Yohani 1 - Tesitamenti Umupwa 1965

Izya kutaliha

¹ Kuvwando kwe lyalʼizwi. Izwʼili lihava nuMulungu. Izwʼili lyali wʼuMulungu.

² Ilyene kuvwando lihava nuMulungu.

³ Vwonti ṿipezilwe mwe mumwakwe lilyo. Litave lilyo pe nkandi ṿitapezilwe naṿimo ṿwe ṿipezilwe.

⁴ Vwope nuvulanzi vuhava mumwakwe lilyo. Uvwenʼuvulanzi vuhava luhozyo lwa vantu.

⁵ Ulwenʼuluhozyo luhahozya mushisi. Ishenʼishisi shihasita ukulwaganya.

⁶ Pʼahaloleha umuntu, wʼuMulungu amutumile, ali wʼuYohani izina.

⁷ Wʼayinzilʼukuyanga izya kuhomeshezya, ayinzilʼukuhomeshezya izya luhozyo, vontʼavantu ukuti avatwale kulwitiho.

⁸ Uwenʼatali luhozyo ndali, nkandi ali wa kuhomeshezya izya luhozyo.

⁹ Ulwene lwe luhozyo lwa nalyoli, lwe lukuhozya vontʼavantu ve vakwinza munsʼumu.

¹⁰ Uwenʼali munsʼumu, she yopʼinsi yapezilwe mumwakwe, nkandi iyenʼinsi yitahamumanya.

¹¹ Ayinzile mumwakwe, havili avenʼavantu vakwe vahasitʼukumuposhela.

¹² Avene nyene vonti ve vamuposheleye vʼavapiyʼamaha aga kuvelʼukuva vana va Mulungu, vuvo ve vahitiha izina lyakwe,

¹³ ve vatapafilwe namumavanda, namwʼakasimʼumuvili, namwʼakasimʼumuntʼumwanaṿuli ndali, nkandi mumwakwe uMulungu.

¹⁴ Havilʼizwi lihayipelʼukuva muvili, ahadila mumwitʼumu tuhenya nuvupiti vwakwe, uvupiti fwe vwa Mwana wʼali woka mwenʼimozi mwa Yise, we nuvwila nuvwanalyoli vwizuye mumwakwe.

¹⁵ UwenʼuYohani ahamuhomeshezya ahavilishila ahati: We wuyo we namutahaga we natinji: Wuyo wʼakundandata mwisinda we mutanzi kukwane, shʼuwenʼalipo lwe nchili ine.

¹⁶ Havili swenti muvutangale vwakwe tuhasendela vwe vwila havili havili.

¹⁷ Shʼizyenʼinkomelezyo uMulungu atutumiye nuMose, uvwenʼuvwila nuvwanalyoli vwʼatupeleyʼuYesu Chilisiti.

¹⁸ Numʼatamuwenyi muminsʼuMulungu nalumo, uMulungu uMwana woka mwene imozi, wʼali pashifuva sha Yise, wuyo wʼatuvuzizye.

Uluhomeshezyo lwa Yohani umwozyi ulwa kumuhomeshezya uYesu

¹⁹ UwenʼuYohani ahahomeshezya zinizi lwʼavaYuda vavatumile kukwakwe navashiputo navana-Leṿi ukumuvuzilizya ukuti: We nanʼiwe?

²⁰ pʼahaṿumbula, ahasita nukuzyiha, ahayihana ahati: Nte ne Chilisiti ine.

²¹ Havili vahamuvuzilizya vahati: Uli vuli lelo? We Eliya? Uwenʼahati: Nte nene. Amwe we mukuvwi iwe? Uwenʼahamula ahati: Ndali.

²² Havili avene vahamuvuzilizya vahati: We nanu lelo? Utuvuzye ilya kuvalʼukuvavuzya ve vatutumile. Ukuyiyanjila lili kwi?

²³ Uwenʼahavavuzya ahati: Ine ne lizwi lya muvilishizi mulwugwa, wʼakuti: Simugolosyʼidala lya Mwene, inza shʼayanzilʼuYesaya umukuvwi.

²⁴ Avene nyenʼavantu ve vatumilwe vafumile muvaFalisayi.

²⁵ Havili vahamuvuzilizya vahati: Ilelo ukwozya shonu ingʼute we Chilisiti, ute we Eliya, ute we mukuvwi?

²⁶ UwenʼuYohani ahamula ahati: Ine ne nkwozezya ge minzi vwelele. Uwene nyene wʼayimiliye pahati pamwinyʼipa, wʼimwe mutamumanyile,

²⁷ wuyo wʼandandite mwisindʼine, we wuyo ine ntahondeye ukusatula inkova zya ndyato zyakwe.

²⁸ Zinizi zyapezilwe mu-Betaniya kwisyila lila lya Yolidani, mwʼuYohani ahozezyaga.

²⁹ Ilya ndavi ahamwagʼuYesu akwinza pʼali, pʼahayanga ahati: Ula halʼahagonzi ha Mulungu he hakunyatulʼuvutalamalandu vwa nsi yonti.

³⁰ We wuyo namutahaga we natinji: Akundandata mwisindʼumuntu we mutanzi kukwane, shʼuwene alipo lwe nchili ine.

³¹ Nane ntamumanyile ndali, nkandi alolehaje wuyo kuvana-Yisilayili mwe mumwo nkwozya naminzi.

³² Havili uYohani ahahomeshezya ahati: Imuwenyi ine uMupepo lwʼakwiha akufuma kumwanya ngati nkunda, ahatendama papakwe.

³³ Nane ntamumanyile ndali; wuyo nyene wʼantumile ukwozya naminzi, we wuyo wʼambuzizye atili: Wuyo wengʼuyazile uMupepo akumwishila nukutendama papakwe, we wuyo wʼakwinzʼukwozya muMupepʼuMufinjile.

³⁴ Zye nkenyʼine, pe havili nkahomeshezya nkati: We wuyo we Mwana wa Mulungu.

Avasundikwa va Mwozyi nʼuYesu

³⁵ Havili ilya ndavi ilyamwavo lwʼayimiliye pupʼuYohani navasundikwa vakwe vavili,

³⁶ pʼahamwagʼuYesu akujenda, pʼahati: Ula halʼahagonzi ha Mulungu.

³⁷ Avenʼavasundikwa vakwe vavili ve viṿuye lwʼakuyanga linili, pe vahamulandatʼuYesu.

³⁸ UwenʼuYesu ahasyetuha, ahaga vakulandata, pʼahavavuzya ahati: Mukuvala kwi? Avene vahamuvuzya vahati: Labi (lye likuti: Musambilizi), ukuva kwi?

³⁹ Uwenʼahavavuzya ahati: Nzagaji, mumanye. Pe vahavala, vahenya pʼakuva. Ilelo pe vahizya nawo umusanya wuyo. Apene pali pe pahavalilizyo hʼishumi.

⁴⁰ Avene ve vahiṿwaga zyʼahayangagʼuYohani, ve vahalandatagʼuYesu, woka ali wʼuAndeleya umuzuna wa Simoni Peteli.

⁴¹ Wʼahataliha ukumwagʼumukulu wakwe uSimoni, ahamuvuzya ahati: TumwazilʼuMesiya (lye likuti: UChilisiti).

⁴² Ahamutwala kwa Yesu. UwenʼuYesu ahamwenyelezya ahati: We Simoni we mwana-Yohani iwe, shinishi ukutashilwa ilya Kefa (lye likuti: UPeteli).

⁴³ Ilya ndavi ilyamwavo uYesu lwʼavusilʼukuvala muGalilayi, pʼahahomana nuFilipu, ahamuvuzya ahati: Undandate.

⁴⁴ UwenʼuFilipu nyene afumile mu-Betisayida inkaya yakwe uAndeleya niya Peteli.

⁴⁵ UwenʼuFilipu ahahomana nuNatanayeli, ahamuvuzya ahati: Tumwazile wuyo, wʼuMose amusimṿile munkomelezyo namuvakuvwi, uYesu umwana-Yosefu uwa mu-Nazaleti.

⁴⁶ UwenʼuNatanayeli ahamuvuzya ahati: Mu-Nazaleti ṿwonu ṿifumile mumwo lumʼiṿwinza? UwenʼuFilipu ahati: Nzagaga, uyenye.

⁴⁷ UwenʼuYesu lwʼawenyi uNatanayeli akwinza kukwakwe, pʼahamuyanjila nzila ahati: Musukumile umuYisilayili nalyoli, wʼate namafuji nagamo muhati yakwe.

⁴⁸ PʼuNatanayeli ahamuvuzya ahati: Umanyile poshi? AhamulʼuYesu, ahamuvuzya ahati: LwʼuFilipu ashili ukukwita, lwe wali mwituvu lila, pe nakuwenyʼine.

⁴⁹ Pʼahamwamula uNatanayeli ahati: Labi, we Mwana wa Mulungu wenewe, we Mwene wenewe wa vana-Yisilayili.

⁵⁰ Havili uYesu ahamula ahamuvuzya ahati: she nkuvuzizye ntili: Nakuwenyi mwituvu? mwe mumwo zikuhozile? Ulisukumila impiti nakulʼizi.

⁵¹ Pʼahayanga nawo ahati: Nalyoli lyoli nkuvavuzyiʼmwe nkuti: Muliyaga kumwanya kwigusile navahavizya va Mulungu ve vakuzuva kumwanya nave vakumwishila uMwanamuntu.