VaLoma 15 - Tesitamenti Umupwa 1965

¹ Nkandʼiswe swe vagomu pakuti tuvutetesyaje uvutonsu vwa vamwitu ve vate vagomu, tutayishelaje sweswe sweka.

² Swenti pakuti tumushelajʼuwamwitu wenga tupalamine nawo, ukuti avanje nuvwinza azengwaje fwe ngati nyumba.

³ She wope nuChilisiti atahayishela weka ndali, nkandi ahonzizye inza she lisimṿilwe lye likuti: Umusamu wa ve vakukusamula wʼangwiliye nenene.

⁴ She zyonti zye zyasimṿilwe, zye zyasimṿilwe ukuva nsambilizyo kulʼiswe, ukuti uvuzyihamulaha nuvulondovolelo vwa kalata ṿitupelelajʼulusuvilo.

⁵ Uwene nyenʼuMulungu wa vuzyihamulaha nuvulondovolelo wʼavapanjʼukuti muvanje numwoyo woka mwene mwenti, mulandate mwe mwa Chilisiti Yesu,

⁶ ukuti mwenti muvanje poka nilomu lyoka lyene ukumutimʼuMulungu uYise wa Mwene witu uYesu Chilisiti.

⁷ Mwe mumwo muposhelelanaje mwenti inza she nuChilisiti avaposheleye ukuti zivanje zya kumushindihʼuMulungu.

⁸ Nkuti uChilisiti ayipezilʼukuva wa kuvavombela avavolwa pazya vwanalyoli vwa Mulungu, ukuti ulumfingwi lwʼafinzile navatata lulolehaje shisitakugalunkana,

⁹ vope navakunzi vamutinihajʼuMulungu, inza she lisimṿilwe lye likuti: Zye zizyo nkukutiniha namuvakunzi, lyope nizina lyaho nkulitimila mulwimbo.

¹⁰ Havili apanji akuti: Mwe vakunzi simuseshelaje poka navantu vakwe.

¹¹ Nohavili: SimumutimʼuMwene mwenti mwe vakunzi, ninkolo zyonti zimutundumihaje.

¹² Havili uYesaya akuyanga akuti: Lilivʼiduṿwa mwizi lya Yisayi, alivuha uwa kutemʼukuva wʼumwene wa vakunzi, we valimusuvilʼavakunzi.

¹³ UwenʼuMulungu lelo umuhatalusuvilo wʼavizuzyaje uvusansamusu nuvwihalo vwe vuli mulwitiho, ukuti amaha ga MupepʼuMufinjile gavapelelaje ukulafuha Ulusuvilo.

UPavuli akuyangʼapazelu ṿwʼakuvasuvila ava ku-Loma lwʼukuvasimbila

¹⁴ Nane lwe nkuvenyʼimwe mwe vamwitu, pe manyile ukuti namwe mwizuye insivʼinyinza, mumazilʼinjele zyonti, havili mumanyile nukusundana mwe vuvo vatupu.

¹⁵ Pamo nyene mpitilizizye ukuvasimbilʼimwe namaha she mili imbakumbusye muvwila vwe mposheleye kwa Mulungu,

¹⁶ ukuti imbe ne muvomṿi wa Chilisiti Yesu kuvakunzi nukuva ne muvombezi muvwashiputo vwIvangeli lya Mulungu; ukuti avakunzi vavanje mputile ya kushela ye yizelufile mwa MupepʼuMufinjile.

¹⁷ Ndi nulutimo mwa Chilisiti Yesu she nkumuvombelʼuMulungu.

¹⁸ Shʼine ntalishela ukuyanga nazimo zyʼuChilisiti atantumilʼine ukuti zye mbombaje izya kuvapelelʼukwitiha avakunzi. Nkutahʼizya mazwi nizya mbombo;

¹⁹ nazye nkavombela mumaha ga ṿisukumilo naga mamfindango, mumaha ga MupepʼuMufinjile. Muli zinizi nkamalilizyʼukuyanga Ivangeli lya Chilisiti ukufuma mu-Yelusalemu namunsi yʼipalamiye pupo ukufiha namw-Ililiki.

²⁰ Nkayikungulaga ukuti ntahayanjʼIvangeli mwe vamanyilʼizina lya Chilisiti, she natili ntahazenje palwalo lwe vayʼavanji,

²¹ nkandi inza she lisimṿilwe lye likuti: Vuvo ve vatavavuzizye nalumʼinongwa zyakwe valilola, vuvo ve vatiṿuye nalumo valizyaganya.

ZyʼuPavuli azilulumiye

²² Zye zizyo zihangalusyagʼapinji ukwinza kumwinyu.

²³ Nkandi shinishi she ntali nuvuyo munsi zinizi, havili nkusambagʼamahʼaminji ukwinza kumwinyu,

²⁴ lwenga nkuvala munsi ya mu-Sipaniya. Nkusuvila ukuti ndilolana namwe lwe nkutuha, havili ukuti mulintula ukufiha kula, lwe suti twizya hamo, twadinkana.

²⁵ Nkandi shinishi pe nkuvala ku-Yelusalemu ukuvavombelʼavafinjile.

²⁶ Shʼava mu-Makedoniya nava mw-Akaya vanzile ukuvasangulila avafinjile avapina ava mu-Yelusalemu yimo.

²⁷ She vayisesile havili vayiwenyi ukuti vahondeye ukulanduzilwa navo; shʼingʼavakunzi valiline navʼiṿwa mupepo, pe pakuti vavavombelaje vuvo muṿwa muvili.

²⁸ Ilelo lwe namalilizyʼimbombʼino, lwe navapʼahinza munyove insanga zinizi, pe ndituha mumwinyu lwe nkuvala mu-Sipaniya.

²⁹ Havili imanyilʼine ukuti inga nafiha kumwinyu pe ndifiha muvwinji vwa vulote vwa Chilisiti.

³⁰ Ilelo mwe vamwitu nkuvalambilizyʼine mwa Mwene witu uYesu Chilisiti namushikunzi sha MupepʼuMufinjile ukuti tuyikungule swenti muluputo lwa kundavilʼine kwa Mulungu;

³¹ ukuti tupokwaje kuli vuvo ve vakusitʼukwitiha mu-Yudayi, havili ukuti imbombo ye nkuvala nayo ku-Yelusalemu yinonaje kuvafinjile;

³² ukuti nkafishe kumwinyu nuluseshelo inza mwʼakasamiyʼuMulungu, pe nkatuzye kumwinyu.

³³ Uwene nyenʼuMulungu wa vwihalo wʼavanje namwe mwenti. Amen.