Yohani 17 - Tesitamenti Umupwa 1965

Uluputo lwa Yesu

¹ Lwʼayanzile zinizʼuYesu, pʼahinulʼaminso gakwe, ahenya kumwanya, ahati: We Tata, hinzilʼahavalilizyo. Umupanjʼuvupiti uMwana waho, wope nuMwana waho pʼakupanjʼuvupiti nawe.

² Shʼumupiyʼavantu vonti ukutʼavanje mwenesho, vontʼava vʼumupiye ukuti avapanjʼuvulanzi vwa shimashima, unʼuvwakwe unʼuvwakwe.

³ Uvwene nyenʼuvulanzi vwa shimashima vwe vunuvu inga vakumanyile we Mulungu wa nalyoli wenewe weka, nuno wʼumutumilʼuYesu Chilisiti.

⁴ Ine nkupiyʼuvupiti munsʼumu, imazilʼimbombo yʼumpiye iwe utili uvombaje.

⁵ Shinishi lelo we Tata, nawʼumpanje nanʼuvupiti vwane kukwaho kunukwo, vwe nali navwo kukwaho kunukwo lwʼishili nukuva insi yonti.

⁶ Mbakupuliyʼizina lyaho avantu vʼumpiye munsʼumu. Vali vaho, ilelo umpiyʼine, avenʼizwi lyaho valivisile mumoyo.

⁷ Shinishi pe vamanyile ukuti zyonti zyʼumpiyʼiwe zifumile kukwaho.

⁸ Shʼinongwa zyʼumpiyʼine zye mbapiye vuvo, avene vaziposheleye, vawenyi nalyoli ukuti mfumile kukwaho, ilelo pe vitisile izya kuti untumile wenewe.

⁹ Ve nkuvataha vuvo ine lwe nkuputa, ntakuyitaha insi yonti ndali, nkuvataha vuvo vʼumpiyʼiwe, she vaho wenewe,

¹⁰ She ṿwontʼiṿwane ṿwe ṿwaho wenewe, ṿwontʼiṿwaho ṿwe ṿwane nenene, ilelʼine ndi nuvupiti mwe mumwavo,

¹¹ Ilelʼine kwe kuva mfumile munsʼumu shinishi, avene nyene vashili vali munsʼumu. Ine nkwinza kukwaho. We Tata mufinjile, uvasunjilile mwe mwizina lyaho lyʼumpiyʼine, vope ukuti vavanje woka mwene vonti, inza she naswe tuli woka.

¹² Lwe nali navo munsʼumu, pe nkavasunjilila mwizina lyaho lyʼumpiyʼine. Ava vʼumpiye iwe ve mbuvatiye, atatezile numo mwe vavaliye, we mwana wa lunanjiho weka, wʼatezile ukuti zilunjihaje zizyo zye zisimṿilwe mwa kalata.

¹³ Shinishʼine nkwinza kukwaho, ilelo zinizi nkuyanga munsʼumu, she nkuti uluseshelo lwane vavanje nalwo vope ulwa vwila muhati zyavo.

¹⁴ Ine mbapiyʼizwi lyaho, mwe mumwo insi yihavapata, she vate va munsʼumʼavene, inza she nane nte ne wa munsʼumu.

¹⁵ She nkulambilizya kukwaho, pe ntakuti uyefwe munsʼumu ndali, nkuti uvasunjilile kumuvivi.

¹⁶ Vate va munsʼumʼavene, inza she nane nte ne wa munsʼumu.

¹⁷ Uvapelaje ukuva ve vafinjile muvwanalyoli, shʼizwi lyaho vwe vwanalyoli.

¹⁸ Inza shʼuntumile munsʼumu iwe, she nkonzizye nane nkuvatuma munsi.

¹⁹ Nkuyifinjila pazyavo she nkuti imbe ne mputile yavo nene, vope ukuti vayipelajʼukuva ve vafinjile muvwanalyoli.

²⁰ Ilelo ntakuvalavila vuvo veka ndali, nkuvalavila navuvo venga vakwinza ukunitiha ine pizwi lyavo vuvo,

²¹ vontʼukuti vavanje woka mwene, inza she nawe we Tata, uli mumwanʼine, nane ndi mumwaho iwe. Vope vavanje mumwitʼiswe, ilelo mwe mumwʼinsi yijende ukwitiha ukuti untumilʼiwe.

²² Vwope nuvupiti vwe wamampiyʼiwe vwe mbapiye vuvo ine, ukuti vope vavanje woka mwene, inza she naswe tuli woka mwene.

²³ Ine mumwavo vuvo, havilʼiwe mumwanʼine, pe pakuti vavanje ve va vwila ukuva woka mwene, yope ninsi yimanyinsanye ukuti untumile wenewe, ukuti uvakunzitʼavene inza shʼunkunzite nane.

²⁴ We Tata, avene vonti vʼumpiyʼiwe, ve nkasime ukuti vope vavanje mwonti mwe ndi ine, ukuti venyʼuvupiti vwane vwʼumpiyʼiwe, shʼunkunzite he itali lwʼishilʼinsi ukwalwa.

²⁵ We Tata mugolosu, ninsi yitakumanyile, nkandʼine ne nkumanyile, vope navanava vamanyile ukuti untumile wenewe.

²⁶ Mbalanganizizyʼizina lyaho, havili nkuvalanganizya, pe vope vavanje nasho muhati zyavo ishikunzi shisho shʼukunzitʼiwe, nane ukuti mbe mwe mumwavo.