VaHebuli 6 - Tesitamenti Umupwa 1965

¹ Mwe mumwo lwe tukuzilehʼinsambilizyo intanzi zya Chilisiti tupitilizyaje ukuvufishila uvulunjisu, tutavuyizyaje ukwalʼulwalo lwa lupinduho lwe lukugunjila imbombʼinsitavulanzi nulwa lwitiho lwa kumwitihʼuMulungu,

² nulwa nsambilizyo zya lwozyo, nulwa kuvavihʼinyove, nulwa kuzyuhʼavafwe, nulwa vulonzi vwa shimashima.

³ Ena she tulihonzya ingʼuMulungu atwitisile.

⁴ Shʼavenʼava ve vapelilwʼuluhozyo lyoka, ava ve vatomoyʼiṿikunjilwa ṿwa kumwanya nava ve vayipezilʼukuva valilani va MupepʼuMufinjile,

⁵ ava ve vatomoye izwʼilyinza lya Mulungu namaha ga nsi yʼiliyinza—

⁶ avene inga vavuyizizye ukugwa, pe numo atamanyile ukuvandula ulwanduho lwa nsivo havili, she vavuyizizye ukuyihomelela nohavili uMwana wa Mulungu pashihovenkanyo nukumupela ukuva wa kusamulwa.

⁷ She yope ninsʼino yikungʼwelʼimṿula ye yikuyitonyela havili havili, yʼikuvamezezyʼiṿiyavo ve yikulimwa pazyavo, inza she ṿivahondeye, yope yikuposhelʼishigavo sha vulote vwe vukufuma kwa Mulungu.

⁸ Nkandi inga yikumezya amimṿwa namansonya yitakuvosya nahamo, yʼisyaye pansi ukutipwa, yʼuvusilo vwakwe we mwoto.

⁹ Nkandʼimwe mwe vankundwa, nashenga tukuyanga vovulo, pe tuvatungamiyʼimwe izinji zye mpiti Zye zisosoncheye kuvupokwa.

¹⁰ ShʼuMulungu te musitavugolosu uwene ndali, atangaluṿwa imbombo yinyu ye muvomṿile nga shikunzi shinyu she mushilolesizye kwizina lyakwe, lwe muhavavombelaga avafinjile nalwe mukuvavombela shinishi,

¹¹ Ilelʼiswe tukasime ukuti mwenti woka woka mulolehaje vwe vwahayikungule vwe vulungime kuvulunjisu vwa lusuvilo ukufiha kuvusilo,

¹² ukuti mutahatampaje, nkandi mulandatʼumwiho wa vuvo ve vakupwana imfingwi nulwitiho namuvuzyihamulaha.

Imfingwi zya Mulungu zikusonjelezyʼulutungamilo

¹³ She pala pʼuMulungu afinzilʼulumfingwi nuAbulahamu, pʼalafile mumwakwe wuyo, shʼatalipo numʼumulusyi uvupiti kuli wuyo uwa kulapila mumwo,

¹⁴ ahati: Nalyoli lyoli nkukulotʼuvulote, nukukuṿuzizya ndikuṿuzizya nkani.

¹⁵ Shʼali nuvuzyihamulaha vunuvu ahalufishila ulumfingwi.

¹⁶ Shʼavantu vakulapila muli wuyo wʼavalusizyʼuvupiti, ilelo pʼishilapo shikumalilizyʼamadali gonti kuli vuvo, shikuzisimfwa.

¹⁷ IlelʼuwenʼuMulungu lwʼatili mpitilizyaje ukuvavuzya avapwanavupwano vwa lumfingwi ukuti lutakugalunkana nalumo, pʼahaviha nishilapo pupo;

¹⁸ ukuti kuṿintu ṿivili iṿisitakuga-lunkana, ṿwe muli ṿiṿwo uMulungu atangalumʼilenga, tuvanje nulusuvizyo ulugomu iswe swe tushimbiliye ukulemʼulusuvilo lwe tuvishililwe,

¹⁹ lwe tuli nalwo fwe ngati nyangula ya moyo gitu, ye yimanyile ukuyilema, iya maha, yʼikupitilizya ukwinjila namuhati mumwenda we vapituye,

²⁰ mwʼuYesu atalisilʼukwinjila pazyitu, wʼayipezilʼukuva washiputʼumupiti wa shima ukulandata mumwiho wa Melikisedeki.