2 Timoteo 3 - Nyamwezi New Testament 1951

¹ Alisi umaniche ati mu nsiku zya mhelo gakuvi matungo matimbu,

² kwisi vanhu vakwitogwa venekili na kuzitogwa nsavo, na vakwigagambazya na kuvi na myete na kufusana, na vakuvi na nhani ku vavyazi vavo,

³ vakuvi vuduhu kalumbilo, va kasa, vakuvi gele kutogwa na vukondu, vatolani, kutogwa ngʼo wilengu,

⁴ va kayaya, na kutogwa ngʼo kasoga, vagambi, va luhali, vifunangizya, vanhu hovene valivutogwa wivonya kukila Mulungu,

⁵ vakuvi nalo lumenho lwa hanze lwa kumogoha Mulungu, alisi valiyikana nguzu yakwe. Veve wisunde ku venavo.

⁶ Mugati navo vali venavo valisyepya mu manumba kuvasampa vakima vatimbivilwe na mavukenaguzi na validutwa na mawivonya

⁷ ga mitindo mingi, hanahana valiwihembeka, alisi kukovola ngʼo kuvufikila vumaniche wa lole.

⁸ Kitisi avo Yane na Yambere vamugomelaga Mose, sisyo sisyene venava valiyigomela hanayene: vanhu hovene vakenagukile masala na vakajamile mwisanizyo.

⁹ Alisi venavo kutongela ngʼo muno, kwisi vuhumbu wavo vukufumbulwa hambele na vose, kitisi wenuvo wa venavo va kale.

¹⁰ Alisi veve wandondaga mugati na vuhembeki, vusimize,

¹¹ malome, isanizyo, vulembezu, kutogwa, vujamu, mavupeziwa, mamikosi, kitisi genayo ganfikilaga mu Antiokia, Ikonium, Listra, kitisi mavupeziwa genaya nene nivukilizizye, na Guku wampizaja ku gose genaya.

¹² Ahene, vose hovene valikova kuzuvuka mu kumogoha Mulungu mugati na Kristo Yesu vakupeziwa.

¹³ Alisi vanhu vavi na vayengani vakutongela na kukula mu kavi; valivapuvya vangi na valiwipuvya venekili.

¹⁴ Alisi veve ujame mugati na genayo wahembekilwe na hogene wagasanizizye, kunguno ulimumanicha

¹⁵ mwenuyo wakuhembekaga, na kunguno veve kufuma vuyanda wako wagamanikaja mavutone masondo, hogene galikovola kukupa ngelo zya kupiziwa mugati na kumusanizya Kristo Yesu.

¹⁶ Kila vutone wokalile na Roho ya Mulungu na vulivela ha vuhembeki, ha vuhani, ha vuvezelezya, ha vulangi mugati na vugololoku,

¹⁷ kigele munhu wa Mulungu ave mukomezu na wavezelezivilwe vuliko ku milimo misoga.