2 Timoteo 1 - Nyamwezi New Testament 1951

¹ Paulo, mutume wamwa Kristo Yesu kunguno ya kikowa cha Mulungu, nalitanizye ilagano lya vuzuvuku howene vulimo mugati na Kristo Yesu,

² kumwa Timoteo, mwana wane mutoneke. Kisa na kigongo na kuhola hokwene kulifuma kumwa Mulungu Vava na Kristo Yesu, Guku wiswe.

³ Ndimulumbila Mulungu homwene ndimutumamila vukumbu na vaguku vane mugati na moyo gwa pe; na ndikwizukila veve hanahana mu kulomba kwane

⁴ halimi na havuziku; na mu kugizukila minsozi gako ndikumbula kukuvona veve, kigele nokaziwe na kudeha.

⁵ Kwisi nalizukilaga isanizyo lya lole holyene lilimo muwako, na holyene lyavagimo hambele mugati na mamayo Lois na noko Eyunike, na ndisanizya vuliko ati

⁶ lilimo mugati naʼho savasava. Kunguno yeniyi ndikwizukizya veve, ukifufulile kipanwa cha kisa cha Mulungu hochene kilimo mugati naʼho kunguno ya kutulilwa makono gane.

⁷ Kwisi Mulungu akatupile roho ya vova, sumbwa ya nguzu na ya kutogwa na ya ludonho.

⁸ Kunguno yeniyi uleke kuvi na nsoni hambele na vusangilwaho kunguno yamwa Guku wiswe ninga kunguno yane, mutungwa wakwe, sumbwa wivukilizye duhu mavuduki kunguno ya Mhola ya Chelu mugati na

⁹ nguzu ya Mulungu, homwene watupizaja na watwitanaga na kwitana kusondo, ngʼo hanuma na kipimo cha milimo yiswe, sumbwa hanuma na ndaka yakwe mwenekili na kisa chakwe hochene twapivagwa mugati na

¹⁰ Kristo Yesu vukumbu kale, na hochene kigelaga lelo ha pe mugati na kufumbulwa kwa Mupizya wiswe Yesu Kristo, homwene walukindaga lufu, na wafumbulaga mugati na Mhola ya Chelu vuzuvuku na vupanga howene vukafwaga;

¹¹ kunguno yayo nene natulilwe kuvi mutanizya na mutume na muhembeki wa vapagani.

¹² Kunguno yeniyi ndiduka maluduko genaya, alisi nkavile kusoniha kunguno yago, kwisi ndimumanicha mwenuyo ndimusanizya, hangi ndisanizya vuliko ati mwenuyo alikovola kukilindila kiviko chane kusika lusiku ulo.

¹³ Udimane na mwilondo gwa mihayo iyo ya kapanga hoyene wayigagwa nane mwisanizyo na mu kutogwa mugati na Kristo Yesu.

¹⁴ Ukilindile kiviko icho kisoga mugati na Roho Nsondo hoyene yilikalamo muwiswe.

¹⁵ Veve ulimanicha ati venavo vose mu Asia vandekaga, mugati navo vali Figelo na Hermogene.

¹⁶ Guku avavonele kisa avo va munumba yamwa Onesiforo, kwisi wanhulikaja nene kingi na wavagi akavile na

¹⁷ nsoni kunguno ya munyololo gwane, sumbwa aho nafikaga ku Roma wankovaga muno kusika wambonaga. Guku amupe kuvona kisa kumwa Guku lusiku ulo.

¹⁸ Na isyo wantumamilaga nene kingi mu Efeso veve ulimanicha vuliko.