Yohani 15 - Tesitamenti Umupwa 1965

Impensya ninsamba zyakwe

¹ Ine ne bkwi lya mampensya lya nalyoli. UwenʼuTata we muvwalamampensya.

² Zyontʼinsamba izya papane zye zitakuhomʼinsanga, zyʼakwefwa, izyene zyonti zye zikuhomʼinsanga, zyʼakupalulila ukuti zyonjezyaje ukuhomʼinsanga.

³ Imwe mwe muzelufile vovulo, she muli nalyʼizwi lye mbavuzizye.

⁴ Simuvale mumwane shima imwe, pe nane ndivanga mumwinyu imwe. Inza she zyopʼinsamba zyeka zitakuhomʼinsanga nazimo inga zitakusyelemetela mwikwi lya mampensya, she muhonzizye namwe inga mutakusyelemetela mumwanʼine.

⁵ Ne bkwi lya mampensyʼine, mwe nsambʼimwe. Uno wengʼakuva mumwanʼine, uwene nkuva mumwakwe wuyo ine, wʼakuhoma insangʼinyinji, shenga mutakuvanga nane, pe zyonti zihvapota.

⁶ Umuntu wengʼatakuva mumwanʼine, pʼakutajilwa kunzi fwe nsamba, akwuma. Zyʼavantu vakuzivunganiha, vakuzitaga mumwoto, zikupwa.

⁷ Inga mukuva mumwanʼine, pe namazwi gane gakuva mumwinyu imwe, pe mulavaje zyonti zyenga mukasimʼukulava, pe zikuvalila.

⁸ Mwe mumwo mumutimilʼuTata inga mukuhomʼinsangʼinyinji, havili muli va mwe vasundikwa vane.

⁹ Nane imwe mbakunzite inza shʼuTata ankunzite. Simusyelemetele mushikunzi shane lelo.

¹⁰ Inkomelezyo zyane inga mukuziviha mumoyo, pe mukusyelemetela mushikunzi shane, inza she nane nkuziviha mumwoyo inkomelezyo zya Tata nukusyelemetela mushikunzi shakwe wuyo.

¹¹ Zinizi mbavuzizye ukuti muhati zyinyu muvanje nuluseshelo lwe nkuseshela nane, pʼuluseshelo lwinyu ulu luyipelaje ukuva lwa vwila.

¹² Ulwenʼuluhomelezyo lwane lwe lunulu: Simukundane inza she nane mbakunzitʼimwe.

¹³ Atalipo numʼumuntu uwa shikunzi she shilusizye isha muntu wʼakuvafwilʼuvulanzi vwakwe avajenzi vwakwe.

¹⁴ Imwe pe mwe vajenzi vane inga mukuvomba zizyo zye mbahomelezizye ine.

¹⁵ Shinishi pe ndesilʼukuvataha ilya vuzya, shʼumuzya atamanyile yʼakuvombʼumwene wakwe. Imwe nyene mbapiye ilya kuva mwe vajenzi vane, she zyontʼizi zye niṿuye kwa Tata zye mbavuzizyʼimwe.

¹⁶ Mutatinji imwe mwe munseṿilʼine ndali, nene ne mbaseṿilʼimwe, havili mbatumile nene ntili muvale muhomʼinsanga, ukuti insanga zyinyu zivanje zya shima, pʼuTata avapanje zyonti zyenga mukulava mwizina lyane.

¹⁷ Zyonti zinizi zye mbahomelezizye she nkuti mukundanaje.

Insi yonti nuMupepo wa nalyoli

¹⁸ Inga mwazilʼinsi yivapasite, pe mumanyʼukuti yitalisile ukumpatʼine, lwʼishili nukuvapatʼimwe.

¹⁹ Mupele mwe va munsʼumu, pe nkandi insi yiṿikunzite iṿwakwe, shinishi lelo she mute mwe va munsʼumu, she mbasavuye munsʼine, zyʼivapasitʼinsi.

²⁰ Mukumbuhajʼizwi lila lye mbavuzizye lula ntili: Umunyamata atalusizyʼuvupiti umwene wakwe. Inga vamṿwi-milʼine, pe namwe valivaṿwima. Ingʼilyanʼizwi valisajiye, pe lyope nilyinyu valilisajila.

²¹ Izyene zyonti zinizi valivavombela she muli nizina lyanʼine, she vatamumanyilʼuno wʼantumilʼine.

²² Mpele ntinzilʼukuvavuzya pe nkandʼamalandu nagamʼavene, shinishi nyene pʼizya kuyinonelezya nazimʼavene pamalandu gavo.

²³ Uno wengʼampasitʼine, wʼamupasite nawe Tata.

²⁴ Impele ntavomṿilʼimbombo zye numʼatavomṿile nalumo, pe nkandʼamalandu nagamʼavene, shinishi nyene pe vahatwenya vahatupata swe vavili nuTata nane.

²⁵ Mwe mumwo lilunjisilʼizwi lye lisimṿilwe munkomelezyo zyavo lye likuti: Vampasite mwenzo.

²⁶ Nkandi lwʼayinzilʼuMwimizi, we nkuvatumila lwe mbazilʼukufiha kwa Tata, we Mupepo wa nalyoli, umufuma kwa Tata, wuyo nyene alinkomeshezyʼine.

²⁷ Namwe vovulo mulinkomeshezyʼine, she mutalisile pala pe nanzite, shima twali swenti nane.