2 Timoteo 2 - Nyamwezi New Testament 1951

¹ Haho mwana wane, uve na nguzu mugati na kisa hochene kilimo mu Kristo Yesu.

² Na genaya wigagwa hawane hambele na vasangilwaho vingi uvape vangi vajamu, hovene valikovola kugangadika kuvahembeka vangi.

³ Uve na lusangi nane mugati na mavuduki kitisi mulugaluga musoga wamwa Kristo Yesu.

⁴ Kuduhu mulugaluga wa vulugu aliwiyingizya mwenekili mugati na myanya ya liwelelo, kigele amutogezye mwenuyu wamutonaga ku vulugaluga.

⁵ Na sisyo savasava munhu alisiganilwa kuzwikwa ngʼo ngala, ulu akisiganililwe na ludonho.

⁶ Yilimudima mulimi homwene alitumama kuvi wa mbele kuganukula matunda.

⁷ Udegeleke kitisi ndiyomba: Guku akukupa masala mugati na mihayo yose.

⁸ Umwizukile Yesu Kristo homwene wahembukile ku vafwile, wa vuvyalwa wamwa Davidi, kitisi yiliyombwa na Mhola yane ya

⁹ Chelu, kunguno yayo ndiduka mavuduki kusika navile mutungwa kitisi mukenaguzi; alisi muhayo gwa Mulungu gukatungilwe.

¹⁰ Kunguno yeniyi ndivukilizya gose kunguno ya venavo vasogolwa, kigele venavo vene vapiwe vupiziwa mugati na Kristo Yesu hamohene na lukumo lwa hanahana.

¹¹ Muhayo ugu guli gwa lole, ulu twafwile hamohene nawe tukuzuvuka

¹² hamohene nawe savasava; ulu tulijama tukutema hamohene nawe savasava; ulu tulimwikana nawe mwene

¹³ akutwikana iswe; ulu iswe tulingila mwivengwe uyu akudila mujamu, kwisi akakovolile kwikana mwenekili.

¹⁴ Uvizukizye venavo genaya, na uvahane hambele na vusyu wa Mulungu, valeke kwanilizya hokwene kuli kwa gele na kulivazimizya venavo validegeleka.

¹⁵ Ugangadike kwiyolecha mwenekili kuvi mujamu hambele na Mulungu, kitisi mutumami homwene akafundile kusoniha, homwene alihembeka savasava muhayo gwa lole.

¹⁶ Alisi wisunde ku mihayo iyo ya vufwafwa na ya

¹⁷ gele, kwisi venavo vakutongela duhu mu vutazu, na mihayo yavo yikuvi yililya kitisi ipembelonda.

¹⁸ Mugati navo vali Humenayo na Fileto, hovene visundaga ku hanayene mu kuyomba ati vuhembuke wamalaga kuviho, na valililulunganya isanizyo lya vamo.

¹⁹ Alisi musingi mujamu gwa Mulungu guliwima na guli na lumanyilo lwenulu: Mulungu alivamanicha venavo vali vakwe, na: Homwene alilitana lina lya Mulungu isunde kufuma wigomu vose.

²⁰ Mu numba nhanya fikavilemo fiseme fya dhahabu na fedha duhu, sumbwa savasava fya miti na vulongo, fimo fili fya isima, na fingi fikavile fya isima.

²¹ Ulu haho munhu aliwisunda na kwilindila mwenekili ku venavo, akuvi kiseme cha isima chasondohivilwe na kivelile kumwa mwenekili numba chavezelezivilwe ku milimo yose misoga.

²² Alisi ugapele mawivonya ga vasumba, sumbwa ugangadike kuvulonda vugololoku, isanizyo, kutogwa, kuhola hamohene na venavo valimwitana Guku na moyo gwa pe.

²³ Alisi ugalemezye malwanilo mahumbu na malele, kunguno ulimamcha ati genaya galivyala matongano duhu.

²⁴ Alisi mukumba wamwa Guku aleke kutongana, sumbwa ave mukondu ku vose, na amaniche kuhembeka na kutindikila, ulu alitilwa kavi, na avahane vakandi mugati na vudekanu,

²⁵ kigele, ulu yakovolwa, Mulungu avape kupiluka moyo na kumanicha hanayene,

²⁶ na vavalagane na vafume ku mutego gwamwa Shetani, kwisi vatungilwe nawe, kigele vakivezye kikowa chakwe.