Yohani 8 - Tesitamenti Umupwa 1965

Umwantanda we vamulemile muluvembu

¹ UwenʼuYesu ahavala pigamba lya Mavula.

² Ahalavila shanzanche ukuvala mwa tempeli nohavili, pʼavantʼimpuga yonti vahavala pupo pʼali. Uwenʼahatendama, ahavasambilizya.

³ Ilelo pe navamanyakalata navaFalisayi vahaletʼumwantanda we vamwazile paluvembu, vahamuviha pe pahati.

⁴ VahamuvuzyʼuYesu vahati: We Musambilizi, umwantandʼuno vamwazile paluvembu lwʼahavembuha.

⁵ Munkomelezyo lelo mwʼatuhomelezizyʼuMose atili venga vali vovulo, ve muvatinzaje namavwe. Vulʼiwe lelo, ukuti vuli?

⁶ Zye vahayangaga izya kumulinga she vatili tuve nazyo izya kumulonjelela. UwenʼuYesu ahinama, ahasimba nulwove pansi.

⁷ Ayazile lelo vumishizizye ukumuvuzilizya, pʼahinuha, ahati: Umusitamalandu mumwo mwe muvaliye imwe munumu wʼatalishʼukumutinza nivwe.

⁸ Havilʼuwene ahinama, ahasimba nulwove pansi.

⁹ Avene lelo lwe viṿuye linili pe lihavamena muhati zyavo, vahafuma kunzi woka woka, vahataliha ve vasongo vahalandata nava pampelela. AhasyalʼuYesu weka numwantanda wʼayimiliye pahati pupo.

¹⁰ Ilelo lwʼayinusilʼuYesu, pʼahamuvuzilizyʼumwantanda ahati: We mwantanda, vali kwi ve vakulonjelelaga? Atakulonzile numo ilya kukutupula?

¹¹ Uwenʼahamula ahati: Ndali numo, Mwene. PʼuYesu ahamuvuzya ahati: Pe fwane nane ntakukulonga ilya kukutupula. Valaga lelo, utavuyizyaje ukutalamalandu nohavili.

Uluhozyo lwa nsi

¹² PʼuYesu ahavuyizyʼukuyanga navo ahati: Nene ne luhozyo lwa nsi. Uno wengʼakundandatʼine, wʼatalijenda mushisi ndali, aliva nuluhozyo lwa vulanzi.

¹³ PʼavaFalisayi vahamuvuzya vahati: Yenya, ukuyihomeshezya wenewe weka, uluhomeshezyo lwaho lute lwa nalyoli.

¹⁴ AhamulʼuYesu ahavavuzya ahati: Pope nashenga nkuyihomeshezya nene neka, pope pʼuluhomeshezyo lwane lwa nalyoli, shʼimanyilʼine nakwe mfumile nakwe nkuvala, imwe nyene mutamanyile nakwe mfumile nakwe nkuvala.

¹⁵ Imwe mukulonga pe mukumwenyelezya mumuvili munzʼumuntu. Ine nyene ntakumulonga numo.

¹⁶ Pope nashenga nkulonga gamʼine, pope pʼuvulonzi vwane vwa nalyoli, she nte nene neka ndali, tuli swenti nane nuTata wʼantumilʼine.

¹⁷ She mwope namunkomelezyo zyinyu mwe lisimṿilwe ilya kuti: Uluhomeshezyo lwa vantu vavili lwe lwa nalyoli.

¹⁸ Nane ne nkuyihomeshezya nene, nuTata wʼantumilʼine wope akunkomeshezya.

¹⁹ Pe vahamuvuzya vahati: Ali kwi uSo? AhamulʼuYesu ahati: Nane mutamanyile, nuTata mutamumanyile. Inga mumanyilʼine, pe nkandi mumumanyile nuTata.

²⁰ Agenʼamazwi ganaga ahayangaga pavutajilo uvwa kutajila mumwo iṿwa kusangulizanya, lwʼakusambilizya mwa tempeli. Ahasova numo uwa kumulema avene, shʼashili pahavalilizyo nakwe.

Insoshe kuzya lunanjiho lwe lukwinza

²¹ AhavuyizyʼuYesu ukuvavuzya ahati: Ine nkuvala, imwe mulinanzaga, mulifwanga mumalandu ginyu. Kwe nkuvalʼine, kwe mutalivalʼukufiha kukwʼimwe.

²² PʼavaYuda vahavuzilizanya vahati: Ingavanga akuyigoga weka shʼakuti: Kwe nkuvalʼine, kwe mutalivalʼukufiha kukwʼimwe.

²³ Uwenʼahati: Imwe mufumile pansʼipa, nkandʼine mfumile kumwanya. Imwe mufumile munsʼino, nkandʼine ntafumile munsʼino.

²⁴ Mwe munumu mbavuzizye ntili mulifwanga mumalandu ginyu. Shʼinga mutakunitiha ine izya kuti: Nkwe nene, pe mulifwanga mumalandu ginyu.

²⁵ Pe vahamuvuzya vahati: We nanu lelʼiwe? UwenʼuYesu ahavamula ahati: Ne wuyo we mbavuzizye shima ntili ne shitʼulive.

²⁶ Ine ndi nazyʼinyinji nizya kuvayanga imwe nizya kuvalonga. Nkandʼuno wʼantumilʼine we wa nalyoli, nane zye niṿuye kuli wuyo, zye nkuyivuzyʼinsi.

²⁷ Avene vatahamanyinsanya ukuti akutaha we Yise.

²⁸ PʼuYesu ahavavuzya ahati: Inga lumo inga mwinzilʼukumuvusyʼuMwanamuntu pe mulimanyinsanya izya kuti: Nkwe nene, havili ukuti zyonti zye nkuvomba ine ntakuvomba nazimo nene neka ndali, nkandi zizyo zyengʼambuzizyʼuTata zye nkuyanga zizyʼine.

²⁹ Uwenʼuno wʼantumilʼine we ndi nawo ine. Uwene atakundeha nene neka ndali, shʼine shima nkuvomba zizyo zye zikumuyanana wuyo.

³⁰ Ilelo lwʼakuyanga zinizi pe vahamwitiha avinji.

Ukudalinkana navaYuda

³¹ PʼuYesu ahavavuzyaʼavaYuda ve vamwitisile ahati: Inga mukusyelemetela mumazwi gane, pe mukuva mwe vasundikwa vane nalyoli;

³² pe mulimanyinsanya uvwanalyoli, ilelo pʼuvwenʼuvwanalyoli vulivatavuzya.

³³ Avene vahamwamula vahati: Swe mbeyu ya Abulahamu iswe, tutakonzile nalumo kumuntu numo uwa kuva swe vazya vakwe. Ilelo ukuyanga vuli ilya kuti: Muliva mwe vatavushe?

³⁴ PʼuYesu ahavavuzya ahati: Nalyoli lyoli nkuvavuzyʼine nkuti: Vonti venga vakutalʼamalandu, ve vazya va vutalamalandu.

³⁵ Uwenʼumuzya atakuva munyumba shima ndali, nkandi uwenʼumwana wʼakuvanga shima.

³⁶ Apene lelo ingʼakuvasatula we Mwana, pe mwe vasatushe nalyoli.

³⁷ Imanyile nane ukuti mwe mbeyu ya Abulahamu imwe, nkandi mukwanzʼukungogʼine, shʼamazwi gane gatakuvahola.

³⁸ Nkuyanga zizyo zye nkwenya kwa Tata, namwe mukuvomba zizyo zye mwiṿuye kwa so imwe.

³⁹ Avene vahamula vahamuvuzya vahati: Iswe utata we Abulahamu. UwenʼuYesu ahati: Mupele mwe vana va Abulahamu, nkandi mukuvomba zizyo zyʼahavombaga uAbulahamu.

⁴⁰ Shinishi imwe mukwanza ukungogʼine ne muntu wʼavavuzizye izya nalyoli, zye niṿuye kwa Mulungu. Zye atahavombaga uAbulahamu.

⁴¹ Imwe mukuvomba zye mbombo zya so imwe. Pʼavene vahamuvuzya vahati: Iswe tute swe vana va mwisole. Tuli nuTata woka mwene wʼuMulungu.

⁴² AhamulʼuYesu ahati: Apele ali wʼuso imwe uMulungu pe nkandi munkunzite nane, shʼine mfumile kwa Mulungu lwe ninzile munsi munumu, ntayitumile neka lwe ninzile ndali, antumile wuyo.

⁴³ Mutakumanyinsanya shonu injango yane? Shʼizwi lyane lye nkuyanga mupositwe ukutejelezya.

⁴⁴ Imwe mwe vana va so, va mukwakwa, mwe mumwo mukasimʼukuvomba zizyo zyʼapapiye uso imwe. Uwene mugogavantu shima, ukufuma pavwando, uwene atakwimilila muvwanalyoli, shʼuvwanalyoli navumo mumwakwe. Uwene lwʼakuyanga izyʼilenga, pʼakuyangʼizyakwe, shʼali mulumilenga, ali wʼuyise wʼilenga.

⁴⁵ Ine nyene mutakunitiha imwe, she nkuyanga zye zya nalyoli.

⁴⁶ Kulʼimwe ali kwi woka uwa kumenelezya gamo amalandu ine? Apene lelo inga nkuyanga zye zya nalyoli, pe mutakunitiha shonu?

⁴⁷ Uno wengʼafumile kwa Mulungu, wʼakwiṿwʼamazwi ga Mulungu. Mwe mumwo mutakwiṿwʼimwe, she mutafumile kwa Mulungu.

⁴⁸ Pe vahamulʼavaYuda vahamuvuzya vahati: Amwe tutakulovosya lelo lwe tukuti: We muSamaliya, lwe tukuti: Uli nimpepʼimbivi iwe?

⁴⁹ AhamulʼuYesu ahati: Ine impepʼimbivi nte nayo ndali, ine nkumushindiha uwenʼuTata, nkandʼimwe mukunsufwʼine.

⁵⁰ Ine nyene ntakuyanzilʼulushindiho lwane nene neka ndali, nkandʼalipo wʼakunanzila, wʼakulonga.

⁵¹ Nalyoli lyoli nkuvavuzyʼine nkuti: Uno wengʼizwi lyane akulisajila, wʼuvufwe atalivulola nalumo.

⁵² PʼavaYuda vahati: Shinishi uloleshe ukuti uli nimpepʼimbivi. ShʼuAbulahamu afuye navakuvwi vovulo, havilʼiwe ukuti: Uno we izwi lyane akulisajila, wʼatalitoma nalumo uvufwe.

⁵³ Ingavanga we mupiti nakwa tata Abulahamu wʼafuye? Vope navakuvwi vafuye. Ukuyipimbiliha mwe mushonu iwe?

⁵⁴ AhamulʼuYesu ahati: Inga nkuyishindiha neka ine, pe nkandi ulushindiho lwane lute lushindiho ulwene. AlipʼuTata, wʼakunchindiha uwene, wuyo namwe mukuti we Mulungu winyu.

⁵⁵ Imwe nyene mutamumanyile nalumʼuwene, nkandʼine imumanyile. Inga nati ntinji ntamumanyile, pe ne mulumilenga fwe mwenemwe. Nkandʼimumanyile, nizwi lyakwe ndisajiye.

⁵⁶ UwenʼuAbulahamu uso imwe ahadova lwʼayiṿuye ukuti aliyenyʼisiku lyane. Ilelo ahalyenya, pʼahaseshela.

⁵⁷ PʼavaYuda vahamuvuzya vahati: Utamazilʼamaha amashumi gasano, havili ukuti imuwenyi uAbulahamu?

⁵⁸ UwenʼuYesu ahavavuzya ahati: Nalyoli lyoli nkuvavuzyʼine nkuti: Lwʼashili ukupapwa Abulahamu, pe nalipʼine.

⁵⁹ Pe vahasevʼamavwe vahati tumutinze. UwenʼuYesu ahavelenguha ahafuma mwa tempeli.