Yakobu 5 - Tesitamenti Umupwa 1965

Ukuzipinga zimʼimbivi zye zikuvombwa na vadumbwe

¹ Ukwo lelo mwe vadumbwe simukutaje, muyidweganjilaje kuvuzwelusu vwe vukuvinzila.

² Ishuma shinyu shivozile, niṿizwalo ṿwinyu inyenze zidovoye,

³ usahabu nufeza winyu uvusimu vuliye. Uvusimu vwavo vuliva vwe vwahome vwa kuvalongʼimwe, havili vulilyʼamavili ginyu fwe ngati mwoto. Mulunzitʼishuma mumanda ga kumpelela.

⁴ Yenyi, amalipilo ga vaṿuni ve vaṿunagʼamagunda ginyu, ge muhavima, gʼinkuta yavo yikufuma kumwinyu, havili inkuta yavo ve vaṿunagʼamagunda yifisile mumakutwi ga Mwene uZebayoti.

⁵ Muhaluvʼiṿintu munsʼumu, muhapapamila ṿwonti. Amoyo ginyu muhagalela fwe ngati pe pisiku lya kulyʼinyama.

⁶ Muhamuyanjila vuvi nukumugogʼumugolosu, wʼatakuvapinga.

Insoshe kuzya vujimṿi

⁷ Mwe mumwo lelo, mwe vamwitu, mutasilikitwaje, muhafishe kuvwinzilo vwa Mwene. Yenyi, wope numulimamagunda aminso gali kunsanga Zye ngomu, akuzigulilila shisitakusilikitwa ukufiha pala pʼakwenya imṿula ya mundundo mya shisiku.

⁸ Nimwe mutasilikitwaje, mugomwajʼamoyo ginyu, shʼuvwinzilo vwa Mwene vupalamiye.

⁹ Mutangʼwingʼwinzilanaje, mwe vamwitu, ukuti mutalongwaje. Yenyi, umulonzi ayimiliye kushilyango.

¹⁰ Mwe vamwitu, musendelaje ishiholanyo kuvakuvwi ve vahayanga mwizina lya Mwene, inza she vahajimbililagʼimbivi shisitakusilikitwa.

¹¹ Yenyi, tukuti vasangalusu ve vaṿindiyʼamalema. Uvuṿindilamalema vwa Yobu vwe mwiṿuye, zyope ninongwa zya Mwene inza shʼazimalilizizye zyonti muziwenyi, ukuti uMwene ali nishikuku ishinji, wa lupepelezyo uwene.

¹² Zye zilusizye kuli zyonti, mwe vamwitu, Zye zikuti kwe ndali ukulapʼishilapo. Mutalapaje kuya kumwanya nakuya pansi nga kwe kushilapo ishinji shonti. Uena winyu avanje ena mpela, nundali winyu wope avanje ndali mpela, ukuti mutagwanje muvulonzi.

Amaha ga luputo

¹³ Amwʼalipo uwamwinyu wumo wʼakuyimba zimo? Wʼaputaje. Amwʼalipo wumo wʼasankine? Wʼayimbajʼinyimbo zya lutimo.

¹⁴ Amwʼalipo uwamwinyu wumo wʼayeyevaye? Wʼavitʼavasongo va shivanza, ve vamuputile uluputo, ve vamupashile namafuta mwizina lya Mwene.

¹⁵ Ilelʼuluputo lwe lufumile mulwitiho lwe lulimupoha umuvinu uno, pʼuMwene alimuvusya, havili namalandu gengʼatazile galiswilwa.

¹⁶ Simupempulilanʼamalandu ginyu, muputilane, pe mukuzuzuvuha. Shʼuluputo lwa muntʼumugolosu ingʼatujishiye, pe luli namaha nkani aga kuvomba zimo.

¹⁷ UEliya wʼali muntu vwelele fwe sweswe, aholine naswe muvuntu. Ahaputa uluputo ulwa kuri imṿula yitatonyaje, ilelo pʼihasita nukutonya munsi amaha gatatu namezʼumutanda.

¹⁸ Ahavuyizyʼukuputa havili, pe kumwanya kuhatonyelezyʼimṿula, ninsi ya pansi yihamezyʼiṿintu ṿwakwe.

¹⁹ Mwe vamwitu, ingʼuwamwinyu wumo apagusile kuvwanalyoli, ilelo pe woka akumugalusya,

²⁰ pʼamanyʼukuti uno wengʼakumugalusyʼumutalamalandu mwʼapuṿilʼidala, wʼalipohʼumwoyo wakwe kuvufwe, wʼalikupishilʼamalandu aminji.