Yohani 6 - Tesitamenti Umupwa 1965

Ukulisya avantu 5,000

¹ Pisinda pazinizi pʼuYesu ahavuha, ahajenda kwisyila lila lya sumbi wa mu-Galilayi, wa ku-Tibeliya.

² Pe vahamulandatʼavantʼimpugʼimpiti, she vawenyi iṿimanyilo ṿwʼahapelaga pavavinu.

³ UwenʼuYesu ahazuva pigamba, pʼahatendama navasundikwa vakwe.

⁴ Uwenʼuchaka wa vaYuda we vakuti uPasa, wʼapalamiye.

⁵ UYesu lwʼatinzite nenye kukwʼaminso, pʼahaga avantʼavinjʼimpugʼimpiti vakwinza pʼali. PʼahamuvuzyʼuFilipu ahati: Amakati ga kulya vontʼavantu vanava amwe tukale kwi?

⁶ Zizyo nyene zyʼahayanga zyalʼizya kumulinga, shʼuwene azimanyile zyʼakwʼavombaje.

⁷ UwenʼuFilipu ahamwamula ahati: Amakati ga pamadinali 200 gatakukwila, gakuvasovela gope, nashenga vakuposhela hansi, unʼahakwe, unʼahakwe.

⁸ Pʼahamuvuzya wokʼumusundikwa wakwe, uAndeleya umuzuna wa Simoni Peteli, ahati:

⁹ Halipo panapa ahalumendo hoka halesite namakati ga ngana gasano ninswi zivili. Ṿwe ṿihole lelo avantu nuvwinji ṿiniṿi?

¹⁰ UYesu ahati: Simuvavuzyʼavantu vatendame pansi. Ilyenʼisole lyalʼilyinji pupo. Pe vahatendama pansi. Uvwinji vali fwe ngati 5,000, ukuvavazyʼavanaṿuli vwelele.

¹¹ PʼuYesu ahasendʼamakati ganaga, ahasalifwa, ahavagavanya vuvo ve vatendime. Zyope ninswi vovulo, ahavapa mwe vasungwilwe.

¹² Ilelo lwe vikusi, pʼahavavuzyʼavasundikwa vakwe ahati: Muvunganishʼutulagala twe vatulesile, natumo tutatajishe.

¹³ Pʼavene vahavunganiha utulagala twa makati ga ngana gasano gugo, twe valeshe vuvo ve valiye, vahizuzyʼiṿiseje ishumi naṿivili.

¹⁴ Avenʼavantu lelo lwe vawenyi ishimanyilo isho, shyʼapezilʼuYesu, pe vahati: Wuyo nalyoli we mukuvwi we vatili ukwinza munsʼumu.

UYesu akuyeleleha nukujenda paminzi pamwanya

¹⁵ UwenʼuYesu lelo lwʼayazile vakuti tumuleme, tumutemwe, ave wʼumwene witu, pʼahashimbilila pigamba nohavili, pʼahayeleleha uwene.

¹⁶ Avenʼavasundikwa vakwe vahagʼuvusiku vwila, pe vahiha ukuvala kwa sumbi.

¹⁷ Vahayipashila mwivoti, vahati tulambʼusumbi, tuvale mu-Kapelinahumu. Ilelo shope nishisi shihavagwila, uwenʼuYesu nyene lwʼatavinziye suti.

¹⁸ Uwenʼusumbi nyene ahahalambana, shʼinkungu yihakulʼimpiti.

¹⁹ Ilelo lwe valinzile vapezile imayili zitatu ingavanga zine, pe vahaga uYesu akuhanya akujenda pasumbi, vahaga asyaye pansi ukufiha kwivoti lyavo. Pe vahatetema.

²⁰ Uwene nyene ahavavuzya ahati: Nkwe nene, mutatetemaje.

²¹ Ilelo lwe vakuti tumusende mwivoti, pe vahaganduha ivoti lifisile luvilo luvilo kunsi kwe vahavalaga.

Avantu vakwanzʼishimanyilo

²² Shandavi lelo pʼavantu impuga yonti ve vimiliye pisyila lila pasumbi vahenya ukuti litalipo nalimʼivoti ilyamwavo, havili ukuti uwenʼuYesu atayipashiye navasundikwa vakwe mwivoti, nkandi vali vekʼavasundikwa vakwe lwe vakuvuha.

²³ Agamwavʼamavoti gahafuma mu-Tibeliya, gahinza papipi pala pe vamaliyʼumukati lwʼuMwene asalifizye.

²⁴ Avantu lelo impuga yonti, lwe vazile vatalipo pupo nuYesu navasundikwa vakwe, pe vahayipashila vuvo mumavoti, vahalambʼukuvala mu-Kapelinahumu, vahamwanzʼuYesu.

²⁵ Ilelo lwe vavazile vamwaga isyila lila, pe vahamuvuzilizya vahati: Labi, ipa uyinzile shali?

Umukati umupelavulanzi

²⁶ UwenʼuYesu ahavamula ahati: Nalyoli lyoli nkuvavuzyʼine nkuti: She mukunanzʼine pe mutakunanzila zizyo zye muwenyi ivimanyilo ndali, nkandi zizyo zye muliyʼamakati, mwikusi.

²⁷ Mwe, zye ndali ukuyikungula kuṿintu ṿwe ṿikutega, nkandi kuṿintu ṿwe ṿikusyala nakuvulanzi vwa shimashima, vwʼuMwanamuntu akuti mbapanje. Uwene we wuyo wʼuYise, uMulungu, amuvisile ukuva shimanyilo sha kumwitishila.

²⁸ Avene vahamuvuzilizya vahati: Tutuvuli lelo ukuyikungula kumbombo zya Mulungu?

²⁹ AhamulʼuYesu ahavavuzya ahati: Iyenʼimbombo ya Mulungu ye ya kumwitiha wuyo wʼamutumilʼuwene.

³⁰ Pʼavene vahamuvuzya vahati: Ukupelʼishimanyilo vuli iwe, ukuti twenye, ukuti twitishile mumwʼiswe? Ukuvombʼishonu?

³¹ Avatata iswe she vahalyangʼumana mulwugwa, inza she lilyo lisimvilwe lye likuti: Ahavapʼiṿwa kulya ukufuma kumwanya, ukuti valye.

³² PʼuYesu ahavavuzya ahati: Nalyoli lyoli nkuvavuzyʼine nkuti: Ate wʼuMose wʼavapiye iṿwa kulya ṿwa kumwanya yila, we wʼuTata ine wʼakuvapʼiṿwa kulya ṿwa kumwanya iṿwa nalyoli.

³³ Shʼiṿwenʼiṿwa kulya ṿwa Mulungu ṿwe ṿiṿwo ṿwe ṿifumile kumwanya, ṿwe ṿikuyipʼuvulanzi insi.

³⁴ Pʼavene vahati: Mwene, ṿwʼutupanje shima iṿwa kulya ṿiniṿi.

³⁵ PʼuYesu ahavavuzya ahati: Nene ne ṿwa kulya ṿipelavulanzi nenene. Uno wengʼakwinza kukwane, wʼitalimulumʼinzala, uno wengʼanitisilʼine, wʼataliyumilwa nalumo.

³⁶ Ilyene lilyo lye navavuzizye natili: Ukunenya kwe mumbwenyi, nkandi mutitisile.

³⁷ Vonti vuvo vengʼakumpʼuTata, ve vakwinza kukwane. Havili uno wengʼakwinza kukwane, we nane ntalimubunchilizya kunzi nalumo.

³⁸ She nisile mfumile kumwanya, nkandi ntinzile ukuvomba zizyo zye nkasime nenene ndali, ninzilʼukuvomba zizyo zyʼakasime wuyo wʼantumile.

³⁹ Uwene wʼantumilʼine, zyʼakasime ukuti vonti vʼampiyʼuwene mwe vavaliye ukuti ntamulejelezyaje numo ndali, nkandʼukuti mbazyusye vonti pisiku lya pampelela ine.

⁴⁰ ShʼuwenʼuTata zyʼakasimʼukuti vonti ve vakumwenyʼuMwana, ve vakumwitiha wuyo, ukuti vavwajʼuvulanzi vwa shimashima. Ilelo pe nane ndivazyusya pisiku lya pampelela.

⁴¹ Pe vahasyonganʼavaYuda shʼatili: Nene ne ṿwa kulya ṿwe ṿifumile kumwanya.

⁴² Avene vahati: Amwe ate wʼuYesu umwana-Yosefu wununo, tutavamanyile nunyina nuyise? Havili akuti vuli nisile mfumile kumwanya?

⁴³ AhamulʼuYesu ahavavuzya ahati: Mutasyonganaje mwe.

⁴⁴ Numʼatakwinza kukwane, ingʼatakumukwesela kukwanʼuTata wʼantumilʼine, ilelo we ndimuzyusyʼine pisiku lya pampelela.

⁴⁵ Vope navakuvwi vasimṿile vatili: Vonti valiva vasambilizilwa, vʼavasambilizizyʼuMulungu. Vonti vuvo venga vakwiṿwa kwa Tata, vuvo ve vakumanya kukwakwʼinongwa, ve vakwinza kukwane.

⁴⁶ Havili pe mutatinji umuntʼumo amuwenyʼuTata, nkandi uwene wʼafumile kwa Mulungu, wuyo nyene wʼamuwenyʼuTata.

⁴⁷ Nalyoli lyoli nkuvavuzyʼine nkuti: Uno wʼali nulwitiho, wʼali navwʼuvulanzi vwa shimashima.

⁴⁸ Nene ne ṿwa kulya iṿipelavulanzi nenene.

⁴⁹ Avasʼimwe vahalyangʼumana mulwugwa, havili vahafwa.

⁵⁰ Iṿwene ṿwa kulya ṿwe ṿifumile kumwanya, ṿwengʼumuntʼaliye pʼatakufwa.

⁵¹ Nene ne ṿwa kulya ṿwa vulanzi ṿwe ṿifumile kumwanya. Umuntʼuno wengʼaliye iṿwa kulya ṿiniṿi, wʼalilandila shima. Iṿwenʼiṿwa kulya ṿwe ndivapʼine we muvili wane, we ndivapa ukuti ayipelajʼukuvʼuvulanzi vwa nsi.

⁵² Pe vahadalinkanʼavaYuda vahati: Angatupa vuli lelo umuvili wakwe umuntʼuno, ukuti tulye?

⁵³ UwenʼuYesu ahavavuzya ahati: Nalyoli lyoli nkuvavuzyʼine nkuti: Inga mutakulyʼumuvili wa Mwanamuntu, inga mutakungʼwelʼamavanda gakwe, she pe vwe vulanzi mute navwo muhati mumwinyu.

⁵⁴ Uno wengʼakulya umuvili wane, wengʼakungʼwela namavanda gane, wuyo nyene wʼali nuvulanzi vwa shimashima, nane ndimuzyusya pisiku lya pampelela.

⁵⁵ Shʼumuvili wane ṿwe ṿintu ṿwa nalyoli iṿwa kulya, namavanda gane ṿwe ṿintu ṿwa nalyoli iṿwa kungʼwela.

⁵⁶ Uno wengʼakulya umuvili wane, wengʼakungʼwela namavanda gane, wʼakuva mumwanʼine, we nane nkuva mumwakwe wuyo.

⁵⁷ Inza she mulanzʼuTata wʼantumilʼine, she nane nkulandila pe pazya Tata, shʼakuhonzya wope nawuyo wengʼakundyʼine, wʼakulandila pe pazyane.

⁵⁸ Vwe ṿwa kulya ṿiniṿi ṿwe ṿifumile kumwanya, iṿwene ṿite fwe wʼumana ndali, we vahalyʼavaso, havili vahafwa; iṿwene wengʼakulya wʼakulandila shima.

⁵⁹ Zyʼahavavuzya musinagogi lwʼakuvasambilizya mu-Kapelinahumu.

Avasundikwa va maganigani

⁶⁰ Vamo nyene avasundikwa vakwʼavinji lwe viṿuye zinizi pe vahati: Ligomʼizwʼili lyʼakuyanga, lyʼunanʼatinji atejelezyaje?

⁶¹ UwenʼuYesu shʼamanyile muhati mumwakwe avasundikwa vakwe vakukwinkwina pazinizi zyʼayanzile, pʼahavavuzilizya ahati: Amwe zivapunuzizye zinizi?

⁶² Vuli lelo, inga mukwagʼuMwanamuntu akuzuva, akuvala kukwo kwʼali lulwo?

⁶³ We wʼuMupepo wʼakumupʼuvulanzi umuntu, uwenʼumuvili wʼatakumupa naṿimʼumuntu. Amazwi ge mbavuzizyʼine, we wʼuMupepo, vwe vulanzi gugo.

⁶⁴ She valipo vamo mwe muvaliye imwe ve vatali nulwitiho. ShʼuYesu avamanyile nzila pe pavwando ve vakusita nukwitiha, wope nuwa kumwandila ulwa pisinda ukuti we wushitʼulive.

⁶⁵ Havili ahati: Zye zizyo mbavuzizye ntili: Numo atakwinza kukwane ingʼatamupiyʼuTata ukwinza.

UPeteli akwitihʼukuti uYesu wuChilisiti

⁶⁶ Zye zizyo vamʼavinji avasundikwa vakwe vahandʼukwepa kukwakwe, vahasitʼukujenda nawo.

⁶⁷ PʼuYesu ahavavuzilizya avishumi navavili ahati: Amwe namwe mukasimʼukwepa?

⁶⁸ Pʼahamwamula uSimoni Peteli ahati: Mwene, twepe tuvale kwa nanu? Shʼamazwʼiga gakutupʼuvulanzi vwa shimashima gʼuli nago wenewe.

⁶⁹ Shʼiswe tuli nulwitiho, tumanyinsinye ukuti we Mufinjile wa Mulungu wenewe.

⁷⁰ AhavamulʼuYesu ahati: Lwe mbasavuye nene amwe ntasavuyʼishumi navavili? Havili woka we wʼuSetano.

⁷¹ AhamutahagʼuYuda umwana-Simoni wa mu-Kalyoti. She wʼali wa kumwandila pisinda, ali woka wa vishumi navavili.