1 Timoteo 3 - Nyamwezi New Testament 1951

¹ Muhayo ugu guli gwa lole: ulu umo alitamanilwa kuvi musimamizya alikova mulimo musoga.

² Kunguno yeniyi yilimudima musimamizya kuvi vuduhu kimelo, mugosya wa mukima umo, mwivembu, muvalaganu, wa ludonho, muzimani, amaniche kuvahembeka

³ vangi, aleke kulanda walwa, aleke kutogwa kwitwenya, sumbwa ave mukondu, aleke kuvi wa kayaya na wa tama

⁴ ya nsavo, amaniche kuvasunga sisoga va munumba yakwe, na vana vakwe vadonhoke mugafi na wivembu vose.

⁵ (Ulu umo akamanikizye kuvasunga va numba yakwe, lumehoki akukovola kulisunga ivilingano iya Mulungu.)

⁶ Musimamizya aleke kuvi muhemba mupya, kwigela ngʼo igagambazye na ingile mu kitanga chamwa Shetani.

⁷ Yamudima savasava kuvi na vusangilwaho vusoga mugati na vanhu va hanze, kwigela ngʼo afuswe na ingile mu mutego gwamwa Shetani.

⁸ Yavadima vatumami vʼivilingano vene kuvi vanhu vʼisima, na valeke kuvi va milomo ivili na vakozya, na

⁹ valeke kukova vusulu mugati na vuyengani, sumbwa vayilindile mbisila ya isanizyo mugati na moyo gwa pe. Alisi venava vene hambele vagemwe, haho vatumame ulu vali vuduhu kimelo.

¹⁰ Vakima vene vave

¹¹ vʼisima, na valeke kuvi vatolani, vave vilengu na vajamu mugati na tose.

¹² Mutumami wʼivilingano ave mugosya wa mukima umo na amaniche kuvasunga vana vakwe na va munumba yakwe sisoga.

¹³ Kwisi venavo vatumamile sisoga valigada lukumo lusoga na vujamu na vugimu wingi mwisanizyo hamwa Kristo Yesu.

¹⁴ Ndikutonela veve mihayo yeniyi nulu ndisigizya kwiza wangu kuwako.

¹⁵ Alisi ulu ndikendela, umaniche kitisi yilisika kusimiza mu numba ya Mulungu hoyene yili ivilingano lya Mulungu muzuvuku, nalyo lili nhingi na musingi gwa hanayene.

¹⁶ Na mbisila ya kumogoha Mulungu yili nhanya na yilizumiliziwa vuduhu lwanilo: Mulungu wafumbulagwa mu muvili gwa munhu, wagololagwa mugati na Roho, wavonagwa na vamalaika, watanizivagwa mugati na vapagani, wasanizivagwa mu liwelelo, wajanagwa mwigulya mu lukumo.