Yohani 12 - Tesitamenti Umupwa 1965

UYesu akupakwa amafuta nuMaliya mu-Betaniya

¹ UwenʼuYesu lelo lwe gasyayʼamandʼumutanda ukwinzʼuchaka wa Pasa, pʼahavala mu-Betaniya mwʼasamiyʼuLazali ula wʼuYesu amuzyusizye kuvafwe.

² Kwe vahamuteleshela ivwa kulya, uMalita ahavatelamishila. UwenʼuLazali wope ali navo ve vahalya nawo.

³ UwenʼuMaliya ahasendʼipaundi yoka ya mafutʼamasitakusanganya nahamʼahanji, amagomu nkani, gʼahamupaha muṿinamʼuYesu, pʼahamusyumula muṿinama ṿwakwe ninsisi zyakwe. Pʼumufungo wa mafuta ahagoganya mwonti munyumba.

⁴ PʼahayangʼuYuda uwa mu-Kalyoti, wokʼumusundikwa wakwe, we pisinda alimwanilila, ahati:

⁵ Vali nishonu ukukazyʼamafuta ganaga namadinali 300 genga vavagavanyʼavapina?

⁶ Zye zizyo atahayanga shʼakumbushiyʼavapina ndali, nkandi shʼalʼumwiva, shʼasenzitʼimbugulu, shimʼahiva ṿwe vahavihaga mumwʼavantu.

⁷ PʼuYesu ahati: Umuleshe, agasunje, gavanje ga pisiku lya kunsyililʼine.

⁸ Shʼavapina ve muli navo shima, nkandʼine ntakuva mumwinyʼumu shima.

⁹ Pe vahamanyʼavaYuda impugʼimpiti ukuti ali kukwo. Pe vahavala, vatamutunjiye uYesu weka ndali, she vahati: Tumumanye nawe Lazali wʼamuzyusizye kuvafwe.

¹⁰ Pʼavashiputʼavapiti vahayangana vahati: Wope nuLazali uno pakuti tumugoje.

¹¹ ShʼavaYuda avinji vahayifumizya, inga pe vahamwitihʼuYesu.

Ukwinjila mu-Yelusalemu nuluseshelo ulupiti

¹² Ilelo ilya ndavi, pʼavantʼimpuga ve vavazile pachaka, lwe viṿuye ukuti uYesu akwinza mu-Yelusalemu,

¹³ pe vahasendʼamanchinda, vahafuma muhaya, vahamutangana, vahavilishila vahati: Hosyana we mulotwa wʼakwinzila mwizina lya Mwene, umwene wa vana Yisilayili.

¹⁴ PʼuYesu ahagʼahadogovi, ahalimbila huho. Inza she lilyo lisimṿilwe lye likuti:

¹⁵ Utatetemaje we mulindu Zyoni, yenya, umwene waho akwinza alimbiyʼindogovi.

¹⁶ Zinizi nyene avasundikwa vakwe vahapotwa ukuzimanyinsanya suti, nkandi pisinda lwʼavazile muvupiti, pala nyene pe vahakumbuha ukuti zinizi zisimṿilwe kuli wuyo, havili zye vamuvombeye.

¹⁷ Vahahomeshezyʼavantu impuga yonti, ve vali nawo lwʼakumwʼuLazali mumbipa, lwʼakumuzyusya kuvafwe.

¹⁸ Zye zizyo vope navantu impuga yonti vahavalʼukumutangana she viṿuye ukuti apezilʼishimanyilo shinishi.

¹⁹ PʼavenʼavaFalisayi vahavuzanya vahati: Yenyi, muvomṿile shaha vwelele. Yenyi, insi yonti isozile mwisinda mumwakwe.

Ukuvuzilizya kwa vaGiliki

²⁰ Muli vuvo ve vazuṿilʼukuputa pachaka mwe valʼavaGiliki vamo.

²¹ Vahavalʼukuyanga nuFilipu wa mu-Betisayida ya mu-Galilayi, vahalambilizya kukwakwe vahati: Mwene, tukwanzʼukumumanyʼuYesu.

²² UwenʼuFilipu ahavalʼukumuvuzyʼuAndeleya, ilelo pʼuAndeleya nuFilipu vahavalʼukumuvuzyʼuYesu.

²³ PʼuYesu ahavamula ahati: Hinzilʼahavalilizyo aha kupelwʼukuvʼumupiti uMwanamuntu.

²⁴ Nalyoli lyoli nkuvavuzya nkuti: Ulusanga lwa ngana inga lutakupeselwa mumugunda inga lutakufwa, pe lukuva lulwo lweka, apene nyene inga lukufwa, pe nkandi lukuhomʼinsangʼinyinji.

²⁵ Uno wengʼuvulanzi vwakwe akuvupepelezya wʼakuvunanga. Nkandʼuno wengʼuvulanzi vwakwe akuvusyoshela munsʼumu, wʼalivusengula nakuvulanzi vwa shimashima.

²⁶ Uno wengʼakwanza ukumbombelʼine, we pakuti andandate mwisindʼine. She kwe ndi ine, kwe pakuti avanje wope numunyamata wane. Uno wengʼakumbombelʼine wʼuTata alimushindiha.

²⁷ Shinishi umwoyo wane pʼakuyinga. Ilelo pe ntuvuli? Amwe minji we Tata umpohaje muhavalilizyo hanaha? Zye ndali, she zye zizyo zye ninjiye muhavalilizyo hanaha.

²⁸ We Tata ulipanjʼuvupiti izina lyaho. Pe lihafuma kumwanyʼizwi, lihati: Ndipiyʼuvupiti, havili nkuvuyizyʼukulipʼuvupiti.

²⁹ Avenʼavantu ve vimiliye pupo impuga yonti, ve viṿuye izwʼili vahati: Ikuguluma. Vamo vahati: Uhavizya ayanzile nawo.

³⁰ UwenʼuYesu ahamula ahati: Izwʼili litayanzilwe ukuti niṿwʼine, nkandi ukuti mwiṿwʼimwe.

³¹ Shinishi pʼinsi yinino yikulongwa. Shinishi umuhatansi yinino akutajilwa kunzi.

³² Nane, inga lumo inga ntunyulilwe munsʼumu, pe ndivakwesa kukwane vonti.

³³ Zyʼahayanga izya kuyanjila mumwo ukuti uvufwe ndifwʼuvulive.

³⁴ Pʼavenʼavantu impuga yonti vahamula vahati: Iswe mululajizyo twiṿuye ukuti uChilisiti alivanga shima. Havili zyʼukuyanga zyashi iwe zyʼukuti: UMwanamuntu we pakuti atunyulilwaje? Wʼunanu uMwanamuntu wununo?

³⁵ PʼuYesu ahavavuzya ahati: Isuti pasyaye pansi vwelele pʼuluhozyo lukwepa mumwinyʼumu. Simujende shinishi lwe suti lulipo mumwinyʼumu uluhozyo, ishisi ukuti shitinzʼukuvagwila. Shʼuno wengʼakujenda mushisi, wʼakwenya kwʼakuvala.

³⁶ Simwitihajʼuluhozyo, lwe suti lulipo mumwinyʼumu, pe muyipelʼukuva mwe vana va luhozyo namwe. Ilelo lwʼavavuzizye zinizʼuYesu, pʼahavala, ahavelenguha.

Izya vusingani vwa va mu-Yudayi nizya vusundikwa vwa kukwilu

³⁷ Avene nyene vahasita nukumwitiha nashenga apezilʼiṿimanyilo ṿiniṿi lwe vakwenya.

³⁸ Mwe mumwo lihalunjihʼizwi lya Yesaya umukuvwi lyʼatili: Mwene, pe wʼunanu alipo wʼakwitiha zye tukuvavuzya? Uwenʼumuhono wa Mwene wʼunanu wʼawuwenyi?

³⁹ Zye zizyo lwavapotagʼulwitiho, shʼuYesaya apanji akuti:

⁴⁰ Avatonkoyʼaminso gavo namoyo gavo agagulumbisile, ukuti Vatenyaje naminso, ukuti vatazyaganyʼinongwa mumoyo, ukuti vatinzʼukupinduha, ntinzʼukuvazuzuvushizya.

⁴¹ Zinizi ayanzilʼuYesaya pala pʼawenyi uvupiti vwakwe uvumwamu, pala pʼahamuyanjilaga wuyo.

⁴² Nashenga zyali vovulo, avapiti vope vahitiha ve vinji, nkandi vahasitʼukutaha apazelu ulwitiho lwavo, she vahogopʼavaFalisayi, vatili: Avene vakutufumwa musinagogi.

⁴³ She vakunzitʼulushindiho lwa vantu kulusya ulushindiho lwa Mulungu. Impiti mulizyʼuYesu ahasambilizyaga avantu

⁴⁴ PʼuYesu ahavilishila ahati: Uno wengʼanitisilʼine, pʼatanitisilʼine ndali, pʼamwitisile wuyo wʼantumilʼine.

⁴⁵ Uno wʼakunenyelezyʼine pʼakumwenyelezya wuyo wʼantumilʼine.

⁴⁶ Lwe ninzile munsʼumu, pe ninzile ne luhozyo, vonti ve vanitisile ukuti vatavanje mushisi.

⁴⁷ Ingʼumʼumuntu akwiṿwʼamazwi gane, havili ingʼatakugasajila, pe ntakumulonga nene ndali, she ntinzilʼukulongʼinsi ine ndali, ninzilʼukupoha insi.

⁴⁸ Uno wengʼakunsinganʼine, uno wengʼatakuposhelʼamazwi gane, wʼali nawo uwa kumulonga. Izwi lye njanzile, lye lilimulonga lilyo pisiku lya pampelela.

⁴⁹ She zye nkayanga zye ntayitumile neka ndali, wʼuTata wʼantumile, wʼankomelezizye wuyo, atili zyʼuyangaje zyenezyo, uvavuzye minji minji.

⁵⁰ Ndumanyilʼuluhomelezyo lwakwe ukuti lwe vulanzi vwa shimashima. Izyene lelo zyenga nkuyangʼine, zye nkuyanga mwʼambuzizyʼuTata.