1 Petro 2 - Nyamwezi New Testament 1951

¹ Kunguno yeniyi mwinje kayaya kose na vugulugulu

² vose na vugulumi na ivuva na vutolani, na kitisi velele vavyalilwe itungo lili mugatamanilwe mavele ga lole gakalumilile, kigele kunguno yago mukule ha kupiziwa, ulu mwalavuzizye ati Guku ali musoga.

³ Mwize ha

⁴ mwenuyu ali iwe izuvuku, holyene, ahene, lyataganizivilwe na vanhu, alisi hambele na Mulungu lyasogolilwe na lili ilambu mupango.

⁵ Inwe hovene muli kitisi mawe mazuvuku, muzengwe kuvi numba ya roho na vahozya vasondo, kufumya fitambo fya roho fyatogelilwe na Mulungu mugati na Yesu Kristo.

⁶ Kwisi muhayo gwa vutone guliyomba, Lolagi, ndilikindika mu Siyoni iwe lya kituli, lyasogolilwe ilambu mupango; Na homwene alimusanizya kupondwa ngʼo nsoni.

⁷ Haho mupango gwalyo guli kuwinwe hovene mulisanizya; alisi ku venavo vakavile kusanizya iwe lyenili holyene lyataganizivilwe na vazenguzi, Lyavile iwe lya kituli, Na iwe lya kwikumpa na itale lya kugwila.

⁸ Navo vikumpaga kunguno vakagudonhokile muhayo, na ku yeniyi vakindikilwe.

⁹ Alisi inwe muli igongo lisogolilwe, ivanza isondo lya vahozya va kitemi, va chalo kisondo, vanhu va vutemi, kigele muvutanizye vusoga wa mwenuyu wamwitanaga inwe kufuma mu giti ku lumole lwakwe lwa kukumya.

¹⁰ Kale inwe mwavage mukavile va chalo, alisi lelo muli va chalo cha Mulungu; inwe mwavage mukavonelilwe kisa, alisi lelo mwavonelilwe kisa.

¹¹ Vatoneke, ndimuhana inwe kitisi vageni na valovezi mwilenge ku mavutamanilwa ga muvili hogene galilasa ku myuye.

¹² Muve nacho kisimizile kisoga mugati na vapagani, kigele venavo, kunguno ya milimo yeniyi misoga hoyene vakuyivona, vamukuzye Mulungu ha lusiku lwa kuvonelwa kisa, ku genaya kunguno yago inwe lelo mulilembekeziwa kitisi vakenaguzi.

¹³ Mwitunye hansilili na vuhanya vose wa vanhu kunguno yamwa Guku, ninga mutemi homwene ali muhanya wa mbele,

¹⁴ ninga vanachalo hovene vatumizivilwe nawe kuvaducha vakenaguzi, na kuvakuzya venavo valita kasoga.

¹⁵ Kwisi syenisyo kili kikowa cha Mulungu mugati na kwita kasoga inwe mumumye milomo ya vulele wa vanhu valele;

¹⁶ kitisi vanamiko, alisi ngʼo mugati na kuvutumila vunamiko kuvi ikundikizyo lya kuvisila kayaya, sumbwa kitisi vakumba va Mulungu.

¹⁷ Muvakuzye vanhu vose; muvutogwe vudugu; mumogohe Mulungu; mumukuzye mutemi.

¹⁸ Inwe vakumba, mwitunye hansilili na vaguku vinwe mugati na kogoha kose, ngʼo venavo vasoga na vakondu duhu,

¹⁹ sumbwa na vasinihazu vene. Kwisi yeniyi yilitogezya, ulu umo kunguno alimwizukila Mulungu alivukilizya mamikosi, nulu aliduka vuduhu musango.

²⁰ Kwisi: luli lukumo ki ulu mulivukilizya, ulu mulikenagula na kunguno yeniyi mulitulwa? Alisi ulu mulita tusoga na muliduka vuduhu musango na mulivukilizya, yeniyi, ahene, yilimutogezya Mulungu.

²¹ Kwisi ku yeniyi inwe mwitanilwe, kunguno Kristo mwene wadukile ha lwande lwinwe na wamulekelile inwe lumeho, kigele mugalonde mapambala gakwe.

²² Mwenuyu akitile vukenaguzi, ninga vugulumi vukawinwe mu mulomo gwakwe.

²³ Aho wadukanagwa akasyokizye nduki; aho wadukaga akasemelelile, sumbwa wayitavulaga ku mwenuyo aliyangula kigololoku.

²⁴ Uyu mwenekili wagavukizye mavukenaguzi giswe ku muvili ku musigiti, kigele iswe hovene twafwile ku mavukenaguzi, tuzuvuke ha vugololoku, uyu mugati na mavufyumhulwe gakwe iswe twapizivilwe.

²⁵ Kwisi inwe mwavage kitisi ngʼholo zitagikile, alisi lelo mwapilukile kumwa mudimi na musimamizya wa myuye yinwe.