2 Vakorinto 5 - Nyamwezi New Testament 1951

¹ Kwisi tulimanicha ati ulu ihema lya kwikala kwiswe mu liwelelo lilikomolwa, tuli nayo numba yizengilwe na Mulungu, wikalo vukavezivilwe na makono, wa hanahana mwilunde.

² Kwisi mu lyenili tulisamba, tulikumbula kukumbwa na wikalo wiswe wa mwilunde;

^3-4 kwisi ulu twazwikagwa, iswe kwigela ngʼo zule. Kunguno iswe hovene tulimo mwihema lyenili tulisamba, kwisi tuliduka, kunguno tukatogilwe kuzulwa sumbwa kukumbwa, kigele ga lufu gamilwe na vuzuvuku.

⁵ Lelo homwene watuvezizye ku genaya ali Mulungu, homwene watupaga mufungi gwa Roho.

⁶ Kunguno yeniyi tuli na vugimu, na tulimanicha ati aho tulikalamo mu muvili,

⁷ tulikala heke na Guku, kwisi tulisimiza

⁸ mwisanizyo, ngʼo mu kuvona. Alisi tuli na vugimu, na tulitogwa muno kulekana na muvili na kwikala hamohene na Guku.

⁹ Kunguno yeniyi tulitunganika kumutogezya uyu, ninga tuliho henaha ninga tukavileho henaha.

¹⁰ Kwisi yilitudima iswe vose kwigela hambele nʼisumbi lya vuyanguzi lyamwa Kristo, kigele kila umo aganukule genaya wagitaga ku muvili, ku genaya watumamaga, ninga kasoga ninga kavi.

¹¹ Kunguno tulimanicha kogohya kwamwa Guku tulivagada vanhu, alisi twafumbukaga hambele na Mulungu, na ndisigizya ati twafumbukaga hambele na myoyo yinwe.

¹² Tukavile kwikuzya iswe venekili hangi hambele ninwe, sumbwa tulimupa inwe nguno ya kwikumilizya kunguno yiswe, kigele muve nago ga kuvitavuka ava hovene valikumilizya ku genaya ga hanze,

¹³ na ngʼo ku genaya ga mu moyo. Kwisi ninga twapelagwa na masala giswe, yili kunguno ya Mulungu, ninga tuli nago masala yili kunguno yinwe.

¹⁴ Kwisi kutogwa kwa Mulungu kulituhimagizya, kunguno tuliyangula giki: Umo wavafwilile vose, kunguno yeniyi vose vafwile;

¹⁵ nawe wavafwilile vose, kigele venava valizuvuka valeke kuzuvuka kuwavo venekili, sumbwa kuwakwe homwene wavafwilile na wahembukile.

¹⁶ Kunguno yeniyi kufuma lelo tukamanikizye munhu ku muvili, nulu twamumanikaja Kristo ku muvili, alisi lelo tukamumanikizye sisyo hangi.

¹⁷ Kunguno yeniyi ulu munhu alimo mu Kristo ali kitundwa kipya; genayo ga kale

¹⁸ gavitile, lolagi gose gavile mapya. Alisi gose genaya gafumile kumwa Mulungu, homwene watwikondelezaja nawe mwenekili mugati na Kristo, na watupaga vukumba wa wikondezi,

¹⁹ kwisi wavagi Mulungu homwene mugati na Kristo walikondelezaja liwelelo nawe mwenekili, na akavasolozezizye mavusumule gavo, sumbwa watulaga muwiswe muhayo gwa wikondezi.

²⁰ Sisyo iswe tuli vatume ha lwande lwamwa Kristo, kitisi Mulungu alilomba ku milomo yiswe: Tulimulomba inwe ha lwande lwamwa Kristo, mwikondeleziwe na Mulungu.

²¹ Mwenuyu homwene wavagi akamanikizye vukenaguzi, wamuvezaja vukenaguzi kunguno yiswe, kigele tuve vugololoku wa Mulungu muwakwe.