya ali nalyo ifungu

¹⁶ ki na mwenuyo akavile kusanizya? Na isengelo lya Mulungu lili navo vugelanile ki na fimbulimbuli? kwisi iswe tuli isengelo lya Mulungu muzuvuku; kitisi Mulungu wahayaga, Nkwikala na kusimiza mugati navo; nane nkuvi Mulungu wavo, navo vakuvi vanhu vane.

¹⁷ Kunguno yeniyi Mufume kuwavo na mwisunde, alihaya Guku, Na muleke kugakumya genaya ga zoma, Nane nkumwanukula inwe.

¹⁸ Na nene nkuvi Vava winwe, Ninwe mukuvi vana vane vagosya na vakima, alihaya Guku wa nguzu zyose.