VaLoma 8 - Tesitamenti Umupwa 1965

Ukulandila mwa Mupepo

¹ Mwe mumwo lelo nakumo ukwa kuvalongʼilya kuvatupula ve vali mwa Chilisiti Yesu.

² Shʼuluhomelezyo lwa Mupepo wa vulanzi mwa Chilisiti Yesu luntavuzizye kuluhomelezyo lwa vutalamalandu nulwa vufwe.

³ She huho he zipositʼukuvomba inkomelezyo muvutonsu vwa muvili wa mbivi, hʼavomṿilʼuMulungu lwʼamutumilʼuMwana wakwe muluholanyo lwa vutalamalandu vwa muvili, shʼakumbusilʼuvutalamalandu, ahavusyusyutanyʼuvutalamalandu mumuvili wa vuntu,

⁴ shʼahati pʼuvugolosu vwa nkomelezyo vulunjishe mulʼiswe, swe shinishi tutakulandatʼizya munkomelezyo nkandi tukulandata zye zya Mupepo.

⁵ Shʼavana-muvili wa mbivi vakusiva zye zya muvili wa mbivi, nkandʼavana-Mupepo vakusiva zye zya Mupepo.

⁶ Shʼukwenʼukusiva kwa muvili wa mbivi kwe vufwe, nkandʼukwenʼukusiva kwa Mupepo kwe vulanzi nulusankano.

⁷ She zyʼakusivʼumuvili wa mbivi zilʼuvulugu nuMulungu. She zitakukonza kunkomelezyo zya Mulungu, she zikupotwa.

⁸ Avene nyenʼavanamuvili wa mbivi vakupotwʼukuhondela kuminso ga Mulungu.

⁹ Nkandʼimwe mute mwe vana-muvili wa mbivi, mwe vana-Mupepo, ingʼuMupepo wa Mulungu azenzile muhati zyinyu nalyoli. Nkandʼuno wengʼate nawʼuMupepo wa Chilisiti, wʼate muntu wakwe.

¹⁰ Apene nyene ingʼuChilisiti ali muhati zyinyu, pʼumuvili afuye kuvutalamalandu, nkandʼumupepo akulandila kuvugolosu.

¹¹ Apene nyene uwenʼuMupepo wʼuno wʼamuzyusizye kuvafwe uYesu, ingʼazenzile muhati zyinyu, pʼuno wʼamuzyusizye uChilisiti Yesu kuvafwe aligapʼuvulanzi namavili ginyu amafwe muMupepo wakwe we muli nawo muhati zyinyu.

¹² Mwe mumwo lelo mwe vamwitu swe vakulanduzilwa, te zya muvili wa mbivi, ukuti tuzilandate zye zya muvili, ndali.

¹³ Shenga mukulandata izya muvili wa mbivi pe mulifwa. Apene nyene ingʼimbombo zya muvili wa mbivi mukuzigoga nuMupepo, pe mulilandila.

Avana va Mulungu

¹⁴ She vonti vengʼakuvajenzyʼuMupepo wa Mulungu, avene ve vana-Mulungu.

¹⁵ Shʼuwenʼumupepo we mumuposheleye, wʼate wa vuzya wa kuvasontelezya Ishitetemwi nohavili, ndali, we mupepo wa vwana we mumuposheleye, we wuyo tukuvilishila mumwo tukuti: Aha! We Tata!

¹⁶ ShʼuMupepo wuyo akumwitishilʼumupepo witu ukuti swe vana va Mulungu.

¹⁷ Apene lelo inga swe vana, pe swe vapwanavupwano vovulo; avapwanilavupwano va Mulungu, ve vakupwana poka nuChilisiti, inga tukuyimba poka nawo ukuti tutundumikwaje poka nawo.

Uvumwamu vwe vukwinza

¹⁸ She nkwaga ukuti gontʼamayimba aga shinishi gatakuholana nuvumwamu vwe tulivuposhela vwe vuliloleha inga lumo.

¹⁹ She ṿwope niṿipelelwa ṿwonti ṿikugulilila lwʼiṿweni ṿwenyizye pupo pe valilolehʼavana va Mulungu.

²⁰ Vwope niṿipelelwa ṿikonzile kuvuyeyevazu nashenga ṿitavukasime ndali, ṿikonzile muli wuyo wʼaṿikonzizye palusuvilo.

²¹ She ṿwope niṿipelelwa ṿiniṿi inga lumo pe ṿilitavulwa kuvuzya vwa vuvozu, ṿwope ṿiliva muvutavushe vwa vumwamu vwa vana va Mulungu.

²² She tumanyile ukuti iṿipelelwa ṿwonti ṿikuvuvula nukuva muvuhamantanilwa ukufiha nakushinishi uku.

²³ Havili te ṿiṿwo ṿweka ndali, naswe vwelele swe tutomoyʼuMupepo, tukuvuvula muhati lwe tukugulilila nkani uvwana nukutavulwʼumuvili.

²⁴ She tuhapokwa mulusuvilo. Ulusuvilo lwe lukuloleha pe te lusuvilo. Amwʼunanu wʼangasuvila ṿwengʼakuṿilola?

²⁵ Apene nyene she tukusuvila ṿwe tutaṿiwenyi pe tukuzyihʼumulaha ukuṿigulilila.

²⁶ Wope nuMupepo vovulo ahatutula muvutonsi vwitu. Shʼiswe tutamanyile zye zihondeyʼukuputa, nkandʼuMupepo akutwimila, akutuyanjila muzya kuvuvula ukusitamazwi nagamo.

²⁷ Uwene nyenʼuno wʼasimishizizye nage moyo gitu, wʼamanyile zyonti zyʼakutahʼuMupepo, she zyonti zyʼakuvayanjilʼavafinjile inza mwʼakasamiyʼuMulungu.

²⁸ Nkandi tumanyilʼiswe ukuti utuntu twonti tukutulana ukupelʼiṿwinza kuli vonti venga vamukunzitʼuMulungu, nkutaha vuvo vʼavisite, mwʼavalulumiye nzilʼuwene.

²⁹ She vuvo vʼavamanyinsinye he hali, vʼahavasavula nzila ukuti vaholane nishati sha Mwana wakwe, uwene pe pakuti avanje we wʼuhatote muvanamuntu ve vinji.

³⁰ Avene nyene vʼavasavuye nzila, vʼahavita. Avene vʼavisite, vʼahavatahʼuvugolosu. Avene vʼavatasilʼuvugolosu, vʼahavapʼuvumwamu.

Ishikunzi sha Mulungu

³¹ Pe tuti vuli lelo zinizi? Apene ingʼuMulungu ali naswe, pʼunanu wʼangava mulugu witu?

³² Uwenʼuno wʼuMwana wakwe atamupepelezizye, nkandʼahamufumwa pazyitu, wʼangasitʼukutukunjila poka nawo ṿwonti lelo?

³³ Pʼunanu wʼangavalonjelela zimʼavasavulwa va Mulungu? ShʼuMulungu wʼakuvatahʼuvugolosu.

³⁴ Pʼunanu angavalongʼilya kuvatupula? WʼuChilisiti Yesu wʼafuye, havili ahapitilizya shʼahazyuha, wʼali kumuhonʼumulilo wa Mulungu, wʼakutwimilʼiswe.

³⁵ Pʼunanu wʼangatupagulanya kushikunzi sha Chilisiti? Amwʼuvupotwe, pamo uvuhamantanilwa, pamo ukuṿwimilwa, pamʼinzala, pamʼinzwalo, pamo ukupulumulilwa, pamʼishipanga?

³⁶ Inza she lisimṿilwe lye likuti: She swe vantu vaho, mwe tukugojelwa shima ukufuma shanzanche ukufiha shamazuva. Lwe vakutusivʼavantu pe vakuti swe ngʼonzi zya kuvolwa.

³⁷ Nkandʼiswe zyonti zinizi tulusizye ukuzipota muli wuyo wʼatukunzite.

³⁸ Shʼimanyilʼine nalyoli ukuti ṿwonti nga vufwe, nga vulanzi, nga ve vahavizya, nga mpepo zya vumwene, nga tuntu twa shinishi natwe tuliyinza, nga maha gamo ge galipo,

³⁹ nga vutunyusu, nga vwivizu, nga hantu hamʼahanji ahapelwa, hatalitupagulanya kushikunzi sha Mulungu she shili mwa Chilisiti Yesu uMwene witu.