VaLoma 3 - Tesitamenti Umupwa 1965

Izya kupunuzya zikwamulwa

¹ AmwʼavaYuda lelo vavalusizye shonʼavantʼavanji? Uvwenʼuvuvolwa vuvapiye shonu?

² Iṿwinji muli zyonti. She kutaliha uMulungu avapiye zizyo zyʼahayanga ukuti vazisunjilile.

³ Vuli lelo? Inga vamo vasisitʼukwitiha, pʼukusitakwitiha kwavo kungalotelezyʼuvutungamu vwa Mulungu?

⁴ Zye ndali ukushela zinizi! TumumanyʼuMulungu ukuti we wa nalyoli, nkandʼavantu vonti valumilenga, inza she lisimṿilwe lye likuti: Ulolehaje mumazwi gaho ukuva we mugolosu, uvapotaje lwe vakukulonga.

⁵ Apene lelo uvugombanu vwitʼiswe inga vukukumusyʼuvugolosu vwa Mulungu, pe tutuvuli lelo? AmwʼuMulungu mugombanu lwʼakutusunda muvuhalazu? Nkuyanjila zinizi muvuntu.

⁶ Zye ndali ukushela zinizi! Inga she zili vovulo pʼuMulungu angayilonga vulonsi?

⁷ Shengʼuvulumilenga vwane vukumupʼuvupitʼuMulungu, she vukukumusyʼuvwanalyoli vwakwe, pe ngalongwa vuli uvutalamalandʼine?

⁸ Amwe pe shonu tutayangaje —inza she vamo vakututona ukuti tukuziyanga— tuvombajʼimbivi she mwe zikufumʼinyinza? Uwenʼanonelezizye, shʼakuvalongʼilya kuvatupula.

Ukupelwa sha nsi yonti

⁹ Vuli lelo? Tuvalusizyʼavanji shonu? Ndali, tutavalusizye nga hansi. Shʼapatanzi twavalonzile vonti avaYuda navaGiliki ukuti vakonzile kuvutalamalandu.

¹⁰ Inza she lisimṿilwe lye likuti:

¹¹ Atalipʼumugolosu nga woka woka. Atalipo numumanyinsanyi, atalipo numo wʼakumwanzʼuMulungu.

¹² Vonti vapuṿilʼidala, vananjishiye poka. Atalipo wʼakuvombʼinyinza nga woka woka.

¹³ Avene kunsingo zye mbipa zye zilʼukwazi, imili zyavo shifumbo shitupu. Vaṿumbatizizye insalile zya njoha mumalomu gavo.

¹⁴ Mumalomu gavo mukulafuha nintipo nuvuhali.

¹⁵ Iṿinama ṿwavo ṿitakuhava kwe vakuvalʼukwitʼamavanda.

¹⁶ Mwe vajenzite vudugumbusu vutupu nuvupotwe.

¹⁷ Ilyenʼidala lya vwihalo lye vatalimanyile.

¹⁸ Ulunyilo lwa kumunyilʼuMulungu lwe vataluvisile kuminso avene.

¹⁹ She tumanyile ukuti zyonti zye zikuyangʼinkomelezyo zye zikuvavuzya vuvo ve vali munkomelezyo. Avantu vonti zivafundishile kwilomu, insi yonti ukuti iyipelaje ukuva ya kulongwa nawe Mulungu.

²⁰ She mumbombo zyʼukuvomba we muntu mwe zilajizizye zye nkomelezyo mwe numʼumuntu atakugoloshelʼuvugolosu kuminso gakwe. Shʼinkomelezyo zikumulanganizyʼumuntu ukuvumanyinsanya uvutalamalandu.

Uvwanalyoli mulwitiho lwa kumwitihʼuChilisiti

²¹ Ilelʼuvwenʼuvugolosu vwʼakutugolosyʼuMulungu vwe vulolesilʼapazelu shisitakuva munkomelezyo, vwe vuhomeshezilwe munkomelezyo namuvakuvwi.

²² Uvwenʼuvugolosu vwa Mulungu vukufuma mwe mulwitiho lwa kumwitihʼuYesu Chilisiti, vwʼatili vwa vonti ve vamwitisile. She vaholine vonti, vatalusinye.

²³ She vonti vatazilʼamalandu, vasoveyʼuvumwamu vwa Mulungu.

²⁴ Akuvakunjila wuyo uvugolosu she wa vwila uwene. Akuvakunjila mwe muvutavuzi vwʼuChilisiti Yesu avatavuzizye.

²⁵ WʼuMulungu akumukumula ukuti mumavanda gakwe mwʼayipelajʼukuva mulwitiho hantu aha kukundana navo ve vakumwitiha, ukuti mwe vuvonehajʼuvugolosu vwakwe, shʼagalesilʼamalandu ge vahatalaga lulwo, lwʼatili sangapa sangapa shimʼuMulungu,

²⁶ ukuti uvugolosu vwakwe vulolehaje shinishi, ukuti vamumanye she mugolosu, havili akuvatahʼuvugolosu vope nava venga vamwitisilʼuYesu.

²⁷ Ulutimo luli kwoshi lelo? Lwigalilwe kunzi. Muluhomelezyo vuli? Amwe mwe muluhomelezyo lwe lukuti vombaga zimo? Ndali, luhomelezyo lwe lukuti yitihaga.

²⁸ Tukumalilizya tukuti: Mwe mumwo umuntu akugoloshelʼuvugolosu mulwitiho, te mwe mumbombo izya kulandata munkomelezyo.

²⁹ Amwe uMulungu Mulungu wa vaYuda veka? Amwe ate Mulungu wavo navakunzi? Ena, uwene Mulungu wavo navakunzi.

³⁰ ShʼuMulungu ali woka mwene, wʼakuvatahʼuvugolosu navavolwa ve vali mulwitiho, havili akuvatahʼuvugolosu avasitakuvolwa inga vali nulwitiho.

³¹ Amwe kwe kuva tukuzivindula inkomelezyo mulwitiho? Zye ndali ukushela zinizi. Nkandi kwe kuti tukuzyimihʼinkomelezyo.