Yakobu 1 - Tesitamenti Umupwa 1965

Insivo zya vutuli munongwʼinyinji

¹ Ne Yakobu umunyamata wa Mulungu nuwa Mwene Yesu Chilisiti, nkuvasimbila mwe va nkolo ishumi nazivili mwe musavaliye muvujeni, nkuvalamuha.

² Mwe vamwitu, inga zivazinganiye mwonti mwonti indingo zyonti mwe zivaliye, pe mutinji zye zya kuseshela ntupu,

³ lwe mukumanya ukuti ulwitiho lwinyu inga luyilolesizye ukuva lwe lulwo nalyoli, pe lukupelʼuvuṿindilamalema.

⁴ Uvwenʼu-vuṿindilamalema vwe pakuti vuvombajʼimbombʼinyila, ukuti muvanje mwe vila, mwe valunjisu avasitakusovelwa nahamo.

⁵ Uno wengʼasovelilwʼinjele, wʼalavaje kwa Mulungu wʼakuvapa vonti iṿwinji shisitakuvasusya, pʼalimupa.

⁶ Ukwenʼukulava nyene kwʼalavaje mulwitiho shisitamaganigani. Shʼuno wengʼakuganagana muhati wʼali fwe ngati livilingwa lya mwa sumbi lyʼinkungu yikuliṿundulanya, yikulitajila uku nuku.

⁷ Uno wengʼali vovulo wʼatasivaje ukuti ingavanga aliposhela shimo kwa Mwene.

⁸ Shʼumwoyo wakwe kwe kuva ali pavili, atali napa vwimililo napamo mumadala gakwe gonti.

⁹ Uwenʼuwamwitu wenga munsi, wʼayitimaje kwe kuvutunyusu vwakwe,

¹⁰ uwenʼudumbwe nyene mwe muvunsi vwakwe, shʼalitega fwe vwezya vwʼisole.

¹¹ She lwe litukuyʼizuva nahasanya hakwe, pʼisole lihuma, nuvwezya vwakwe vuhalagala, nuvwinza vwa shati shakwe vuhatega. Shʼalihonzya vovulo wope nudumbwe, afifwoha mumadala gakwe.

¹² Musangalusu umuntu wengʼakujimba mululingo. She lwʼalolesile ukuti ahondeye, pʼaliposhelʼishipambwi sha vulanzi shʼuMwene afinzile kuli vonti ve vamukunzite.

¹³ Numo lwengʼakulingwa atayangaje ukuti wʼuMulungu wʼakumulinga. ShʼuMulungu atakulingwa nimbivi, havili uwene atakumulingʼumuntu numo.

¹⁴ Nkandi vonti —woka woka— vakulingwa lwʼimpapilo zyavo zikuvakwesa nukuvafunkulanya.

¹⁵ Ilelo mwe munumu impapilo lwe ziposheleye imbeyu muhati pe zikupapʼuvutalamalandu. Ilelʼuvutalamalandu lwe vwakula, pe vukupapʼuvufwe.

¹⁶ Mutahapuve mwe vamwitu, mwe vankundwa.

¹⁷ Iṿipelwa iṿwinza ṿwonti niṿikunjilwa iṿwila ṿwonti ṿwe ṿwa kumwanya, ṿikwiha ukufuma kwa Yise wa nkozyo, we muli wuyo ukugalunkana kutalipo, havili atakuyandula fwe ngati hazunda.

¹⁸ Uwene inza shʼakasime wuyo ahatupapa mwizwi lya vwanalyoli, ukuti tuvanje swe va kutomola muṿipelelwa ṿwakwe.

Ulwitiho lwa nalyoli

¹⁹ Mumanyaje, mwe vamwitu vankundwa vane, ukuti umuntu wonti akalakasyaje ukutejelezya, ayolovelaje ukuyanga, havili ayolovelaje mumulaha.

²⁰ Shʼumulaha wa muntu atakuvombʼizya vugolosu vwa Mulungu.

²¹ Mwe mumwo simufumwʼuvupamizu vwonti nuvuvivi vwe vukulafuha. Izwi lye likutotelwa muhati zyinyu, lye limanyilʼukupohʼamoyo ginyu, lye muliposhele muvutelefu.

²² Simuyipelajʼukuva mwe vavombelʼizwi, mutavanje mwe vakwiṿwa vwelele ndali, lwe mukuyihopa mweka.

²³ Shʼingʼu-muntu akwiṿwʼizwi vwelele shisitakuvomba, pʼali fwe muntu wʼakuyenyelezya mwiloli ṿwʼapezilwe kuminso.

²⁴ Lwʼayenyelezizye pʼakusogola, havili akuluṿwa naluvilo ṿwʼapezilwe.

²⁵ Nkandʼuno wengʼakwenyelezya nkani uluhomelezyo ululunjisu ulupelavutavushe, wʼakulinda mumwo, wʼatakuyipelʼukuva wa kwiṿwa wʼakuluṿwa ndali, wʼakuyipelʼukuva muvombambombo, wʼimbombo yakwe yikumupʼuvusangalusu.

²⁶ Umuntu wʼakuyisivilila ukuti muvombezi wa Mulungu, nkandi ulumili lwakwe atakulufunga fwe ngati nalihova, wʼakuyihopa mumwoyo wakwe, wʼuvuvombezi vwakwe vwa shaha vwelele.

²⁷ Uvwenʼuvuvombezi uvuzelu uvusitamazota nakwa Mulungu nakwa Tata vwe vwe vuno: Ukuṿula avantagwa navantandʼavafwile muvuhamantanilwa vwavo, nukuyigunta kunsi shisitamazota.