1 Yohana 5 - Nyamwezi New Testament 1951

¹ Homwene alisanizya ati Yesu ali Kristo, mwenuyu wavyalilwe na Mulungu; na homwene alimutogwa muvyazi alimutogwa na muvyalwa wakwe mwene.

² Mwenumo tulimanicha ati tulivatogwa vana va Mulungu, ulu tulimutogwa Mulungu na kuyidima mikumo yakwe.

³ Kwisi kwenuko kuli kutogwa kumwa Mulungu kuyidima mikumo yakwe, na mikumo yakwe yikavile mitimbu.

⁴ Kwisi gose genayo gavyalilwe na Mulungu galikinda liwelelo; na vukinde howene walikindile liwelelo lili isanizyo liswe.

⁵ Nani mwenuyu alilikinda liwelelo, sumbwa mwenuyu homwene alisanizya ati Yesu ali Mwana wa Mulungu?

⁶ Uyu ali homwene wizaga na minzi na magazi, Yesu Kristo, ngʼo na minzi duhu, sumbwa na minzi na magazi; na ali Roho homwene alisangilwaho, kwisi Roho ali hanayene.

⁷ Kwisi gali adatu hogene galisangilwaho:

⁸ Roho na minzi na magazi, na genaya adatu galiwizumilizya.

⁹ Ulu tuliwanukula vusangilwaho wa vanhu, vusangilwaho wa Mulungu vulivukila uvo, kwisi wenuvu vuli vusangilwaho wa Mulungu ati wasangilagwa kunguno ya Mwana wakwe.

¹⁰ Homwene alimusanizya Mwana wa Mulungu ali navo vusangilwaho muwakwe mwenekili; homwene akavile kumusanizya Mulungu wamuvezaja kuvi mulamba, kunguno akavusanizizye vusangilwaho wenuvo Mulungu wasangilagwa kunguno ya Mwana wakwe.

¹¹ Na wenuvu vuli vusangilwaho ati Mulungu watupaga vuzuvuku wa hanahana, na vuzuvuku wenuvu vulimo mugati na Mwana wakwe.

¹² Homwene ali nawe Mwana, ali navo vuzuvuku; homwene akavile nawe Mwana wa Mulungu, akavile navo vuzuvuku.

¹³ Namutonelile inwe yeniyi, kigele mumaniche ati muli navo vuzuvuku wa hanahana, inwe hovene mulilisanizya lina lya Mwana wa Mulungu.

¹⁴ Na uvu vuli vugimu howene tuli navo hambele nawe ati, ulu tulikilomba kinhu, hochene kiligelanila na kikowa chakwe, haho alitudegeleka.

¹⁵ Na ulu tulimanicha ati alitude geleka ku kila muhayo tuliguyomba, haho tulimanicha ati tuli nago genayo twamulombaga.

¹⁶ Ulu umo alimuvona muduguye alikenagula vukenguzi howene vukavile wa lufu, alombe, na Mulungu akumupa vuzuvuku, venavo, ahene, hovene vakakenagulile vukenaguzi wa lufu. Vuliho vukenaguzi wa lufu, nkayombile ati alombe kunguno ya wenuvo.

¹⁷ Wigomu vose vuli vukenaguzi; alisi vuliho vukenaguzi vukavile wa lufu.

¹⁸ Tulimanicha ati, homwene wavyalilwe na Mulungu akavile kukenagula; sumbwa homwene wavyalilwe na Mulungu aliwilindila mwenekili, na uyo Muvi akavile kumukumya.

¹⁹ Tulimanicha ati iswe tuli vamwa Mulungu, na liwelelo lyose lilikala mugati na mwenuyo Muvi.

²⁰ Tulimanicha ati Mwana wa Mulungu wamalaga kwiza, nawe watupile masala ga kumumanicha mwenuyo ali wa lole, mugati na Mwana wakwe Yesu Kristo. Homwenuyu ali Mulungu wa lole na vuzuvuku wa hanahana.

²¹ Vana vane, mwilindile inwe venekili hambele na fimbulimbuli.