2 Vakorinto 4 - Nyamwezi New Testament 1951

¹ Kunguno tuli navo vukumba wenuvu ku kigongo

² cheniki twavonelagwa, tukavile kuzova; alisi twayikanaga milimo ya nsoni ya lwiviso, tukavile kusimiza mu vuhuguku, ninga kusalihanya muhayo gwa Mulungu na vulamba, sumbwa mugati na kugafumbula ago gali ga lole tuliwiyolecha iswe venekili ku myoyo ya vanhu vose hambele na Mulungu.

³ Alisi ulu Mhola ya Chelu yiswe yikumbilwe, yikumbilwe ku venava hovene valizimila;

⁴ hovene mulungu wa liwelelo lyenili wagahofuzaja masala gavo hovene vakavile kusanizya, kigele luleke kuvafikila lumole lwa Mhola ya Chelu ya lukumo lwamwa Kristo, homwene ali isumbano lya Mulungu.

⁵ Kwisi tukavile kwitanizya iswe venekili sumbwa Kristo Yesu kitisi ali Guku, niswe venekili kitisi vakumba vinwe kunguno yamwa Kristo.

⁶ Kwisi ali Mulungu homwene wayombaga, Lumole luyekeme kufuma mu giti, homwene wayekemaga mu myoyo yiswe na kufumbula vumaniche wa lukumo lwa Mulungu mu vusyu wamwa Yesu Kristo.

⁷ Alisi nsavo zyenizi tuli nazyo mu fiseme fya vulongo, kigele vukovozi uvo vuhanya vuve wa Mulungu, na

⁸ ngʼo wa kufuma kuwiswe; tulifitwa malwande gose, vuduhu kupineheziwa; tuli na himba, vuduhu kuzova;

⁹ tulidukiwa, vuduhu kulekulwa; tuliponiwa hasi, vuduhu kuvulagwa.

¹⁰ Nsiku zyose tuli nago malumeho ga lufu lwamwa Yesu mu mivili, kigele navo vuzuvuku wamwa Yesu wigele mu mivili ziswe.

¹¹ Kwisi iswe hovene tulizuvuka tulifumiwa nsiku zyose ku lufu kunguno yamwa Yesu, kigele navo vuzuvuku wamwa Yesu wigele mu mivili ziswe zya lufu.

¹² Sisyo lufu lulitumama muwiswe, alisi vuzuvuku muwinwe.

¹³ Alisi iswe tuli nayo Roho yeniyi yene yʼisanizyo, kitisi yitonilwe, Nasanizaja, na kunguno yeniyi nayombaga; niswe tulisanizya, na kunguno yeniyi tuliyomba.

¹⁴ Kunguno tulimanicha ati mwenuyu homwene wamuhembukaja Guku Yesu, alatuhembuche niswe hamohene na Yesu na alatwimike hamohene ninwe.

¹⁵ Kwisi gose genaya galikwila kunguno yinwe, kigele kisa kikule na kifike ku vingi na kongezya kalumbilo ku lukumo lwa Mulungu.

¹⁶ Kunguno yeniyi tukavile kuzova; nulu munhu wiswe wa hanze alisakala, munhu wiswe wa mugati aliveziwa vupya lusiku ku lusiku.

¹⁷ Kwisi mamikosi giswe mabuhu hogene gali ga hʼitungo ido duhu, galituvezezya lukumo luhanya holwene lukakovolilwe kupimwa;

¹⁸ tukavile kugilolela genaya galigela, sumbwa genayo gakavile kwigela; kwisi genaya galigela gali gʼitungo ido duhu, alisi genayo gakavile kwigela gali ga myaka de.