VaLoma 6 - Tesitamenti Umupwa 1965

Ukukunjilinkana nuChilisiti kwe kusitakuvombʼimbivi

¹ Amwe pe tuti vuli lelo? Amwe tuvanje mwe muvutalamandu ukuti Uvwila vuṿulaje?

² Zye ndali ukushela zinizi! She swe vafwe muvutalamalandu pe tungasyala mumwo vulivuli?

³ Imwe ngavanga mutamanyile ukuti swenti swe twozilwe mwa Chilisiti Yesu twozelilwe muvufwe vwakwe?

⁴ She twasyililwe poka nawo pala pe twozelilwe muvufwe vwakwe, ukuti naswe tujendaje muvupwa vwa vulanzi inza shʼuvumwamu vwa Yise vuhamuzyusyʼuChilisiti kuvafwe.

⁵ Shʼinga tukunjilinkine nawo ukuti tuholane muvufwe vwakwe, pe tuliholana vovulo muvuzyuha vwakwe.

⁶ She naswe tumanyilʼukuti umuntu witu umukali wope ahomelilwe poka nawo pashihovenkanyo, ukuti umuvili wa vutalamalandu uno asilaje, ukuti tutonjezyaje ukuvuvombeiʼimbombo uvutalamalandu.

⁷ Shʼuno wengʼafuye akutashilwʼuvugolosu shisitakwenyelezyʼuvutalamalandu.

⁸ Apene lelo inga lufuye nawʼuChilisiti, pe tuli nulwitiho ukuti mwope namuvulanzi tulivanga poka nawo.

⁹ She tumanyilʼukuti uChilisiti shʼazyusile kuvafwe, pʼatalivuyila muvufwe. Uvwenʼuvufwe vutalivuyizya havili ukuva wʼumwene wakwe.

¹⁰ Shʼuvufwe vwʼafuye avufwiliyʼuvutalamalandu, ahavumalilizya nzila; uvwenʼuvulanzi vwʼakulandila vwe vwa Mulungu.

¹¹ She muhonzyaje vovulo namwe, muyimanyaje ukuti mufuye kuvutalamalandu. Apene lwe mukulandila pe mwe va Mulungu mwa Chilisiti Yesu.

¹² Ilelo uvutalamalandu vutayipelajʼukuva wʼumwene mumavili ginyu ga vufwe, pakuti mutitihaje impapilo zyakwe.

¹³ Twope nutuntu twa mumavili ginyu twe mutavuninchilizyaje uvutalamalandu ukuti tuvanje twa kuvombelʼuvugombanu ndali; muyininchilizyaje kwe kwa Mulungu, mulolehaje ukuti mukulandila mwe mwafuye, twope nutuntu twa mumavili ginyu vovulo, ukuti tuvanje twa kuvombela izya vugolosu.

¹⁴ Shʼuvutalamalandu vutaliva namaha kulʼimwe, she zitakuvakonzya zye nkomelezyo nkandi vwe vwila.

Ishiholanyo ukufuma muzya vazya

¹⁵ Vuli lelo? Amwe pe tutalajʼamalandu she zitakutukonzya zye nkomelezyo nkandi vwe vwila? Zye ndali ukushela zinizi!

¹⁶ Imwe mutamanyile ukuti uno wenga muyipezilʼukuva mwe vazya vakwe ava kumusajila, we mwe vazya vakwe we mukumusajila, inga mwe vazya va vutalamalandu pe mukwenyezya kuvufwe, inga va vugolosu pe mukwenyezya kuvugolosu.

¹⁷ Nkandi shinishi pe nkugwʼulupi kwa Mulungu, she mwe mwali vazya va vutalamalandu, ishi musajiye namoyo ginyu insambilizyo zila zye mwaninchilizilwe mumwo.

¹⁸ Shinishi nyene she mutavuzilwe kuvutalamalandu, pe muyipezilʼukuva mwe vazya va vugolosu.

¹⁹ Ishi injanjile mwe vakuyanjilʼavantu, she mwe vantu namwe muvutonsu. Inza she lulwo utuntu twa mumavili ginyu muhatupelaga ukuva tuzya twa vuhandamanu, twa vusitankomelezyo, ukuti tuvombaje zye te zya munkomelezyo, ishi mutupelaje vovulo ukuva tuzya twa vugolosu ukuti muvanje mwe vafinjile.

²⁰ She lwe mwali mwe vazya va vutalamalandu, pe mwali mwe vasatushe kuzya vugolosu.

²¹ Pe muhahomaga nsanga vuli lelo, zye shinishi zikumwamihʼitwe? Shʼizyene kumpelela vufwe vutupu.

²² Nkandi shinishi she musatusile kuvutalamalandu, mukumuvombelʼuMulungu, mukuhomʼinsanga zyinyu zye zyenyizye kulufinjilo. Izyene kumpelela vulanzi vwa shima shima.

²³ Shʼamalipilo ga vutalamalandu vwe vufwe; nkandʼiṿwenʼiṿikunjilwa ṿwa Mulungu vwe vulanzi vwa shima shima mwa Chilisiti Yesu uMwene witu.