1 Petro 3 - Nyamwezi New Testament 1951

¹ Sisyo sisyene inwe vakima muvadonhoke vagosi vinwe, kigele, ulu vamo mugati navo vakavile kugudonhoka muhayo, vagadwe vuduhu muhayo mugati na kisimizile cha vakima vavo,

² ulu valikilola kisimizile kinwe kisoga mugati na kogoha.

³ Fivembwa fyavo fileke kuvi fya hanze kitisi mavusuke ga nzwili na kuzwala fivembwa fya dhahabu na myenda misoga,

⁴ sumbwa five fya munhu wa mugati na moyo, homwene akavile kuvonwa, mugati na fivembwa fya roho nkondu na ndekanu, hofyene fikavile kuzimanguka, na hofyene fili na mupango hambele na Mulungu.

⁵ Kwisi sisyo sisyene kale vakima vasondo, hovene vamwisigizaja Mulungu,

⁶ vivembage mugati na kuvadonhoka vagosi vavo; kitisi Sara wamudonhokaga Abrahamu na wamwitanaga guku, na inwe mwavile vana vakwe ulu mulita tusoga, na mukavile kukangwa na kinhu kimo.

⁷ Na sisyo sisyene vagosya, mwikale na masala na vakima vinwe kitisi fiseme fikavile na nguzu kitisi inwe, na muvakuzye kitisi vasaliki vikinu va kipanwa cha vuzuvuku, kwigela ngʼo kulomba kwinwe kuhangiliziwe.

⁸ Haho, muve va moyo gumo, muve na lusungu, muvatogwe vadugu,

⁹ muve na kigongo na vadekanu, na muleke kusyokezya kavi ku kavi, ninga nduki ku nduki, sumbwa muvadosye, kwisi ku yeniyi mwitanilwe, kigele musalike luvango.

¹⁰ Kwisi, Homwene alikova vuzuvuku Na kuvona nsiku nsoga alulindile lulimi lwakwe hambele na tuvi, Na milomo yakwe yileke kuyomba vulamba,

¹¹ Isunde kufuma tuvi, na ite tusoga; Akukove kuhola, na akulonde.

¹² Kwisi minso gamwa Guku galivalola vagololoku, Na matwi gakwe galidegeleka kulomba kwavo; Alisi vusyu wamwa Guku vuli kwigulya na venavo valita tuvi.

¹³ Nani akumukenagula inwe, ulu muligangadika ku

¹⁴ vezya tusoga? Alisi nulu mukuduka kunguno ya vugololoku muli velukilwa. Muleke kuvogoha venava na kukangwa.

¹⁵ Mumusondohye Guku Kristo mu myoyo yinwe, na hanahana muve tayari kumwitavuka kila umo homwene alimuvuzya inwe kunguno ya isigizyo lyenili lilimo mugati ninwe, alisi mugati na vudekanu na kogoha.

¹⁶ Na muve na moyo gwa pe, kigele venavo valimulembekezya inwe kitisi vakenaguzi vapondwe nsoni, ulu valikidukana kisimizile kinwe kisoga mugati na Kristo.

¹⁷ Kwisi kudukiwa kunguno ya kwita tusoga, ulu Mulungu alikova, kuli kusoga kukila kudukiwa kunguno ya kwita tuvi.

¹⁸ Kwisi Kristo mwene wadukaga kamo kunguno ya mavukenaguzi, mugololoku ha lwande lwa vigomu, kigele atutongeke iswe kumwa Mulungu, wavulagagwa ha muvili, alisi wazuvukivagwa mu roho.

¹⁹ Na syenisyo wajaga kutanizya ku va ha

²⁰ mizimu hovene vavagi mu kifungo, venavo hovene kale vavagi nʼivengwe, aho vulembezu wa Mulungu walembelaga mu nsiku zyamwa Noa, henaho lyato lyavagi lilizengwa, mugati nalyo vado, vanhu mnane, vapizivilwe ku minzi.

²¹ Genayo gali mukolani gwa kogiwa hokwene lelo kulimupizya inwe, nako kukavile kuzinja zoma zya muvili, sumbwa kuli kikowa kumwa Mulungu kupiwa moyo gwa pe mugati na vuhembuke wamwa

²² Yesu Kristo, homwene walinile kwilunde na aliho ha mulila gwa Mulungu, na vamalaika na mavukovozi na nguzu zitunizivilwe hansilili nawe.