1 Yohana 4 - Nyamwezi New Testament 1951

¹ Vatoneke, muleke kuyisanizya kila roho, sumbwa muzigeme roho ulu zyafumile kumwa Mulungu; kwisi vafumbuzi vingi va vulamba vigelile mu liwelelo.

² Mwenumo muliyimanicha Roho ya Mulungu: kila roho, hoyene yilizumilizya ati Yesu Kristo wizaga mu muvili, yafumile kumwa Mulungu.

³ Na kila roho, hoyene yikavile kumuzumilizya Yesu, yikafumile kumwa Mulungu; na yeniyi yili roho ya Mukandi wa Kristo, hoyene mwigagwa ati yikwiza, nayo yamalaga kuvimo mu liwelelo.

⁴ Vana vane, inwe muli vamwa Mulungu na mwavakindile venavo, kunguno mwenuyo alimo muwinwe ali muhanya, kukila mwenuyo alimo mu liwelelo.

⁵ Venavo vali va liwelelo, na kunguno yeniyi valiyomba kitisi va mu liwelelo, na liwelelo lilivadegeleka. Iswe tuli vamwa Mulungu.

⁶ Homwene alimumanicha Mulungu alitudegeleka; homwene akavile wamwa Mulungu akavile kutudegeleka. Mwenumo tulimanicha roho ya hanayene na roho ya vupuvya.

⁷ Vatoneke, twitogwe hamohene, kwisi kutogwa kulifuma kumwa Mulungu, na homwene alitogwa avyalilwe

⁸ na Mulungu, na alimumanicha Mulungu. Homwene akavile kutogwa akamumanikizye Mulungu, kwisi Mulungu ali kutogwa.

⁹ Mwenumo kutogwa kwa Mulungu kwafumbukile ati, wamutumizaja Mwana wakwe umo

¹⁰ inene mu liwelelo, kigele tuzuvuke mugati nawe. Mwenumo kutogwa kuligela: ngʼo ati iswe twamutogilwe Mulungu, sumbwa uyo watutogilwe iswe, na wamutumizaja Mwana wakwe kuvi nzigu ku mavukenaguzi giswe.

¹¹ Vatoneke, ulu Mulungu watutogilwe iswe syenisyo, yilitudima iswe vene kwitogwa hamohene.

¹² Kufuma kale kuduhu umo wamuvonaga Mulungu; ulu tuliwitogwa hamohene, haho Mulungu alikala muwiswe, na kutogwa kwakwe kwakomelile mugati niswe.

¹³ Mwenumo tulimanicha ati tulikala mugati nawe, na uyu mugati niswe, kunguno watupile ifungu lya Roho yakwe.

¹⁴ Na iswe twawine na tulisangilwaho ati, Vava wamutumizaja Mwana kuvi Mupizya wa liwelelo.

¹⁵ Homwene alizumilizya ati Yesu ali Mwana wa Mulungu, mugati na mwenuyu Mulungu alikala, nawe mugati na Mulungu. Na iswe twakumanikizye na twakusanizizye kutogwa hokwene Mulungu ali nako kuwiswe.

¹⁶ Mulungu ali kutogwa, na homwene alikala mu kutogwa, alikala mugati na Mulungu, na Mulungu mugati nawe.

¹⁷ Mwenumo kutogwa kwakomelile muwiswe tuve na vugimu ha lusiku lwa vuyanguzi, kunguno kitisi mwenekili ali, sisyo sisyene iswe vene tuli mu liwelelo.

¹⁸ Kogoha kukavilemo mu kutogwa, alisi kutogwa kukomezu kulikufumya kogoha, kwisi kogoha kulileta luduko, na homwene alogoha akavile mukomezu mu kutogwa.

¹⁹ Iswe tulitogwa, kunguno mwenuyu wandaja kututogwa iswe.

²⁰ Ulu umo aliyomba, Ndimutogwa Mulungu, na alimugaya muduguye, mwenuyu ali mulamba; kwisi homwene akamutogilwe muduguye homwene wamu wine, mwenuyu akakovolile kumutogwa Mulungu homwene akamuwine.

²¹ Na mukumo gwenugu twapivagwa nawe ati, homwene alimutogwa Mulungu, amutogwe na muduguye mwene.