VaLoma 9 - Tesitamenti Umupwa 1965

Uvuswimililwa vwa Pavuli kuvusingani vwa vana-Yisilayili

¹ Nkuyanga nalyoli ne ndi mwa Chilisiti, ntakuyangʼizyʼilenga, Zyope ninyenyezyo zyane zikunkomeshezya mwa MupepʼuMufinjile,

² ukuti ndi nuvuswimililwʼuvupiti, havili numwoyo wane atakutuzyʼukuvava shima.

³ She nkandi nalaṿile ukuti ntipwajʼintipo izya kumpagulanya nuChilisiti pazya vamwitu ve tulʼuluho lwoka navo umuvili,

⁴ ve vanaYisilayili. Vwavo vuvo uvwana nuvumwamu ninyitinkano, nukupelwa kwa nkomelezyo, nuvuvombezi vwa kumuvombelʼuMulungu, nimfingwi.

⁵ Vavo vuvo navatata vitu; wope nuChilisiti afumile mwe mumwavo umuvili, we Mulungu wa ṿwonti wʼakutundumikwa shima shima. Amen.

Imfingwi zya Mulungu zitapeleleye

⁶ Ilelo te kuti liloteleye lelʼizwi lya Mulungu. She te vonti ve vafumile mwa Yisilayili vana-Yisilayili.

⁷ Yope nimbeyu ya Abulahamu te vana va Abulahamu vatupu, she liyanzilwe lye likuti: Imbeyu yaho yilitashilwa mwe mwa Yisikaka.

⁸ Kwe kuti venga vapafilwe mumuvili vate vana va Mulungu, nkandi ve vapafilwe inza shʼafinzilʼulumfingwi uwene, vuvo vakutashilwʼukuva ye mbeyu.

⁹ Shʼizwi lya lumfingwi lye lino: Kumwaha inza shʼishi pe ndiyinza, pe ndiyaga uSala ali numwanʼumwanaṿuli.

¹⁰ Te zye zinizi zyeka ndali. Wope nawe Lebeka vovulo ahayijenzya kumuntu woka, uYisikaka utata swenti.

¹¹ Lwe vashili nukupapwa, lwe vashili nukuvomba nazimo inyinza nimbivi, —ukuti zijendelelaje zyʼuMulungu atalisilʼukukasama hali inza shʼakusavulʼavantu,

¹² te mwe mumbombo zyavo nkandi inza shʼakuvita—, pʼahaposhelʼizwi lye likuti: Umukulu alimuvombelʼumuzuna.

¹³ Inza she lisimṿilwe lye likuti: UYakobu we namukunzite, nkandʼuEsavu we namupasite.

UMulungu te musitavugolosu

¹⁴ Amwe pe tuti vuli lelo panapa? Amwe vulipʼuvugombanu kwa Mulungu? Zye ndali ukushela zinizi!

¹⁵ ShʼakumuvuzyʼuMose akuti: Ndimupepelezya wenga nkumupepelezya, havili ndimufwilʼuvwila wenga nkumufwilʼuvwila.

¹⁶ Mwe mumwo te muntu wʼali namaha ingʼakasime ingʼakuyikungula mulujendo, nkandi we Mulungu wʼakumupepelezya.

¹⁷ Shʼukalata akumuvuzyʼuFalayo akuti: Zye zizyo nkakwimiha iwe, ukuti ngalolesyʼamaha gane pazyaho, ukuti izina lyane likumushe munsi yonti.

¹⁸ Mwe mumwo lelo uwenʼuMulungu akuvapepelezya vamo, vamʼakuvasyosyʼamoyo gavo, inza mwʼakasimʼuwene.

UMulungu wʼuMzvenʼumupiti

¹⁹ Ishi ukumbuzilizya ukuti: Shonu shʼakwumana lelo? She wʼunanu wʼangapasʼulupaso ninkasamo zyakwe?

²⁰ We muntu we nanʼiwe ukuti ulongane nuMulungu? Amwe ishililo shingamuvuzya wuyo wʼashiyaninye ukuti shonu shʼunjaninye vovulo?

²¹ Amwe shilanye umumatansonta atali namaha kwivumba ukuti muli linili amataje insonta yoka iya mbombʼinyinza havili iyamwavo kumbombʼimbivi?

²² UwenʼuMulungu nyene ingʼakasime ukulolesya umulaha wakwe havili ukugamanyisya amaha gakwe, ahayitetesya insonta yʼayiṿitililwe yʼatili ya kutupulwa, lwʼakuti sangapa sangapa,

²³ havili ukuti avumanyisye uvutangale vwa vumwamu vwakwe mwe munsonta zya lupepelezyo zyʼaziyaninye nzila zivanje zya vumwamu,

²⁴ she sweswe swʼatwisite te kufuma kuvaYuda veka ndali nakuvakunzi vwelele.

²⁵ Inza shʼakuyanga namwa Hoseya, akuti: Ve te vantu vane ndivataha ilya vantu vane, wope numwantanda wʼate wʼunkundwa ilya nkundwa,

²⁶ ilelo pupo pe vahiṿwa ukuti mwe te mwe vantu vane,— pe valitashilwa ukuva vana va Mulungu umulanzi.

²⁷ UwenʼuYesaya akumupongomoshelʼuYisilayili, akuti: Nashengʼavana-Yisilayili vakuva fwe ngati lusenga lwa kwa sumbi uvwinji, pope valipona vansi vwelele ve vakusyala.

²⁸ ShʼuwenʼuMwene alivomba munsʼumu inza shʼayanzile mwizwi lyakwe, alilimalilizya, alilidumula.

²⁹ HavilʼuYesaya inza shʼayanzile nzila lwe zishili, ahati: ApelʼuMwenʼuZebayoti atatulesheyʼimbeyu, pe nkandi tuli fwe ngati Sodomu, pe nkandi tuholine niGomola.

Zye zyavapeleye avana-Yisilayili ukupelwa

³⁰ Amwe pe tuti vuli lelo? Tutinji avakunzi ve vatahayikungulagʼukwanzʼuvugolosu, vavwazilʼuvugolosu, vwe vugolosu vula vwe vukufuma mulwitiho.

³¹ UwenʼuYisilayili nyene wʼahayikungulagʼukwanzʼuluhomelezyo ulupelavugolosu, wʼatahalwaga nalumo.

³² Amwe shonu lelo? She vatali nuvwahayikungule vwa mulwitiho, nkandi vali fwe ngati zikuvapangʼuvugolosu zye mbombo zyavo. Mwe mumwo vahapunula pivwe lya kupunula pupo,

³³ inza she lisimṿilwe lye likuti: Yenya mu-Ziyoni mwe mbisile ivwe lya kupunula pupo niyalavwe lye likugwisya. Uno wengʼakwitiha wʼatalipasilwʼinsoni.