1vakorinto 15 - Nyamwezi New Testament 1951

¹ Lelo vadugu, ndimwizukizya Mhola ya Chelu hoyene namutanizaja inwe, nayo mwayanukulaga, na muliwima mugati nayo,

² hangi mulipiziwa kuyo, ulu muliyidima muno mihayo hoyene namutanizaja inwe, ulu yikavile sisyo mwasanizaja cha gele.

³ Kwisi hambele namutanizaja genaya naganukulaga ati, Kristo wagafwililaga mavukenaguzi giswe, kitisi vutone vuliyomba,

⁴ na ati wazikagwa, na ati wahembukivagwa ha lusiku

⁵ lwa vudatu, kitisi vutone vuliyomba; na ati wigelaga

⁶ kumwa Kefa, haho ku vʼikumi na vavili; haho wigelaga ku vadugu kukila magana atano hitungo limo, mugati navo vingi valizuvuka kusika lelo, alisi vamo vagulalile;

⁷ haho wigelaga kumwa Yakobo, haho ku vatume vose;

⁸ alisi ha mhelo ya vose wigelaga kuwane, kitisi umo wavyalagwa aho itungo lyakwe litali.

⁹ Kwisi nene ndi mudo mugati na vatume, na nkasikile isima kwitanwa mutume, kunguno nalidukaja ivilingano lya Mulungu.

¹⁰ Alisi ku kisa cha Mulungu ndi syenisi, na kisa chakwe hochene nakipivagwa kikavile cha gele; alisi natumamaga munogwene kukila venavo vose, alisi nkavile nene, sumbwa kisa cha Mulungu hochene chavagi hamohene nane.

¹¹ Ninga ulu nene ninga venavo, syenisyo tulitanizya, na syenisyo mwasanizaja.

¹² Lelo ulu Kristo alitaniziwa ati wahembukivilwe ku lufu, mutindoki vamo mugati ninwe valiyomba ati

¹³ kuduhu vuhembuke wa vafwile? Ulu kuduhu vuhembuke wa vafwile, mbe Kristo nawe akahembukivilwe;

¹⁴ alisi ulu Kristo akahembukivilwe, mbe vutanizya wiswe

¹⁵ vuli wa gele, nalyo isanizyo linwe lili lya gele. Ahene, niswe twavonagwa kitisi vasangilwa va vulamba va Mulungu; kunguno twamusangilagwa Mulungu ati wamuhembukaja Kristo, homwene akamuhembukizye, ulu vafwile vakavile kuhembukiwa.

¹⁶ Kwisi ulu vafwile vakavile kuhembukiwa, mbe Kristo nawe akahembukivilwe;

¹⁷ na ulu Kristo akahembukivilwe, mbe isanizyo linwe lili lya gele, na mutali muli mu mavukenaguzi ginwe.

¹⁸ Haho navo vagulalile mu Kristo vazimilile.

¹⁹ Ulu twamwisigizaja Kristo mu vuzuvuku wenuvu duhu, mbe tuli vapina kukila vanhu vose.

²⁰ Alisi lelo Kristo wahembukivilwe ku lufu, wa mbele wa venavo vagulalile.

²¹ Kwisi kunguno lufu lwaletagwa na munhu, sisyo savasava vuhembuke wa vafwile waletagwa na munhu.

²² Kwisi kitisi vose vafwile mu Adamu, sisyo savasava vose vakuzuvukiwa mu Kristo.

²³ Alisi kila umo mu mwilondo gwakwe: Wa mbele Kristo, haho venavo vali vamwa Kristo mwitungo lya kwiza kwakwe.

²⁴ Haho yilaveho mhelo, aho alamupe Mulungu Vava vutemi, ulu waliwavuzimangukaja vutemi

²⁵ vose, na vukovozi vose, na nguzu. Kwisi yilimudima uyu kutema, kusika wavatulaga vanisi vakwe vose hansilili na magulu gakwe.

²⁶ Mwanisi wa mhelo homwene alazimangukiwe ali lufu.

²⁷ Kwisi Uyu watulaga gose hansilili na magulu gakwe. Alisi ulu aliyomba, Gose gatulilwe hansilili, yili welekela ati vuduhu mwenuyu homwene wagatulaga gose hansilili nawe.

²⁸ Na ulu gose gatulilwe hansilili nawe, haho Mwana mwene nawe akutulwa hansili nawe, homwene wagatulaga gose hansilili nawe, kigele Mulungu ave gose mugati na vose.

²⁹ Ninga vakugadaki hovene valogiwa kunguno ya vafwile? Ulu vafwile vakavile kuhembukiwa, kuki

³⁰ vogivilwe kunguno yavo? Kuki niswe tulimo mu

³¹ misyolo saa zyose? Loleyene, ulu kwikumilizya kwane, vadugu, kulimo mugati ninwe, ndifwa nsiku zyose mu Kristo Yesu Guku wiswe.

³² Ulu nene, kitisi munhu ungi, nalasanaga na manwele mu Efeso, ndi na vusulu ki? Ulu vafwile vakavile kuhembukiwa, tulye

³³ na tunwe, kwisi igolo tulafwe. Muleke kwipuvila, lusangi na vavi lulivipya nsembo nsoga.

³⁴ Muvalaganage kitisi yilisika, na muleke kukenagula; kwisi vamo vakamumanikizye Mulungu; ndiyomba yeniyi kumuponda nsoni.

³⁵ Alisi vamo vakuyomba, Vafwile valihembukiwa kinahe?

³⁶ na valigela na mivili ya mutindoki? Muhumbu veve, hogene uligaviva gakavile kupanguka ulu gakafwile.

³⁷ Nago hogene uligaviva, ukavile kuguviva muvili gulave, sumbwa luveke luli duhu, luve lwa ngano ninga lwa mutindo gungi.

³⁸ Alisi Mulungu alilupa muvili kitisi watogwa, kila luveke muvili gwalo.

³⁹ Nyama zyose zikavile nyama zya mutindo gumo, sumbwa yingi ya vanhu, yingi ya ngʼombe, yingi ya manoni, yingi ya nsomba.

⁴⁰ Hangi ziliho mivili zya mwilunde na mivili zya kuliwelelo; alisi lukumo lwazyo zya mwilunde luli heke, na lukumo lwazyo zya kuliwelelo luli heke.

⁴¹ Lukumo lwa limi luli heke, na lukumo lwa mwezi luli heke, na lukumo lwa masonda luli heke, kwisi lukumo lwʼisonda limo lulilekana na lukumo lwa lingi. Sisyo sisyene vuhembuke wa vafwile.

⁴² Guliviwa mu vuvozu, na gulihembukiwa vuduhu vuvozu;

⁴³ guliviwa mu nsoni, gulihembukiwa mu lukumo; guliviwa mu vusakazu, gulihembukiwa mu nguzu; guliviwa muvili gwa vutundwa, gulihembukiwa muvili gwa roho.

⁴⁴ Ulu guliho muvili gwa vutundwa, haho guliho gwa roho savasava.

⁴⁵ Sisyo savasava yitonilwe, Munhu wa mbele Adamu wavagi kitundwa kizuvuku, Adamu wa mhelo wavagi roho ya kuzuvucha.

⁴⁶ Lelo muvili gwa roho gukavile kutongela, sumbwa gwa vutundwa, haho gwenugu gwa roho.

⁴⁷ Munhu wa mbele wafumaga ku nsi, wa vulongo; munhu wa vuvili wafumaga kwilunde.

⁴⁸ Kitisi uyo wa vulongo wavagi, sisyo sisyene avo va vulongo; na kitisi uyo wa mwilunde wavagi, sisyo sisyene avo va mwilunde.

⁴⁹ Na kitisi twamwikolaga uyu wa vulongo, sisyo sisyene tulamwikole uyo wa mwilunde.

⁵⁰ Lelo ndiyomba genaya vadugu ati, nyama na magazi gakakovolile kusalika vutemi wa Mulungu, ninga vuvozu vukavile kusalika wenuvu vukavile na vuvozu.

⁵¹ Lolagi, ndimuwila muhayo gwa lwiviso, Tulaleke kugulala vose;

⁵² alisi vose tulapilulwe; mu katungo kado, mu kisalasala kimo, ha kalumbete ka mhelo; kwisi kalumbete kalalile, na vafwile valahembukiwe vuduhu vuvozu, niswe tulapilulwe.

⁵³ Kwisi kolaga vuvozu wenuvu vukuzwala wenuvo vuli vuduhu vuvozu; na wenuvu wa lufu vukuzwala wenuvo vuli vuduhu lufu.

⁵⁴ Alisi ulu wenuvu wa vuvozu wavuzwalile wenuvo vuli vuduhu lufu, haho gukukwila muhayo hogwene gutonilwe:

⁵⁵ Lufu lwamilagwa na vukinde. Lufu, kuhe vukinde wako?

⁵⁶ Lufu, kuhe vusungu wako? Vusungu wa lufu vuli vukenaguzi, na nguzu zya vukenaguzi

⁵⁷ zilifuma ku ngʼhama. Alisi kalumbilo kumwa Mulungu, homwene alitupa vukinde ku Guku wiswe Yesu Kristo.

⁵⁸ Kunguno yeniyi, vadugu vane vatoneke, muve vajamu, vuduhu kutinginiwa, mugangadike mu milimo ya Mulungu hanahana; kwisi mulimanicha ati milimo yinwe yikavile ya gele mu Guku.