1vakorinto 16 - Nyamwezi New Testament 1951

¹ Lelo kunguno ya lusogo ku vasondo, kitisi nagalagilizaja mavilingano ga mu Galatia, ninwe muvezye sisyo savasava.

² Lusiku lwa mbele mu yuma kila umo atule kiviko ku kaya, kitisi welukilagwa, lusogo luleke kuveziwa aho nkwiza.

³ Alisi aho ndize ndavatumizye na barua venava hovene mukuvasogola, kigele vafifile

⁴ fipanwa finwe ku Yerusalema, na ulu yavela naje nene, haho vakuja hamohene nane.

⁵ Alisi ndize kuwinwe, ulu navita mu Makedonia, kwisi nkuvita mu Makedonia.

⁶ Alisi hamo nkwikala kuwinwe, ninga itungo lya mbeho, kigele munfililizye kwenuko nkujako.

⁷ Kwisi nkatogilwe kumuvona inwe lelo na kuvita duhu, kwisi ndisigizya kwikala kuwinwe itungo,

⁸ ulu Mulungu watogwa. Alisi nkwikala ku Efeso kusika Pentekote,

⁹ kwisi nalugulilagwa muzigo muhanya na gwa milimo mingi, na vakandi vingi valiho.

¹⁰ Lelo ulu Timoteo alize, haho mwikomye ikale kuwinwe vuduhu vova; kwisi alitumama milimo ya Mulungu kitisi nene.

¹¹ Kunguno yeniyi kuduhu munhu amuvengelezye, sumbwa mumufililizye mu kuhola kigele ize kuwane; kwisi ndimulembela hamohene na vadugu.

¹² Alisi kunguno ya mudugu wiswe Apolo namwikumbilizaja muno ize kuwinwe hamohene na vadugu; alisi akatogilwe vuliko kuja hagisi; alisi alize ulu akuvona itungo.

¹³ Muve minso, mwimile kijamu mwisanizyo, muve vagosya, muve va nguzu.

¹⁴ Gose hogene muligita gatumamwe mu kutogwa.

¹⁵ Lelo ndimwikumbilizya, vadugu, (mulivamanicha va numba yamwa Stefano, ati vali va mbele mu Akaya,

¹⁶ navo vifumaja venekili kuvatumamila vasondo), kigele ninwe mwitunye hansilili na venavo na kila umo homwene aligwasya mu milimo na aligangadika.

¹⁷ Alisi ndideha kunguno ya kwiza kwamwa Stefano na Fortunato na Akaiko; kwisi venava vanhulikaja nene mu nhumbu yane kuwinwe.

¹⁸ Kwisi vansuhuzaja roho yane na zinwe; muvakuzaje vanhu va mutindo gwenugu.

¹⁹ Mavilingano ga mu Akaya galimugisya inwe, Akila na Priskila valimugisya muno mu Guku, hamohene

²⁰ nʼivilingano lilimo mu numba yavo. Vadugu vose valimugisya. Mwigisye na kunonela kusondo.

²¹ Lwenulu luli lugisi lwane nene Paulo na kukono kwane mwenekili.

²² Kila umo homwene akamutogilwe Guku Yesu Kristo afwizilwe.

²³ Guku aliza. Kisa cha Guku Yesu Kristo kive hamohene ninwe.

²⁴ Kutogwa kwane kuve hamohene ninwe vose mu Kristo Yesu. Amen.