VaLoma 12 - Tesitamenti Umupwa 1965

Uvulanzi uvupwa

¹ Ilelo mwe vamwitʼimwe, nkuvalambilizya mulupepelezyo lwa Mulungu ukuti mumuninchilizyajʼamavili ginyu, ge gavanje mputile indanzi, inzelu, yʼakuyishelʼuMulungu. Vwe vuvanje vuvombezi vwinyu vwa njele.

² Mwandaje mutayiholanyaje ninsʼino ndali, mwanduhaje mwidala lya kupelwʼuvupwa munsivo zyinyu; pe namwe mulizimanyinsanya zyʼakasimʼuMulungu, nazye nyinza nazyʼakuzishelʼuwene nizya vulunjisu.

Idalʼilyinza lya kuṿivombela iṿikunjilwa ṿwa Mupepo

³ Nkuyanjila muvwila vwʼampiye nane, nkuvavuzya mwenti mwe muvaliye woka woka ukuti ukuyisivila mutapitilizyaje pe pahondeye ukuyisivila. Nkandi ukwenʼukuyisivila muyisivilajʼahinza woka woka inza shʼuMulungu amulinjiye ulwitiho lwakwe.

⁴ Inza she mumuvili witu woka tuli nutuntu utwinji, utuntu tunutu nyene tutakuvombʼimbombo yoka yene;

⁵ ṿwe luhonzizye naswe vovulo nashenga swe vinji swe muvili woka mwa Chilisiti, swenti swe tuntu, uno kuwamwavo, uno kuwamwavo.

⁶ Swenti tuli niṿikunjilwa ṿwe ṿivaliye muvwila vwʼatupiye wuyo, unʼuvwakwe payo, unʼuvwakwe payo; inga vukuvwi, pe vuholanaje nulwitiho,

⁷ inga vuvombezi, pe vulolehaje mumbombo zya kuvavombelʼavantu; wengʼakusambilizya muvusambilizi vwakwe;

⁸ wengʼakusoha munsoshe zyakwe; wengʼakuvapʼiṿwa kuvapa atasivajʼizinji pupo; wenga wʼusongo apangamalajʼimbombo yakwe; wengʼakuvombʼizya shikuku avombaje shʼasankine.

Indajizyo zya lujendo lwa muchilisiti

⁹ Ishikunzi pakuti shitavanje namafuji. Muzisufwe zyontʼimbivi, musyelemetele munyinza.

¹⁰ Ishenʼishikunzi sha kukundana mwe vanamuntu shivanje sha mumoyo nalyoli. Kumushinzi umuntu wonti atalishʼukumushindiha uwamwavo,

¹¹ mutatozoshe muvwahayikungule, muvanje nuvulanzi vwa mumupepo, mumuvombelʼuMwene,

¹² nulusuvilo mwe musankane, nashenga mukuyimba pe muzyihajʼumulaha, mumputo mwe mwumishizyaje,

¹³ ingʼavafinjile ṿikuvasova yimo pe mulilane navo, muvatetele navajeni.

¹⁴ Muvalotaje venga vakuvaṿwima, simuvalotaje, mutahavatipe.

¹⁵ Museshelaje navo venga vakuseshela, mukutaje navo venga vakukutʼamansozi.

¹⁶ Muvanjʼumwoyo woka mwene mwenti mwe muvaliye. Mutasivaje izya kuyimwamiha mweka ndali, mutenjelane navasamusu. Zye ndali ukuyiyangʼinjele mwemwe mweka.

¹⁷ Mutamugalushizyaje numʼimbivi pambivi. Muyikungule kuvwinza vwe vakuti vwinza avantu vonti.

¹⁸ Inga mwazile pavitisile imwe pe mutenjelane navo vontʼavantu.

¹⁹ Mutahayilanduzizye mwemwe mweka, mwe vankundwa, muvuleshelʼuvuhalazu vwa Mulungu, she lisimṿilwe lye likuti: Ululanduzyo lwane nenene, ndigalushizya pupo nene, lyʼakuyangʼuMwene.

²⁰ Nkandi Ingʼumulugu waho ali ninzala pʼumupanjʼiṿwa kulya. Ingʼayumilwʼishinyoto pʼumupanjʼaminzi. Shengʼuhonzizye vovulo pʼuvunganisilʼamajilijili ga mwoto pitwe lyakwe.

²¹ Zye ndali ukukonza kuvuvivi, nkandʼuvuvivi uvukonzyaje nuvwinza.