1vakorinto 5 - Nyamwezi New Testament 1951

¹ Hangi tuligwa mhola ya vusihya mugati ninwe, na vusihya wenuvu vukigelile ninga mugati na vapagani, ati umo ali na mukima wamwa ise.

² Na inwe muliwifunangizya, na mukasayile, kigele mwenuyu homwene witaga mulimo gwenugu ingiwe kuwinwe.

³ Loleyene, nulu ndi haduhu na muvili, alisi ndiho mu roho, namalaga kumuyangula mwenuyu homwene watumamaga

⁴ mulimo gwenugu, kitisi navagiho. Ulu mwivilingaga mu lina lyamwa Guku wiswe Yesu Kristo, inwe na

⁵ roho yane, mu nguzu yamwa Guku wiswe Yesu, kumutavulila Shetani munhu mwenuyu muvili guzimile, kigele roho yipiziwe ha lusiku lwamwa Guku Yesu. Vukumuku winwe vukavile vusoga.

⁶ Mukamanikizye

⁷ ati itumbyo ido lilitumbya itonge lyose? Mupyagule itumbyo ilala kigele muve itonge ipya kitisi mukatulililwe itumbyo; kwisi Pasaka yiswe yatambilwe, homwene Kristo.

⁸ Kunguno yeniyi tuleke kulya sikukulu na itumbyo ilala ninga na itumbyo lya kayaya na vuvi, sumbwa na mukate gukatumbivilwe gwa pe na gwa loleyene.

⁹ Namutonelaga mu barua yane ati muleke kuvi na lusangi na valava.

¹⁰ Henaha nkavile kuyomba vuliko valava va liwelelo lyenili, ninga vʼihuhu, ninga vadumuzi, ninga visenga fimbulimbuli; kwisi ulu mbe yavagi syenisyo, kolaga inwe mufume ku liwelelo lyenili.

¹¹ Alisi lelo ndimutonela muleke kuvi na lusangi na uyo alitanwa mudugu, nawe ali mulava, ninga wʼihuhu, ninga mwisenga fimbulimbuli, ninga mudukani, ninga mukozya, ninga mudumuzi, na mwenuyo muleke ninga kulya nawe.

¹² Kwisi yandima nene kinahe kuvayangula va hanze? Ninwe mukavile kuvayangula va mugati? sumbwa va hanze Mulungu alavayangule.

¹³ Mumwingaje uyo muvi mugati ninwe.