VaLoma 1 - Tesitamenti Umupwa 1965

Umulamu

¹ UPavuli umunyamata wa Chilisiti Yesu wʼayisitwe ukuva mwapositili nukusavulwa pazyʼIvangeli lya Mulungu;

² lyʼatalisilʼukukumusya muvakuvwi vakwe muvakalata avafinjile;

³ lye likumuyangʼuMwana wakwe we muvuntu apafilwe mumbeyu ya Davidi,

⁴ wʼalolesile mumaha ga mupepo wa vufinjile pala pʼahazyuha kuvafwe ukuti Mwana wa Mulungu, uYesu Chilisiti uMwene witu,

⁵ we wuyo tuposheleye mumwakwe Uvwila nuvwapositili uvwa kumulonchela ava kuzilandata izya lwitiho mwizina lyakwe munkolo zyonti,

⁶ muzinizi mwʼuYesu Chilisiti avisite namwe;

⁷ kuli vonti avankundwa va Mulungu ava mu-Loma, avitwa avafinjile: Uvwila nuvwihalo vuvanje namwe vwe vukufuma kwa Mulungu uTata swenti na kwa Mwene uYesu Chilisiti.

UPavuli akusiva izya kutandala ku-Loma

⁸ NkutalihʼukumusalifwʼuMulungu mwa Yesu Chilisiti pazyinyu mwenti shʼulwitiho lwinyu lukumusile munsi yonti.

⁹ UMulungu we nkumuvombela mumupepo wane mwʼIvangeli lya Mwana wakwe, wʼuhome wane ukuti nkuvakumbuha shisitakulita,

¹⁰ she shima mumputo zyane nkulava ukuti lumo ingʼuMulungu akwitiha mulukasamo lwakwe ndiyemba ninze kumwinyʼukwo.

¹¹ She nkusungwa nkani ukuvenyʼimwe, she nkuti ngavapa hamʼaha kunjilwa ha mwa mupepo aha kuvasimfwa,

¹² nkuti tusuvizanyaje kumwinyu mulwitihʼulu lwe tuli nalwo swenti imwe nane.

¹³ Ntakwanza ukuti mutamanye mwe vamwitu, ukuti apinji nkasivaga ukwinza kumwinyu, zimo nyene zihangalusya ukufiha nilelo ili, she natinji inkome lumʼulusanga nakumwinyu inza ṿwe nkahonzya nakuvakunzʼavanji.

¹⁴ Ne wa kundanduzya vonti navaGiliki nave te vaGiliki, navanjele navasovanjele.

¹⁵ Mwe mumwo lelo munsivo zyane nkusungwʼukuvavuzya namwe va mu-Loma Ivangeli.

Ivangeli inza vwe lili

¹⁶ Shʼine ntakufwʼinsoni plvangeli. She maha ga Mulungu aga kupoha vonti ve vakwitiha, ukutaliha kumuYuda inga numuGiliki vovulo.

¹⁷ She likupuliyʼuvugolosu vwa Mulungu vwe vukufuma mulwitiho vwe vukusontelezya mwe mulwitiho havili. Inza she lisimṿilwe lye likuti: Uno wengʼuvugolosu vwakwe vufumile mulwitiho, wʼalilandila.

Uvuvivi vwa vakunzi

¹⁸ Shʼuvuhalazu vwa Mulungu vukupulilwe ukufuma kumwanya palwilo lwonti ulwa kumwilʼuMulungu napavugombanu vwonti vwa vantu, ve vakudinda uvwanalyoli vwa Mulungu muvugombanu vwavo.

¹⁹ She zyonti zye zimanyisile izya Mulungu zilʼapazelu muli vuvo, shʼuMulungu ahavalanga zyenezyo.

²⁰ She zyontʼizyakwe zye zitakuloleha muminso ukufuma pala pe yapezilwʼinsi, zye zikuloleha nukumanyiha mumbombo zyakwe, nkutahʼamaha gakwe aga shimashima nuvulungu vwakwe. Mwe mumwo zikusovʼavene izya kuyinonelezya.

²¹ She pope nashenga vamumanyilʼuMulungu vahasitʼukumushindiha ukuti wʼuMulungu nukumusalifwa. Zyonti nazye vahasivaga zihayipelʼukuva zya shaha. Nishisi shihagwa mumoyo gavo amasitanjele.

²² Lwe vakusiva ukuti vali ninjele pe vahava vawelewele.

²³ Uvwenʼuvupiti vwa Mulungu umusitakwanduha vahavugalula kushiholanyo sha muntu ninyunyi ninkanu zya ṿinama ṿine inga niṿwaṿuzi.

²⁴ Mwe mumwo uMulungu ahavaleshelezya mumpapilo zya moyo gavo, ukuti vavanje nuvuhandamanu uvwa kuyinamangusya veka amavili.

²⁵ She vazigaluyʼizya nalyoli zya Mulungu ukuva lilenga, vahaṿishindiha nukuṿivombela iṿipelelwa, nkandi uMupezi vamulesile, wʼali nulushindiho shimashima. Amen.

²⁶ Mwe mumwo uMulungu ahavaleshelezya ukuti zivapembaje impapilo zya kuyinamangusya, she navantanda vagaluye imbombo ya mavili gavo inza she vapezilwe, vakuvomba zye zilʼumwiho.

²⁷ Vope navanaṿuli vovulo valeshe ukuva navʼavantanda inza she vapezilwe, vahapapamilana vuvo vatupu valugusile mumpapilo. Avanaṿuli vahavomba zye zilʼumwiho navanaṿuli vamwavo. Mwe mumwo vahayilonchela vuvo veka amalipilo ge gavahondeye palunanjiho lwavo.

²⁸ Ilelo inza she vope vasisitʼukumumanyinsanyʼahinza uMulungu munsivo zyavo, pʼuMulungu ahavaleshelezya munsivo zye Zitahondeye nukuvomba zye zilʼumwiho.

²⁹ She vizuyʼuvugombanu vwonti nuvunyala nimpapilo nulombwa; vizuye nuvuzuva nuvugozi nivo nishifumbo nuvugulugulu. Ve viyevo,

³⁰ avakwalanzi, avapupusyaMulungu, avamatona, avamabado, avahayivale, avatambivʼimpwa, avilʼavapafi,

³¹ avasitanjele, avazimanjizyanyitinkano, avasitavumanyani, avasitalupepelezyo.

³² Avene pope nashenga vamanyilʼuvulonzi vwa Mulungu ukuti vonti venga vakuvomba zinizi vahondeye ukufwa, vakuzivomba, havili vakwitinkana nave vakuzivomba ukuti zye nyinza.