1 Timoteo 4 - Nyamwezi New Testament 1951

¹ Alisi Roho yiliyomba ha pe ati mu matungo ga kumbele vamo vakulagala kufuma kwisanizyo, na vakudimana na roho zya vupuvya na mavuhembeki ga migavo mugati na vugulumi wa vahembeki va vulamba,

² hovene vali nago mavamba ga moto mu myoyo yavo,

³ hovene valivahangilizya kutola na kulya filiwa hofyene Mulungu wafitundaga filiwe na kalumbilo na venavo valisanizya na vayimanikizye hanayene.

⁴ Kwisi fitundwa fyose fya Mulungu fili fisoga, na kuduhu kimo

⁵ cha kukaniziwa ulu kilanukulwa na kalumbilo, kwisi kilisondohiwa na muhayo gwa Mulungu na mugati na kulomba.

⁶ Ulu ulivalagila vadugu genaya, ukuvi mukumba musoga wamwa Kristo Yesu, naʼho ukwilisya mugati nʼisanizyo na muhayo musoga gwa vuhembeki hogwene uligulonda.

⁷ Alisi uyikanizye migani ya zoma na ya kigikulu, sumbwa wijamilizye mugati na kumogoha Mulungu.

⁸ Kwisi vulendelezya wa muvili vulivela hado duhu, alisi kumogoha Mulungu kuligavelela gose, kwisi hangi kuli nalyo ilagano ku vuzuvuku wa walelo na uvo vulakiza.

⁹ Muhayo ugu guli gwa lole na gulidimwa kuzumiliziwa.

¹⁰ Kunguno yeniyi tulikoya na tulilasana, kwisi tulimwisigizya Mulungu muzuvuku homwene ali Mupizya wa vanhu vose, na muno wa venavo valisanizya.

¹¹ Ulagile na uhembeke yeniyi.

¹² Kuduhu umo akuvengelezye veve kunguno ya vusumba wako, alisi uve isumbano ku vasanizya mu muhayo, mu vusimize, mu kutogwa, mwisanizyo, mu vusondo.

¹³ Kusika nkwiza ugangadike mugati na kusoma na kuhana na kuhembeka.

¹⁴ Ukaleke ngʼo kukitumila kipanwa cha kisa hochene kilimo mugati naʼho, hochene wapivagwa mugati na vufumbuzi na kutulilwa makono na vanamhala.

¹⁵ Ugizukile na ugalonde genaya, kigele kutongela kwako kwigele ha pe hambele na vose.

¹⁶ Wikomye veve mwenekili na vuhembeki wako, ujame mwenumo; kwisi ulu ukwita syenisyo ukwipizya veve mwenekili, navo savasava hovene valikwigwa veve.