Yohani 14 - Tesitamenti Umupwa 1965

Idala lya kusogolela kwa Yise

¹ Gatagandushʼamoyo ginyu; mumwitishʼuMulungu, nane munitishe.

² Munyumba ya Tata palʼapinji apavuyo. Papele pasoṿile nkandi mbavuzizye. She nkuvalʼukuvayana-nizya pavuyo imwe.

³ Ilelo lwe mbazilʼukuvayananizya pavuyo imwe, ndiyinza havili ukuvasendʼimwe, ukuti muvanje kukwane, namwe ukuti muve pupo pe ndi ine.

⁴ Pope napupo pe nkuvala mulimanyilʼidala.

⁵ PʼuToma ahamuvuzya ahati: Mwene, she pope napʼukuvala tutapamanyile, pe twati tulimanye vuli idala?

⁶ PʼuYesu ahamuvuzya ahati: Nene ne lidala nenene, ne vwanalyoli nenene, ne vulanzi nenene. Numo atakufiha kwa Tata, wengʼatakujenda mumwanʼine.

⁷ Mupele mwamanyilʼahinzʼine, pe nkandi wope nuTata pe mumumanyile. Shinishi lelo pe mumumanyile, nukumwenya mumuwenyi.

⁸ PʼahamuvuzyʼuFilipu ahati: Mwene, utulanjʼuSo, pe tutinji hongʼena.

⁹ PʼuYesu ahamuvuzya ahati: She ndiliyʼamaha gonti vovulo namwe, pe havili utamanyilʼine, we Filipu? Shʼuno wengʼambwenyʼine pʼamuwenyʼuTata. Pe havili ukuyanga vulʼiwe ukuti: UtulanjʼuSo?

¹⁰ Utakwitiha izya kuti nane ndi mwa Tata, havili wope nuTata ali mumwanʼine? Amazwi ge nkuvavuzyʼimwe ge ntakwata gane nene ndali. WʼuTata wʼali mumwanʼumu, wʼakuvombʼimbombo zyakwe.

¹¹ Munitishe ukuti nane ndi mwa Tata, havili wope nuTata ali mumwanʼine. Inga mukuhana zinizi pe mwitishe kumbombo zyonti zinizi.

¹² Nalyoli lyoli nkuvavuzyʼine nkuti: Uno wengʼanitisilʼine, wʼimbombo zye nkuvombʼine alivomba zizyo wope. Ena Zyope nindusyi uvupiti alivomba, she nkuvala kwa Tata ine.

¹³ Vwonti vwenga mukulava mwizina lyane ṿwe ndivomba, ukuti uTata pʼavoneshe mwa Mwana ukuva we mupiti.

¹⁴ Inga mukulava zimo mwizina lyane zye ndivomba.

Ulumfingwi lwa Mupepo

¹⁵ Inga munkunzite nalyoli, pe mulilandata namunkomelezyo zyane.

¹⁶ Pe nane ndimulavʼuTata, ilelo pʼuwene alivapʼuMwimizi uwamwavo uwa kuva namwe shima.

¹⁷ We wʼuMupepo wa vwanalyoli, wʼinsi yitamanyilʼukumuposhela, shʼitakumwenya havili yitamumanyile. Nkandʼimwe mumumanyile, shʼakulinda kumwinyu, havili muliva nawo muhati zyinyu.

¹⁸ Ntakuvaleha ukuti mwe vapina ndali, ndiyinza kumwinyu.

¹⁹ Pasyaye pansi pʼinsi yitakundola, nkandʼimwe mukundola she ne mulanzʼine, namwe muliva mwe valanzi.

²⁰ Umusanya wuyo pe mulimanya ukuti ndi mwa Tata ine, namwe ukuti muli mumwanʼine, havili nane ukuti ndi mumwinyu imwe.

²¹ Uno wengʼali nazyʼinkomelezyo zyane, wʼakuziviha namumwoyo wakwe, we wuyo wʼankunzitʼine. Ilelʼuno wengʼankunzitʼine, we wuyo uTata alimukunda, we nane ndimukunda, we ndiyilolesya kukwakwe ine.

²² PʼahamuvuzyʼuYuda, we ndali uwa mu-Kalyoti ula, ahati: Mwene, shonu shitili vuli shʼukuti nkuyilolesya kwe kumwitu iswe sweka, nkandi kunsi ndali?

²³ PʼuYesu ahamwamula ahati: Inga wokʼumuntu ankunzitʼine, wʼalisajilʼamazwi gane, pe wope nuTata alimukundagʼuwene, ilelo pe tuliyinza kukwakwe, tulipela pavuyo iswe papakwe.

²⁴ Uno wengʼatakunkunda, wʼatakusajila namazwi gane. Ilyenʼizwi lye mukwiṿwa shinishi, lye lite lyane ine ndali, lye lya Tata wʼantumilʼine.

²⁵ Zyonti zinizi mbavuzizye nzila, she suti tuli swenti nane.

²⁶ Uwene nyenʼuMwimizi, uMupepʼuMufinjile, wʼuTata alimutuma mwizina lyanʼine, wuyo nyene alivasambilizyʼimwe zyonti, wʼalivakumbusya zyonti zye mbavuzizyʼimwe.

²⁷ Nkuvaleshelʼuvwihalo, nkuvapʼuvwihalo vwane. Ntakuvapʼimwe inza shʼinsi yikuvapanga. Gatagandushe lelʼamoyo ginyu, gatasaganyaje.

²⁸ Mwiṿuye lwe natinji: Mbusilʼukuvala, havili ndiyinza kumwinyu. Inga munkunzite, pe mukwe mukuseshela she nkuti nkuvala kwa Tata, shʼuTata andusizyʼuvupiti ine.

²⁹ Ilelo mbavuzizye nzila lwe zishili, namwe pe pakuti muve mwitihaje lwe zyinzilʼukwinza.

³⁰ Ntakuyangʼinyinji namwe shinishi, shʼayinzilʼumuhatansi yinino, uwene wʼumuntu wa vwelele kukwanʼine.

³¹ Nkandʼukuti insi mwʼimanyilʼine ukuti imukunzitʼuTata, ukuti nkuvomba inza shʼuTata andajizizye: Muvushe, tuvale lelo.