1 Yohana 2 - Nyamwezi New Testament 1951

¹ Vana vane, yeniyi ndimutonela inwe, kwigela ngʼo mukenagule; alisi ulu umo alikenagula, tuli nawe Mulombezi hamwa Vava, Yesu Kristo, mugololoku, nawe

² ali nzigu ku mavukenaguzi giswe, alisi ngʼo ku mavukenaguzi giswe duhu, sumbwa ku mavukenaguzi gene ga liwelelo lyose.

³ Mwenumo tulimanicha ati twamumanikizye, ulu tuliyilindila mikumo yakwe.

⁴ Homwene aliyomba, Ndimumanicha, alisi akavile kuyilindila mikumo yakwe, mwenuyu ali mulamba, na hanayene yikavilemo muwakwe.

⁵ Alisi homwene aligulindila muhayo gwakwe, mugati na mwenuyu kutogwa kwa Mulungu kwakomelile loleyene. Mwenumo tulimanicha ati tulimo mugati nawe,

⁶ Homwene aliyomba ati alikala mugati nawe, yilimudima kusimiza kitisi mwenekili wasimizage.

⁷ Vatoneke, nkavile kumutonela inwe mukumo mupya, sumbwa mukumo gwa kale hogwene mwavagi nago kufuma mbuki. Mukumo gwa kale guli muhayo ugo mwagwigilwe.

⁸ Alisi hangi ndimutonela inwe mukumo mupya, hogwene guli gwa lole mugati nawe na mugati ninwe, kwisi giti yilivita, na lumole lwa lole lwamalaga kwela.

⁹ Homwene aliyomba ati alimo mu lumole, alisi

¹⁰ alimugaya muduguye, mwenuyu atali ali mu giti. Homwene alimutogwa muduguye, alikala mu lumole, na muhayo gwa kwikumpa muduhu muwakwe.

¹¹ Alisi homwene alimugaya muduguye, ali mu giti na alisimiza mu giti, na akamanikizye uko alijako, kunguno giti yagahofuzizye minso gakwe.

¹² Ndimutonela inwe vana, kunguno mwatondolilwe

¹³ mavukenaguzi ginwe, kunguno ya lina lyakwe. Ndimutonela inwe vavava, kunguno mulimumanicha mwenuyo aliho kufuma mbuki. Ndimutonela inwe vasumba, kunguno mwamukindile mwenuyo Muvi. Namutonelile inwe vana, kunguno mulimumanicha Vava.

¹⁴ Namutonelile inwe vavava, kunguno mulimumanicha mwenuyo aliho kufuma mbuki. Namutonelile inwe vasumba, kunguno muli na nguzu na muhayo gwa Mulungu gulikala muwinwe, na mwamukindile mwenuiyo Muvi.

¹⁵ Muleke kulitogwa liwelelo ninga genaya galimo mu liwelelo; ulu umo alilitogwa liwelelo, kutogwa kumwa Vava kukavilemo mugati nawe.

¹⁶ Kwisi gose genaya galimo mu liwelelo, wivonya wa muvili, wivonya wa minso, na wifunangizya wa vanhu, gakafumile kumwa Vava,

¹⁷ sumbwa gali ga liwelelo. Na liwelelo likuzimanguka na wivonya walyo, alisi homwene alikimazya kikowa cha Mulungu akudila kusika hanahana.

¹⁸ Vana vane, lyenili lili itungo lya mhelo, na kitisi mwigilwe ati Mukandi wa Kristo aliza, syenisyo lelo Vakandi va Kristo vingi vamalaga kwigela, kunguno yeniyi tulimanicha ati lyenili lili itungo lya mhelo.

¹⁹ Venava vafumile mugati niswe, alisi vavagi vakavile va kuwiswe; kwisi ulu mbe vavagi va kuwiswe, mbe vadilile hawiswe. Alisi visundaga kuwiswe kigele yifumbuke ati venava vose vakavile va kuwiswe.

²⁰ Inwe mwavililwe maguta na mwenuyu ali Musondo, na muligamanicha gose.

²¹ Nkamutonelile inwe kunguno mukayimanikizye hanayene, sumbwa kunguno muliyimanicha yeniyi, na hangi mulimanicha ati haduhu vulamba howene vulifuma ku hanayene.

²² Nani ali mulamba, sumbwa mwenuyo alikana ati Yesu ali Kristo? Mwenuyu ali Mukandi wa Kristo homwene alimukana Vava na Mwana.

²³ Homwene alimukana Mwana akavile nawe Vava mwene. Homwene alimuzumilizya Mwana ali nawe Vava mwene.

²⁴ Genayo mwagigilwe kufuma mbuki gikale mugati ninwe. Ulu genaya mwagigilwe kufuma mbuki galikala mugati ninwe, inwe vene mukwikala mugati na Mwana na Vava.

²⁵ Na lyenili lili ilagano holyene mwenekili watulaganaja: vuzuvuku wa hanahana.

²⁶ Namutonelile genaya kunguno ya venavo valimupuvya inwe.

²⁷ Na kuvilwa maguta kwenuko mwavililwe nawe kulikala mugati ninwe, na mukafundile umo amuhembeke; alisi kitisi kuvila kwakwe kwa maguta kulimuhembeka inwe gose, nago gali ga lole gakavile vulamba, na isyo kwamuhembekile inwe, syenisyo mwikale mugati nawe.

²⁸ Lelo, vana vane, mwikale mugati nawe, kigele, ulu aligela, iswe tuve navo vugimu na tuleke kupondwa nsoni hambele nawe mwitungo lya kwiza kwakwe.

²⁹ Ulu mulimanicha ati mwenuyu ali mugololoku, haho mumaniche ati, homwene alita kigololoku ali mwana wakwe.