1 Timoteo 5 - Nyamwezi New Testament 1951

¹ Uleke kumudakila munamhala, sumbwa umuhane

² kitisi vanso, vasumba kitisi vaduguyo, vagikulu kitisi vanoko, vahala kitisi valumbuyo, mugati na wilengu vose.

³ Uvakuzye vasimbe hovene vali vasimbe loleyene;

⁴ alisi ulu musimbe ali navo vana ninga vizukulu, haho venavo vahembekwe kuyivezya milimo iyo yilivadima kuvavezezya va munumba zyavo hambele, na kuvasyokezya vavyazi vavo, kwisi yeniyi yilimutogezya Mulungu.

⁵ Alisi musimbe homwene ali musimbe loleyene na ali inene, alimwisigizya Mulungu na alijama mugati na kulomba havuziku na halimi.

⁶ Alisi homwene alivulonda vutamanilwa wakwe mwenekili, wafwile nulu ali mupanga.

⁷ Uvalagile venavo genaya kigele vave vuduhu kimelo.

⁸ Alisi homwene akavile kuvasunga vaduguye na muno va munumba yakwe, wamalaga kulikana isanizyo, nawe ali muvi kukila uyo akavile kusanizya.

⁹ Mukima musimbe alikovola kutonwa duhu ulu wakulile vuliko myaka makumi mukaga, na wavage mukima

¹⁰ wa mugosya umo, na ali navo vusangilwaho ku milimo misoga, na wavalelage vana, na wazimanage, na wavagusage vasondo magulu, na wavagwasaje vaduki, na wayilondage milimo yose misoga.

¹¹ Alisi uvakanizye vasimbe hovene vatali kukula, kwisi mugati na kwigomelwa valimugomela Kristo na valikova kutolwa,

¹² na valingila mu kitanga cheniki ati valilekaga ilagano lyavo lya mbele.

¹³ Na hamohene na genaya valiwihembeka kuvi vazovu mugati na kuyumbayumba mu manumba, alisi ngʼo kuvi vazovu duhu, sumbwa savasava vayombanya na vasonganya na kuyomba genaya gakasikile.

¹⁴ Kunguno yeniyi ndikova vasimbe hovene vatali kukula vatolwe, vavavyale vana na kuyisunga numba, valeke kumupa mukandi nguno ya kufusana;

¹⁵ kwisi vamo vamalaga kupiluka na kumulonda Shetani.

¹⁶ Ulu mukima musanizya ali navo vaduguye vasimbe, avagwasye, ivilingano lileke kutimbilwa, kigele livagwasye avo vali vasimbe loleyene.

¹⁷ Vanamhala hovene valitumama milimo yavo sisoga vapiwe isima munogwene, na hangi muno venavo valitumama mugati na kutanizya na kuhembeka.

¹⁸ Kwisi vutone vuliyomba, Uleke kutunga mulomo gwa ngʼombe hoyene yilipula, na hangi, Mutumami ali na chakwe kupiwa musyahala gwakwe.

¹⁹ Uleke kuyidegeleka mbulano mwivilingano kwigulya na munamhala, sumbwa duhu ulu vasangilwaho vavili ninga vadatu valiho.

²⁰ Venavo valikenagula uvahilimile hambele na vose, kigele vangi vene vogohe.

²¹ Ndikulagila hambele na Mulungu na Kristo Yesu na vamalaika vasogolwa, ugalindile genaya vuduhu kutogezya, kigele uleke kuvezya muhayo gumo gwa pendelea.

²² Uleke kwanguhya kumutulila umo makono, na uleke kuvi na lusangi na

²³ mavukenaguzi ga vangi; wilindile veve mwenekili musondo. Uleke kunwa minzi duhu, sumbwa uyitumile mvinyo ndo kunguno ya munda yako na mavusatu gako hanahana.

²⁴ Mavukenaguzi ga vanhu vamo gali ha pe na galitongela ha vuyangulwa, vangi mavukenaguzi gavo galivalonda kunuma,

²⁵ Sisyo sisyene milimo misoga yiligela ha pe, na iyo yili ya mutindo gungi yikakovolilwe kuviswa.