VaLoma 2 - Tesitamenti Umupwa 1965

AvaYuda vope vavombambivi

¹ Mwe mumwo hatalipo nahamo aha kuyinonelezya lwe, we muntu, wengʼukulonga. She gonti gengʼukulonga wokʼuwamwinyu, ge havili ukuyiyanjila mumwo wewe weka uvuvivi nawe, she nawe ukutali gugo gʼukulonga.

² Nkandʼiswe tumanyile ukuti uvulonzi vwa Mulungu vuli nuvwanalyoli kuli vuvo ve vakuvomba zinizi.

³ Ilelʼiwe we muntu wʼukuvalonga ve vakuvomba zinizi, havili nawe ukuvomba zizyo, amwe kwe kuti ukuti ulipulumuha kuvulonzi vwa Mulungu?

⁴ Ingavangʼukusufwʼiwe uvutonsu vwakwe vwe vutangaye nuvuzyihamulaha nuvuṿindilamalema vwakwe vwe shimʼakuti sangapa sangapa? Amwe utawenyi uvutonsu vwa Mulungu ukuti vukukusontelezya kulupinduho?

⁵ Iwe nyene shʼumwoyo waho mugomu, atakwanzʼukupinduha, mwe mumwo ukuyijelenkanyʼuvuhalazu vwa pisiku lya vuhalazu lwʼuMulungu alilolehʼapazelu ukulonga muvugolosu.

⁶ Shʼuwene alivapanga vonti pambombo zyavo, unʼizyakwe unʼizyakwe.

⁷ Venga vakwumishizyʼukuyikungula kumbombʼinyinza, ve vakuyanzila mumwo uvumwamu nulushindiho nuvusitakufwa, vʼalivapangʼuvulanzi vwa shima shima.

⁸ Nkandʼavenʼavalumaluma ve vakusinganʼizya nalyoli, vʼalivapanga umulaha nuvuhalazu;

⁹ uvupotwe nuvuhamantanilwa pamoyo ga vantu vonti ve vakuvombaʼimbivi, ukutaliha kumuYuda havili nakumuGiliki;

¹⁰ nkandʼavene ve vakuvombʼinyinza, vʼalivapanga uvumwamu nulushindiho nulusankano, ukutaliha kumuYuda havili nakumuGiliki.

¹¹ ShʼuwenʼuMulungu atakwenyelezya muvwinza kuminso numʼumuntu.

¹² She vonti ve vatazilʼamalandu lwʼinkomelezyo nazimo, ve valitupulwa shisitankomelezyo, havili vonti ve vatazilʼamalandu munkomelezyo ve valilongwa mwe munkomelezyo.

¹³ She te vagolosu kwa Mulungu venga vakwiṿwa vwelele inkomelezyo, nkandi vuvo venga vakuvomba izya munkomelezyo ve vakutashilwʼukuva vagolosu.

¹⁴ Shʼingʼavakunzi ve vate ninkomelezyo vakuvomba izya munkomelezyo vakuti ṿwe vahapelwa, pe vayipezilʼukuva nkomelezyo vuvo nashenga inkomelezyo vatali nazyo.

¹⁵ Avene valolesizye mumbombo zyavo ukuti inkomelezyo zisimṿilwe mumoyo gavo, shʼinyenyezyo zyavo zikuvahomeshezya, havili ninsivo zyavo pamo zikusundana zizyo ntupu, pamo zikunonelezanya

¹⁶ pisiku lila lwʼuMulungu alilonga mwa Yesu Chilisiti zyʼavantu vazyisile kukwilu, inza she nkuyanga mwIvangeli lyane.

¹⁷ Ilelʼiwe ingʼukuyitahʼuvuYuda nukuzitungamilʼinkomelezyo nukuyitima mwa Mulungu,

¹⁸ havili uzimanyile zyonti zyʼakasimʼuwene, namwe zitapunkine nimbivi ninyinza uzisimishizizye muvumanyankomelezyo,

¹⁹ havili uyiwenyi wewe weka ukuti we chilongozi wa vantonko nukuva we luhozyo lwa va mushisi,

²⁰ havili ukuti we musundanjele wa vawelewele, nukuva we musambilizi wa vagolo, wʼumanyile munkomelezyo inza she vukuloleha uvumanyinsanyi nuvwanalyoli;

²¹ apene lelo lwʼukuvasambilizyʼavanji, pʼutakuyisambilizya wewe weka? Wʼukukumusya ukusitakwiva, wʼukwiva wewe?

²² Wʼukuti mutahavembuhaje, wʼukuvembuha wewe? Wʼukunyanyalʼamalungu, we havili ukupumʼiṿintu mwa tempeli?

²³ Wʼukuyitima munkomelezyo pe havili ukumunamangulʼuMulungu wenewe mulushilanyo lwaho lwa nkomelezyo?

²⁴ She mwemwe mwe mulipeleye ukunamanguha muvakunzi izina lya Mulungu, inza she lisimṿilwe.

²⁵ Shʼuvuvolwa vuhondeye ingʼukuvombʼizya munkomelezyo. Nkandi ingʼushilinkinye inkomelezyo, pʼuvuvolwa vwaho vuyipezilʼukuva te vuvolwa.

²⁶ Apene lelʼuwenʼumusitakuvolwa ingʼakuvomba zyonti izya vugolosu vwa munkomelezyo, amwe pʼukusitakuvolwa kwakwe kutangavazilwa ukuva vuvolwa?

²⁷ Mwe mumwo umuntu we te muvolwa muluho, wʼazimazilʼinkomelezyo, alikulongʼiwe wʼukushilanyʼinkomelezyo nashengʼuli nawʼukalata nuvuvolwa.

²⁸ She te muYuda wenga muYuda munzi. Havili te muvolwa wengʼavolilwe kwe kumuvili wa kunzi.

²⁹ Nkandi wenga muYuda muhati we muYuda nalyoli, nuvuvolwa vwa mumwoyo vwe vufumile mwa mupepo te mwe mwa kalata. Wʼulushindiho lwakwe lutakufuma kuvantu, lukufuma kwa Mulungu.